Iobu
19 Nge öni Iobu ka hape:
2 “Uti hë eu la tro epuni a akötrë ni,*
Me thaipië ni hnene la itre trengewekë i epun?
3 A 10 hë lao wesitrë ni* hnei epun;
Tha hmahma kö epun troa qanangazo ni.
4 Nge maine nyipici laka, hnenge hna tria,
Ngo eni kö la ka xeni pun.
5 Nge maine epuni a pi draië hui eni,
Me qaja ka hape, ka meköti la hna ahmahmanyi ni,
6 Loi e tro epuni a pane atre laka, Akötresieti la ka amenu ni,
Me e ni ngöne la hnö* i nyidrë.
7 Ke goeën! tha mano kö ni sue fë ka hape: ‘Kola iakötrë!’ ngo pëkö ka sa koi ni;
Eni pala hi a thele ixatua, ngo patre kö la meköt.
8 Hnei nyidrëti hna thinge la gojenying hnei itra etë, nge thatreine kö ni elë hun;
Ase hë nyidrëti ajidrine la itre jëng.
9 Hnei nyidrëti hna una la lolo qaatheng
Me xometrije la korona qa ngöne la heng.
10 Nyidrëti a akeinyi ni qa ngöne la nöjei götran, uti hë la tro na mec;
Nge nyidrëti a fejetrije la mejiuneng tune la isinöe.
11 Kola palulu la elëhni i nyidrëti koi ni,
Nge nyidrëti a xom ceitu ni me ketre ithupëjia me nyidrë.
12 Kola traqa koi ni la itre trongene isi i nyidrë, me cil xötreithi ni,
Nge angatr a lapa xötreithe la itateng.
13 Hnei nyidrëti hna ananyine qaatheng la itre trejin me eni,
Nge hna nuetriji ni hnene la itre ka ce mel me eni.
14 Hna nuetriji ni hnene la itre sipu sineeng,*
Nge hna thëthëhmi ni hnene la itre ka ce mel me eni.
15 Nge ame la itre hnenge hna könën me itre hluenge jajiny
Ke angatr a xome ceitu ni me ketre atr hnei angatr hna thatre;
Kösë trenyiwa ni koi angatr.
16 Eni a hëne la hlueng, ngo tha sa kö angeic;
Nge eni a xëwe koi angeic troa utipi ni.
17 Pi hë la qëng qëmekene la föeng,
Nge punepune hë ni kowe la itre trejin* me eni.
18 Kolo fe a methinë ni hnene la itre nekönatr;
Ke ame la eni a mejë, angatr a qaqa ni.
19 Kola methinë ni hnene la itre sipu sineeng,
Nge ame la itre hnenge hna hnim, angatre pena ha a cile koi ni.
20 Kola fedre la itre ijuneng kowe la kupeineng me ijöneng,
Nge xönë hi tro na mec.
21 Utipi ni ju hnei epun, itre sineeng, amamane pi koi ni la utipine i epun,
Ke hna ketri ni hnene la ime i Akötresie.
22 Hnauëne laka, epuni pala hi a axösisi ni tune la aqane kuca i Akötresie?
Nge hnauëne laka, epuni pala hi a qanangazo ni?*
23 Ekölöhini maine hna cinyianyine ju la itre trengewekëng,
Nge maine hna fejane ju itre ej ngöne la ketre itus!
24 Nge maine hna sija ju memine la ketre peen fao,
Me wene plo hune la git uti hë epine palua!
25 Ke atre hi ni laka, mele kö la atre itöne la meleng;
Nge ame epin, tro hë nyidrëti a traqa me cil hune la ihnadro.*
26 Nge thupene la kola apatrene la kupeineng,
Tro ni a öhnyi Akötresie ngöne la ngönetreing celë,
27 Tro kö ni a sipu öhnyi nyidrë,
Tro la luemekeng a öhnyi nyidrë, ngo tha luemeke i ketre atre kö.
Ngo akötre catre la hning!*
28 Ke epuni a qaja ka hape: ‘Hnei nemen matre kola akötrë angeic?’
Nge eni pe la qaane la jole celë.
29 Ngo xouene ju la taua,
Ke ej a nyithupene la itre ngazo;
Nge loi e tro epuni a atre laka, hetre atre amekötin.”