Ieremia
49 Hane hi la hna qaja hnei Iehova göi angetre Amona:
“Hapeu, pëkö nekö i Isaraela trahmany?
Pëkö matra i angeic ka troa kepe edrö?
Hnauëne la Malekama* a thapa la nöje Gada?
Nge hnauëne la nöje i angeic a lapan la itre traon e Isaraela?”
2 “‘Celë hi matre,’ öni Iehova, ‘drenge ju!
Tro ha traqa la drai ne troa dreng la mejen ne isi* kowe la traone i angetre Amona, e Raba.
Tro hë ej a tra etë me pë atren,
Nge tro ha dreuthetrij la itre hunahmi ezin.’
‘Nge tro Isaraela a thapa la götran ne la itre ka thapa la götrane i angeic,’ öni Iehova.
3 ‘Treije jë Hesebona, ke ase hë lep apatrenyi Ai!
Sue jë epun, itre hunahmi ezi Raba.
Heetrëne jë la itre bëek ka tru thenyin.
Treije latresi jë nge tro jë nyipine la itre ihag etë,*
Ke tro ha kötre sai Malekama,
Me itre atre huuj me itre nekö i joxu i angeic.
4 Hnauëne la eö a sipu selë eö la eö a qaja la itre hnathup,
Memine la gaa papa i ö gaa hetre tim, jajiny ka mele thoi,
Eö ka mejiun kowe la itre mo i ö
Me hape: “Drei la ka atreine lepi ni?”’”
5 “‘Tro ni a axulun koi ö la ketre ewekë hna xouen,’ öni Iehova Joxu Ka Sisitria, joxu ne la itre trongene isi e hnengödrai,
‘Ketre ewekë hna troa kuca koi ö hnene la itre ka lapa xötreithi ö.
Tro ha aisaije epun ngöne la nöjei götran,
Nge pëkö ka troa acasin la itre ka kötr.’”
6 “‘Ngo thupene lai, tro ni a acasine la angetre Amona hna kötre fë,’ öni Iehova.”
7 Hane hi la hna qaja hnei Iehova joxu ne la itre trongene isi e hnengödrai, göi Edroma:
“Hapeu, pëhë inamacan e Temana?
Thatreine hë la itre ka inamacan hamë eamo ka loi?
Ngazo hë la inamacane i angatr?
8 Kötre jë! Tro hmaca jë!
Tro jë troa zae ngöne la itre gaa jui, epun itre atrene Dedana!
Ke tro ni a axulun la akötr koi Esau
E traqa ha la ijine tro ni a nyithupen koi angeic.
9 Hapeu e troa traqa koi ö la itre ka hu rezë,
Tha tro jë kö angatre lai a nue la itre xaa wen?
Nge maine troa traqa koi ö la itre atrekënö e jidr,
Tro hi angatre lai a xom la hnei angatr hna ajan.
10 Ngo ame kö ni, tro ni a kuca matre lapa xöe pi Esau.
Tro ni a amamane la itre hnë zae i angeic,
Matre thatreine kö angeic troa zae.
Tro ha humuth asë la itre nekö i angeic, me itre trejin me angeic, me itre ka lapa ezi angeic,
Nge tro hë angeic a patr.
11 Trotrije pi la itre nekö i ö hna mecitrij hnei kem,
Nge tro ni a thupë angatr,
Nge tro hë la itre sine föe i ö a mejiun koi ni.”
12 Ke hane hi la hna qaja hnei Iehova: “Dreng! Ame lo itre tha hna musinëne kö troa ije la ver, ke tro hë angatr a ij; matre eö pe kö a mekun troa kötrene la ihaji? Waea, tro kö a ameköti ö: tro ha musinë eö troa ij.”
13 “Ke hnenge hna sisiny göi ni kö,” öni Iehova, “laka, tro ha xouen la ka traqa koi Bozera, ketre götran hna hmahman me apatren, nge tro la itre atr a qeje angeic ngöne la kola ieji. Nge tro hë la nöjei traon ezin a nyi tra etë epine palua.”
14 Drenge hë ni la ketre maca qaathei Iehova,
Hna upe kowe la itre nöj la ketre atre tro fë maca matre hape:
“Icasikeu jë nge trohemi troa lepi angeic;
Hnëkë jë troa isi.”
15 “Eje hi, goeën! Ase hë ni thaipië eö nyipine la itre nöj,
Me ahmahmanyi ö nyipine la itre atr.
16 Pine laka eö la hna xouen,
Matre hna amenu eö hnene la hni i ö ka pi tru,
Eö ka lapane la itre gaa kaqa ne git,
Ka lapa hune la sasala ka draië catre kö.
Ngacama tro eö a tun la aeto me amë la trengene waco i ö ngöne la gaa draië,
Ngo tro kö ni a autinyi ö qa lai,” öni Iehova.
17 “Tro ha xouen la ka traqa koi Edroma. Tro asë hi la itre ka tro ezi angeic a sesëkötre ngazo me qej, pine la itre akötr ka traqa koi angeic. 18 Tro ha tune lo ijine kola apatrenyi Sodroma me Gomora memine la itre traon ezin: pë hmaca kö ka troa lapa e cili me xupi uma,” öni Iehova.
19 “Dreng! Tro ha traqa la ketre atr ka troa lep la itre hlapa gaa tingeting, tune la liona ka sepë qa ngöne la itre hnitr ka cia ezin la hneopegejë Ioridrano. Ngo aca tro hi ni a kuca, matre tro angatr* a kötrene la nöje i angatr. Nge tro ni a acile hui angeic lo atre hna iën. Ke drei la ka ceitu me eni, nge ka thele isi me eni? Drei la atre thupë mamoe ka atreine cile koi ni? 20 Celë hi matre, drenge ju la hna axeciën* hnei Iehova göi Edroma, me itre mekuna i nyidrë göi angetre Temana:
Eje hi, tro ha hul a tro gaa nany la hnënge öni ka co.
Tro nyidrëti a apatrene la itre hnë axö öni, pi angatr.
21 Hna enienije la ihnadro, pine la meje i angatr la angatr a kei.
Kola isueny!
Nge goi drenge fe uti hë la Hnagejë Ka Palulu.
22 Dreng! Tune la aeto ka sesë me uti kowe la ihnadro,
Tro la ithupëjia a saath la lue iape i angeic hui Bozera.
Ngöne la drai cili, tro la itre soc ne Edroma
A hnehengazo tune la föe la angeic a hnaho.”
23 Maca koi Damaseko:
“Hmahma ha Hamath me Arepada,
Ke drenge hë nyidro la ketre maca ka ngazo.
Nyidroti a xou me kucakuca.
Kola enienije* la hnagejë nge thatreine kö troa aupun.
24 Pëhë trengecatre i Damaseko.
Hnei angeic hna ujë troa kötr, ngo xou i angeice ju hi.
Hnei angeic hna hnehengazo me akötr,
Tune la föe la angeic a hnaho.
25 Hnauëne laka, tha hna kötrene kö la traone ka mingöming,
Lo traon ka lolo hna eköhagen?
26 Ke tro la itre nekö trahmany i angeic a kei ngöne la itre gaa tru atr ne la traon,
Nge tro ha meci asë la itre soc ngöne la drai cili,” öni Iehova joxu ne la itre trongene isi e hnengödrai.
27 “Tro ni a dreuthetrije la ihag ne Damaseko,
Nge tro ha manithe la itre ita ne thup hna eköhagen e Benadada.”
28 Hane hi la hna qaja hnei Iehova göi Kedara, memine la itre baselaia i Hazora, lo hnei Nebukaneza* joxu ne Babulona hna thapa:
“Cile jë! Elë jë a tro Kedara,
Nge humuthe pi la itre nekön ne Koië.
29 Thapa pi la itre itat me itre öni i angatr,
Memine la itre maano ka heetrën la itre itat i angatr me itre ewekë i angatr asë.
Xome jë fe la itre kamela i angatr,
Tro la itre atr a sue koi angatr ka hape: ‘Ase hë haöth asë hnei xou!’”
30 “Kötre jë, kötre jë a tro gaa nany!
Tro jë zae ngöne la itre gaa jui, epun itre atren ne Hazora,” öni Iehova.
“Ke hnei Nebukaneza* joxu ne Babulona hna hnëkën la ketre itheth,
Hnei angeic hna hnëkën la ketre aqane troa lepi epun.”
31 “Mejë jë! Tro jë troa lepe la nöj ka mele tingeting,
Nge pëkö hna xouen!” öni Iehova.
“Pëkö qëhnelön me nyine acatren ej; angatr a lapa cas.
32 Tro ha thapa la itre kamela i angatr,
Nge tro ha xome la itre öni i angatr ka nyimutre.
Ame la itre ka cin la lue hnaqathë i angatr,
Ke tro ni a aisaije angatr ngöne la nöjei götran,
Me axulune koi angatr la akötr qa ngöne la nöjei götran,” öni Iehova.
33 “Tro Hazora a nyi hnë lapa ne la itre kuli wael,
Ketre götran hna apatrene paluan.
Pë hmaca kö ka troa lapa e cili,
Me xupi uma.”
34 Hane hi la hna qaja hnei Iehova koi Ieremia perofeta göi Elama, ngöne la kola nyiqane musi hnei Zedekia joxu ne Iudra: 35 “Hane hi la hna qaja hnei Iehova joxu ne la itre trongene isi e hnengödrai: ‘Tro ni a hutra la tane pehna i Elama, lo ka hamë* trengecatre i angatr. 36 Tro ni a axulune koi Elama la 4 lao enyi qa ngöne la 4 lao götran ne la hnengödrai, nge tro ni a aisaijene la itre atren ej kowe la itre enyi cili. Eje hi, tro ha aisaijen la itre ka lapa e Elama ngöne la nöjei nöj asë.’”
37 “Tro ni a axouene la angetre Elama qëmekene la itre ithupëjia me angatr, me qëmekene la itre ka thele troa humuthi angatr. Nge tro ni a axulune koi angatr la akötr, ene la trengehning,” öni Iehova. “Eje hi, tro ni a upe la taua troa weji angatr uti hë la tro ni a lep apatrenyi angatr asë.”
38 “Tro ni a acile la theroneng e Elama me apatrene la joxu me itre nekö i joxu ne Elama,” öni Iehova.
39 “Ngo tro ni acasine la itre hna kötre fë qa Elama ngöne la itre drai ne la pun,” öni Iehova.