Iobu

 2 “Hapeu, tro kö la atr ka inamacan a sa hnene la itre trengewekë ka pë alien,*

Maine atiqane la hni angeic hnene la enyi qa koië?

 3 Ka gufa la troa amekötin hnene la itre trengewekë,

Nge ka pë thangane la troa cainöje hmekuj.

 4 Ke zö i nyipë la kola tha xoue Akötresie,

Nge nyipëti a sawa la itre atr troa meku Akötresie.

 5 Ke që i nyipëti a qaja amamane la itre thiina ka ngazo i nyipë,*

Nge nyipëti a iëne la ketre aqane ithanata ka iaö.

 6 Kolo kö a sipu qajangazo nyipë hnene la që i nyipë, ngo tha hnenge kö;

Nge ukeineqë i nyipëti kö la ka qajaqaja la itre thiina i nyipë.

 7 Nge hapeu, nyipëti kö la atr hna pane hnahon?

Hna pane hnaho nyipëti kö, nge pine pë hë la itre sasala?

 8 Nge hapeu, nyipëti kö a dreng la itre trengewekë i Akötresie ka sihngödr,

Me sipu mekune ka hape, ka inamacane nyipë?

10 Ke, ce eahuni memine la itre qatr me itre iqia,

Nge qatre catre kö angatr hune la keme i nyipë.

11 Hapeu, tha ijije kö la itre nyine iakeukawany qaathei Akötresie,

Lo itre trengewekë hna qaja koi nyipë cememine la menyik?

12 Hnauëne la kola elë la trengehni nyipë?

Nge hnauëne laka, luemeke i nyipë a wesitrameny?

13 Ke nyipëti a elëhni koi Akötresie,

Me axulune qa ngöne la që i nyipë la itre trengewekë ka catr.

14 Ka ue la atr matre tro angeic a wië,

Nge drei la hna hnahon hnei föe nge ka meköt?

15 Goeën! Tha Akötresieti kö a mejiun kowe la itre angela i nyidrë ka hmitrötr,

Nge ame fe la hnengödrai, tha ka wië kö koi nyidrë.

16 Matre nemene la nyine troa qaja göne la atr hna xele ma wang nge ka huliwa thoi,

Memine la atr ka ij kösë tim, la ewekë ka tha meköti kö?

Tro ni a qaja koi nyipë la hnenge hna öhn,

18 Lo hna qaja amaman hnene la itre ka inamacan,

Göne la itre keme i angatr, lo itre ewekë hna juetrën ekö.

19 Hna hamëne la nöj koi angatr hmekuje hi,

Nge pëkö trenyiwa ka tro nyipi angatr.

20 Nge kola axösisin e nöjei drai la atre ka ngazo,

Ngöne la itre macatre hna nu thatraqane la ka iakötrë.

21 Nge eje ngöne la lue hnangenyë i angeic la itre mejen hna xouen;

Nge ame ngöne la ijine tingeting, kola lepi angeic hnene la itre atrekënö.

22 Nge tha mekune kö angeic laka, tro angeic a trian la melöhlem;

Ke kola treqe angeic hnene la taua.

24 Angeic a xouene la hleuhleu me akötr;

Nge ej a akucakucanyi angeic tune la ketre joxu ka tro troa isi.

25 Matre angeic a xejë la ime i angeic koi Akötresie

Me thele isi* memine la Ka Tru Trenge Men;

26 Ka pi hun angeic, matre angeic a sesë hui nyidrë,

Memine la petre i angeic ka catr me hmekön;*

27 Nge pi tru hë angeic,

Matre angeice ha kökötr hnene la itre mo i angeic;

28 Qa ngöne lai, angeic a lapane la itre traon ka troa patr,

Me itre uma ka troa pë atren,

Nge ka tro pë hë a nyi itra etë.

29 Matre tha tro kö angeic a trenamo, me tru hnei mo,

Nge tha tro kö a haöthe la fen hnene la itre ewekë i angeic.

30 Nge tha tro kö a trianyi angeic hnene la melöhlem;

Ke tro ha fitr la zine i angeic hnene la ukahlokine eë,*

Nge tro ha apinyi angeic hnene la hnamano ne la ukeineqë i Akötresie.*

31 Haawe, the tro kö angeic a jea me mejiun kowe la itre ewekë ka pë alien,

Wanga tro angeic a kapa la itre ewekë ka pë thangan;

32 Nge tro lai a canga traqa koi angeic,

Nge tha tro kö a eng la itre picine i angeic.

33 Tro hë angeic a tune la ivin ka amalane la itre wene vine* ka ija,

Me tune la elaio* ka amalane la itre iengen ej.

34 Ke tro ha patr la lapa ne la itre atr ka pë metrötr* koi Akötresie,

Nge tro ha dreuthetrij la itre itat hna nyialien hnene la mani hna hamën juetrën.

35 Angatr a upunene la akötr me hnahone la ngazo,

Nge itre hni angatr a hnahone la iaö.”