Iobu
22 Ame hnei Elifaza atre Temana hna sa ka hape:
2 “Hapeu, ka nyipiewekë kö la atr koi Akötresie?
Nge ka nyipiewekë kö la atre ka inamacan koi nyidrë?
3 Hapeu, nyipiewekë kö* kowe la Ka Tru Trenge Men laka, ka meköti nyipë?
Nge hapeu, hetre ewekë kö hnei nyidrëti hna kapa qa ngöne la hnei nyipëti hna mele nyipici?
4 Tro kö nyidrëti a ahnëjinë nyipë me ameköti nyipë
Ke nyipëti a nyihlue i nyidrë?
5 Tha hnene kö laka, atraqatre la itre ngazo i nyipë
Nge pëkö pune la itre menu i nyipë?
6 Ke hnei nyipëti hna xom qaathene la itre trejin me nyipë la hatren ne ti gufa nge pëkö nyipi kepin,
Nge hnei nyipëti hna una la itre iheetr ne la itre atr matre xöe pi angatr.*
7 Tha nyipëti kö a thue imene la atre ka kucakuca,
Nge nyipëti a cipane la xen kowe la ka mecijiin.
8 Ame la nöj, ke thatraqane la atre ka catr,
Nge kola lapan ej hnene la atr hna wangatrun.
9 Ngo hnei nyipëti pe hna upe hmaca la itre sine föe nge pëkö hnei angatre hna xom,
Nge hnei nyipëti hna waja trane la ime ne la itre nekön hna mecitrij hnei kem.
10 Qa ngöne lai, hna kanothi nyipë hnene la itre hnö,*
Nge kola asesëkötrë nyipë hnene la itre ewekë hna xouen;
11 Celë hi matre kola melöhlem matre tha öhne hë nyipë,
Nge kola heti nyipë hnene la gejë atraqatr.
12 Ngo hapeu, tha Akötresieti kö ngöne la gaa draië ne la hnengödrai?
Nge ketre, pane goeëne jë la itre wëtresij, itre ej e koho qa.
13 Ngo hnei nyipëti hna qaja ka hape: ‘Nemene la hna atre hnei Akötresie?
Atreine kö nyidrëti amekötin hnine la melöhlem?
14 Hetre iaw ka thungi nyidrë matre tha öhne kö nyidrë
La nyidrëti a tro hune la hnengödrai.’
15 Hapeu, tro kö nyipëti a xötrethenge la gojeny ne la itre xötrapan ekö
Lo hna trongën hnene la itre atre ka ngazo,
16 Lo itre atr hna xome ngo tha drai angatre pala kö,*
Lo itre hna thapa tune la ketre uma hna hul hnene la di atraqatr?*
17 Hnei angatre hna qaja kowe la nyipi Akötresie ka hape: ‘Nue huni pi!’
Nge ‘tro la Ka Tru Trenge Men a kuci nemene koi hun?’
18 Ngo nyidrëti pe la ka nyialiene la itre uma i angatr hnene la itre ewekë ka lolo.
(Ka iananyi catr me eni la aqane mekun ka ngazo cili.)
19 Tro la atr ka meköt a öhne lai me madrin,
Nge tro la atre ka pë ethan a hnyimasai angatr me hape:
20 ‘Hna apatrene la itre ithupëjia me hun,
Nge tro ha dreuthetrije la itre ka lapa pe.’
21 Haawe, imajemikeu jë me nyidrë, nge tro hë nyipëti a tingeting;
Nge tro hë nyipëti a kapa la itre ewekë ka lolo.
22 Kapa ju la wathebo qa ngöne la ukeineqë i nyidrë,
Nge amë ju la itre trengewekë i nyidrë e kuhu hni nyipë.
23 Nge maine tro nyipëti a bëeke hmaca kowe la Ka Tru Trenge Men, tro hmaca ha nyipëti a loi;
Nge maine tro nyipëti a xometrije la ewekë ka tha meköti kö qa ngöne la itate i nyipë,
24 Me hnatrije la goole i nyipë ngöne la xaxau
Memine la gool ne Ofira ngöne la itre gaa kaqa* ne la itre git,
25 Tro hë la Ka Tru Trenge Men a nyi gool thatraqai nyipë,
Nge tro hë nyidrëti a nyi sileva ka tru thupene koi nyipë.
26 Tro hë nyipëti a öhne la nyipi madrin thene la Ka Tru Trenge Men,
Nge tro hë nyipëti a gala draië koi Akötresie.
27 Tro hë nyipëti a xëwe koi nyidrë, nge tro hë nyidrëti a dreng;
Nge tro hë nyipëti a eatrën la hnei nyipëti hna sisiny.
28 Ame la nöjei mekun hnei nyipëti hna troa axeciën, ke tro ha eatrën,
Nge tro hë la lai a hudrum ngöne la gojenyi nyipë.
29 Ke maine tro nyipëti a ithanata cememine la pi tru, tro ha thaipië nyipë,
Ngo tro kö nyidrëti a amelene la itre ka ipië.*
30 Tro nyidrëti a amelene la itre atr ka pë ethan;
Nge maine ka wië la lue ime i nyipë, haawe, tro ha amele nyipë.”