Itre Edromë
7 Neköng, drengethenge ju la itre trengewekëng,
Nge thupëne hnyawa ju la itre hnenge hna amekötin.
2 Drengethenge ju la itre hnenge hna amekötin matre mele jë ö;
Loi e troa tru koi ö la itre ining* tune la wene dremun alameke i ö.
3 Hnöthe ju itre eje ngöne la itre hene wanakoime i ö;
Cinyanyine ju itre eje ngöne la hni i ö.
4 Qaja jë kowe la inamacan ka hape, “Xang eö,”
Nge hëne jë la trotrohnine ka hape, “Sine la madrang eö,”
6 Ngöne la mamalama ne la umang,
Hnenge hna tu qa ngöne la gaa lailai,
7 Nge ame la eni a goeën thene la itre atr ka thatre koilo,
Hnenge hna öhne thene la itre nekö trahmany, la ketre ka pë wangatrehmekun.*
8 Hnei angeic hna tro easenyine la hna ijejea ne la föe cili,
Me tro kowe la uma i eahlo
9 Hmekune la kola meköle la jö, e hejihej,
Ngöne hë la kola jidri me mit.
10 Thupene lai, hnenge hna öhne la föe a tro troa ixelë me angeic,
Ka heetr tune la föe ne gojeny, nge ka iaö la hni.
11 Ketre föe ka nyi mejen nge ka wesiwes.
Ka tha hane kö lapa hnalapa.*
12 Ase jë hi eahlo cil e kuhu trön, matre cile jë pena ngöne la gaa tru atr,
Pëkö hna ijejea ka gufa.
13 Ame hnei eahlo hna ee angeic me baa angeic;
Tha hmahma kö eahlo troa qaja koi angeic ka hape:
14 “Eni lo a tro fë huuj ne tingeting.*
Enehila, ase hë ni eatrëne la itre hnenge hna sisiny.
15 Celë hi matre eni a traqa troa itronyi me eö,
Matre troa thele eö, nge öhnyi ö hë ni!
16 Hnenge hna sathe la itre balaiketr ka mingöming hune la iling,
Kolo lino ka hetre han qa Aigupito.
17 Hnenge hna thathane la iling hnei muro,* me aloes, me kanel.
18 Trohemi matre ihnimi jë so uti hë e hmakany;
Ce tupathe jë so la ihnim ka iahmo,
19 Ke patre kö la föeng ngöne la hnalapa;
Nyidrëti hë e koilo gaa nany.
20 Ase hë nyidrëti xometrongëne la trenge mani,
Nge tha tro kö nyidrëti a bëek uti hë la kola dreumatreu.”
21 Eahlo a amenu angeic hnene la itre trengewekë ka akeine la hni i angeic.
Eahlo a ahmalane la hni i angeic hnene la itre trengewekë ka iaö.
22 Ame hnei angeic hna xötrethenge eahlo, tune la kau hna troa humuth,
Tune la atr ka hmo hna tro fë kowe la inehe ne iaxösisi,*
23 Uti hë la kola jaqa la idre i angeic hnene la ketre ane pehna;
Tune la waco ka sesë meköt kowe la theth, thatre kö angeic ka hape, tro ha luz la mele i angeic.
24 Nge enehila neköng,* drei ni ju;
Hnangenyëne hnyawa ju la hnenge hna qaja.
25 The nue kö la hni i ö troa jea kowe la itre jë i eahlo.
The trongëne kö la itre hmene gojeny i eahlo,
26 Ke ala nyimu la hnei eahlo hna lepe humuth,
Nge tru la hnei eahlo hna humuth.
27 Uma i eahlo la jë ne tro kowe la Hua;*
Ej a lö kowe la itre hnahag ka mit ne la mec.