Pane Tus Samuela
13 Saulo a ...* lao macatre lo kola acili angeic troa joxu e Isaraela. Nge thupene la lue macatre ne mus, 2 hnei angeic hna iëne la 3 000 lao trahmany nyipine la angetre Isaraela. Ala 2 000 la ka troa ce me angeic e Mikemas, me ngöne la itre wetr e Bethela. Nge ala 1 000 la ka troa ce me Ionathana e Gibea e Beniamina. Thupene lai, angeic a upe pi la itre xa soc troa bëeke kowe la itre itate i angatr. 3 E thupen, hnei Ionathana hna lepe la itre soce i angetre Filisiti e Geba. Nge drei mejene ju hi hnei itre xa angetre Filisiti. Matre Saulo a upe jë troa ufi trutru ngöne la nöj asë, ke öni angeic: “Loi e troa atre hnei angetre Heberu!” 4 Nge dreng asë hi angetre Isaraela, matre öni angatr: “Ase hë Saulo ngaane la itre soce i angetre Filisiti, matre enehila, methi angatre Filisiti hë la nöje Isaraela.” Thupene lai, hnene la itre ka tro fë maca, hna hëne la nöj troa xötrethenge Saulo a tro Gilegala.
5 Hnene fe la angetre Filisiti hna ce uti troa isi me Isaraela. Nge traqa ju hi angatr me 30 000 lao ikatr, me 6 000 lae ka ti hos, me itre soc, kösë wene ngöni ne hnagejë. Angatr a acile jë la hna lapa i angatr e Mikemas, götrane koië ne Beth-Aven. 6 Haawe, trotrohnine ju hi angetre Isaraela laka, jole hë angatr hnei itre ithupëjia. Qa ngöne lai, hnene la nöj hna zae ngöne la itre ngönemenyi, me itre hnaop, me hnine git, me hnine kav, me hnine sima. 7 Nge hetre itre xa angetre Heberu ka sasaithe la hneopegejë Ioridrano, me kötr a tro Gada me Gileada. Ngo Saulo pala kö e Gilegala, nge kola meci hnei xou la itre ka ce me Saulo. 8 Hnei angeic hna treqe Samuela koi 7 lao drai, tune lo aqane qaja i Samuela. Ngo tha traqa pala kö Samuela e Gilegala, matre kola nyiqaane isa ije la nöj. 9 Nge öni Saulo jë hi: “Awe jë pe la itre öni nyine huuj ne dreuth asë, me itre öni nyine huuj ne tingeting.” Nge angeic a huujëne jë la huuj ne dreuth asë.
10 Ngo ame ju hi la angeic a ase tro fë la huuj ne dreuth asë, fetra pi hi Samuela. Matre Saulo a canga tro ju troa ibozu me nyidrë. 11 Öni Samuela jë hi: “Nemene la hnei eö hna kuca?” Sa jë hi Saulo ka hape: “Eni ha goeëne laka, kola nue ni hnene la nöj, nge tha traqa kö nyipë ngöne lo drai hna sa, nge ketre, kola ha ce uti la angetre Filisiti e Mikemas. 12 Matre öning, ka tro hë la angetre Filisiti a uti troa isi me eni e Gilegala, nge tha thele ixatua pala kö ni thei Iehova. Celë hi ka upi ni troa huujëne la huuj ne dreuth asë.”
13 Ngo öni Samuela koi Saulo: “Ka hmo la aqane ujë i eö, tha trongëne kö eö la hna amekötin hnei Iehova Akötresi eö. Ke maine trongëne ju eö, tro Iehova lai a kuca matre tro pala hi a mus la itre matra i eö. 14 Ngo enehila, tro ha patre la musi eö, nge tro Iehova a thele la ketre atre ka kuca la aja i nyidrë. Nge tro Iehova a xomi angeic troa joxu ne la nöje i nyidrë. Tro lai a traqa, pine eö tha trongëne la wathebo i Iehova.”
15 Thupene lai, Samuela a tro ju qa Gilegala a tro Gibea e Beniamina. Nge Saulo a e jë la itre atrene la nöj, lo itre trahmanyi ka lapa pe me angeic, traqa koi 600 la etrun. 16 Matre ame Saulo me Ionathana nekö i angeic, me itre atrene la nöj ka ce me nyidro, angatr a ce mel e Geba e Beniamina. Nge ame la angetre Filisiti, hnei angatr hna acile la hna lapa ne la itre soc e Mikemas. 17 Nge hnene la köni gurup ne soc ka catr i angetre Filisiti, hna majemine tro qa ngöne la lapa i angatr. Matre ca gurup ka xötrëne la gojenyi ne tro Ofera e Sual, 18 nge ketre a xötrëne la gojenyi ne tro Bethe-Horona. Nge ame la hnaakönin, ej a tro ngöne la gojenyi ka troxomi angatr kowe la ifego, hune la hnathup ne Zeboim, hmekune la hnapapa.
19 Ngöne la ijine cili, pëkö ala casi ka huliwa fao e Isaraela, ke öni angetre Filisiti: “Tha tro pi kö angetre Heberu a kuci taua me jo.” 20 Haawe, e aja i angetre Isaraela troa xöle la nyine uja dro i angatr, maine ithil, maine ze, maine fosil, tro la nöjei atre Isaraela a sipone koi angetre Filisiti. 21 Angatr a nyithupene la ca pim,* e aja i angatr troa xöle la ca nyine uja dro, maine ca ze, maine ca ithil, maine ca rato ka köni meken, maine usis. 22 Celë hi matre, pëkö ala cas thene lo itre ka ce tro me Saulo me Ionathana nekö i angeic, ka trene taua me jo troa isi, ngo nyidroti hi.
23 Nge hnene la ketre sin* ne la trongene isi i angetre Filisiti hna cil e Mikemas, hmekune la hnathup.