Ezera

8 Nge hane hi la ëjene la itre tixe ne lapa, me itre ëjene la itre trahmanyi ka ce tro me eni qa Babulona, thenge la itre fami angatr, hmekune la kola mus hnei Aretaseta joxu: 2 Thene la itre nekö* i Fineasa, Geresoma; thene la itre nekö i Ithamara, Daniela; thene la itre nekö i Dravita, Hatusa; 3 Thene la itre nekö i Sekania, thene la itre nekö i Paros, Zakaria, nge ce angeic me 150 lao trahmanyi hna siji ëjen ngöne la itusi ne la itre xötr atr. 4 Thene la itre nekö i Pahatha-moaba, Elioenai nekö i Zeraia, nge ce angeic me 200 lao trahmany. 5 Thene la itre nekö i Zatu, Sekania, nekö i Iaziela, nge ce angeic me 300 lao trahmany. 6 Thene la itre nekö i Adin, Ebed nekö i Ionathana, nge ce angeic me 50 lao trahmany. 7 Thene la itre nekö i Elama, Isaia, nekö i Athalia, nge ce angeice me 70 lao trahmany. 8 Thene la itre nekö i Sefata, Zebadia nekö i Mikaela, nge ce angeice me 80 lao trahmany. 9 Thene la itre nekö i Ioaba, Obadia nekö i Iehiela, nge ce angeic me 218 lao trahmany. 10 Thene la itre nekö i Bani, Selomith nekö i Iosefia, nge ce angeic me 160 lao trahmany. 11 Thene la itre nekö i Bebai, Zakaria nekö i Bebai, nge ce angeic me 28 lao trahmany. 12 Thene la itre nekö i Azegada, Iohanana nekö i Hakatan, nge ce angeic me 110 lao trahmany. 13 Thene la itre nekö i Adonikama, hane hi la itre ëjene la itre ka tro pi: Elifelet, me Ieiela, me Semai, nge ce angatr me 60 lao trahmany. 14 Thene la itre nekö i Bigevai, Uthai me Zabud, nge ce angatr me 70 lao trahmany.

15 Hnenge hna acasi angatr ezine la hneopegejë ka uti a tro Ahava. Nge hne huni hna lapa e cili koi 3 lao drai. Ngo ame ju hi la eni a waipengöne la nöj me itre atre huuj, pëkö atre Levi hnenge hna öhn. 16 Matre hnenge hna hë Eliezera, me Ariela, me Semaia, me Elenathana, me Iarib, me Elenathana, me Nathana, me Zakaria, me Mesulama, itre atre ka tru, me Ioiarib me Elenathana lue ka hamë ini. 17 Thupene lai, hnenge hna upi angatr troa thei Ido, ketre tane la götrane hna hëne ka hape, Kasifia. Hnenge hna upi angatr troa qaja koi Ido me itre trejin me angeic, itre hlue ne la uma ne hmi ka lapa e Kasifia, troa traqa fë koi hun la itre ka ixatua* thatraqane la uma ne hmi ne la Akötresi hun. 18 Nge pine laka, thei eahuni la ime ka lolo ne la Akötresi hun, hnei angatr hna traqa fë la ketre atre ka inamacan qaathene la itre nekö i Maheli, api Levi, nekö i Isaraela ene Serebia, me itre nekö i angeic trahmany, me itre trejin me angeic, ala 18. 19 Nge hnei angatre fe hna traqa sai Hasabia, ce angeic me Isaia nekö i Merari, me itre trejin me angeic, me itre nekö i angeic trahmany, ala 20. 20 Nge thene la itre hlu* ne la uma ne hmi, lo hna acil hnei Dravita me itre he ne nöj göi troa xatuane la angetre Levi, ala 220 lao trahmany hna isa qeje ëjen.

21 Ame hnenge hna iupi troa tha xen e cili, ezine la hneopegejë Ahava, matre tro huni a ipië qëmekene la Akötresi hun, me sipo nyidrë troa xometrongë hun, matre tro loi la tronge hun, eahun, me itre nekö hun, me itre ewekë hun. 22 Ngo eni a hmahma troa sipone la itre sooc kowe la joxu, me itre ka ti hos matre thupë huni qaathene la itre ithupëjia ngöne la gojeny. Ke ase hë huni lo qaja kowe la joxu ka hape: “Tro la Akötresi huni ka lolo a ce* me itre ka thele nyidrë. Ngo tro la men me elëhni nyidrë a cil kowe la itre ka trotriji nyidrë.” 23 Celë hi matre hne huni hna tha xen, me sipon kowe la Akötresi hun troa iujine la tronge hun, nge hnei nyidrë hna drenge la xëwe hun.

24 Thupene lai, hnenge hna iëne la 12 lao trahmany qaathene la itre tan la itre atre huuj, ene, Serebia, me Hasabia, me 10 lao trejin me nyidro. 25 Nge hnenge hna tuluthe la sileva, me gool me itre ewekë, itre hna hamën hnei joxu me itre atresi nyidrë, me itre he ne nöj, me angetre Isaraela e celë, itre ewekë hna hamën kowe la uma ne hmi ne la Akötresi hun, nge hnenge pë hë hna ahnith asë koi angatr. 26 Hane hi la hnenge hna tuluth me ahnith kowe la ala 12: 650 lao talane* sileva, me 100 lao ewekë sileva ka elë koi 2 talan, me 100 lao talane gool, 27 me 20 lao neköi kape gool ka elë koi 1000 dareki,* me lue ewekë hna kuca hnei nyipi kopa ka madra nge ka melemel kösë gool.

28 Thupene lai, öninge koi angatr: “Ka hmitrötr epuni koi Iehova, nge ka hmitrötre fe la itre ewekë celë, nge ame la sileva me gool, itre ahnahna lai koi Iehova Akötresi ne la itre qaaqaa i epun. 29 Thupëne hnyawa kö uti hë la epuni a ase tuluth qëmekene la itre tane la itre atre huuj, me itre tane i angetre Levi, me qëmekene la itre tixe ne lapa ne Isaraela e Ierusalema, hnine la itre hnahag* ne la uma i Iehova.” 30 Ame hnene la itre atre huuj me angetre Levi hna xome la sileva, me gool, me itre ewekë hna tuluth me hna ahnithe koi angatr, matre tro fë a tro Ierusalema, ngöne la uma ne hmi ne la Akötresi hun.

31 Nge ngöne la hna 12 ne drai ne la pane treu, hne huni hna mejë qa ngöne la Ahava a tro Ierusalema. Nge ce* eahuni memine la Akötresi hun, hnei nyidrëti hna amele hun qaathene la itre ithupëjia me eahun, me itre ka tra thethi hun e kuhu gojeny. 32 Nge hne huni hna traqa e Ierusalema, me lapa e cili koi köni drai, 33 nge ngöne la hna 4 ne drai, hne huni hna tuluthe la sileva me gool, me itre ewekë hnine la uma ne hmi ne la Akötresi hun, nge hne huni hna hamë Meremoth nekö i Uria atre huuj, lo ka ce me Eleazara nekö i Fineasa. Nge ce angatr me angetre Levi, Iozabada nekö i Iesua, me Noadia nekö i Binui. 34 Hna e me tuluth asë, nge hna fejane fe la itre ehacen. 35 Nge ame la itre ka bëeke qa ngöne la nöje trenyiwa, hnei angatr hna tro fë huuj ne dreuth asë kowe la Akötresi Isaraela: 12 lao kau koi Isaraela asë, me 96 lao mamoe trahmany, me 77 lao neköi mamoe, nge ame kowe la itre huuj ne ngazo, 12 lao nani trahmany. Hna huujën asë nyine huuj ne dreuth asë thatraqai Iehova.

36 Thupene lai, hne huni hna hamëne la itre tusi hna amekötin qaathei joxu, kowe la itre satarap* i joxu, me itre gavena Tröne La Hneopegejë. Matre hnei angatr hna xatuane la nöj, me hamë ahnahna thatraqane la uma ne hmi ne la nyipi Akötresie.