Isaia
20 Ame lo macatre ne Saregon joxu ne Asuria a upe la Taretana* e Asedoda, hnei angeice hna isi me thapa la nöje Asedoda. 2 Ngöne la ijine cili, hnei Iehova hna ithanata jëne Isaia nekö i Amoza, me hape: “Tro jë, senge pi la ibëek ka tru thenyin qa ngöne la gö i ö, nge unatrije pi la lue ibutre i ö.” Celë hi la hnei angeice hna kuca, hnei angeic hna tro xöe* me pë ibutr.
3 Thupene lai, öni Iehova: “Hnei Isaia hlueng hna tro xöe me pë ibutr koi köni macatre, matre nyine hatren me hmekë Aigupito me Aithiope. 4 Ketre tun, tro la joxu ne Asuria a kötre fë la angetre Aigupito me Aithiope hna akalabusin, ene la itre nekö trahmany, me itre qatr ka tro xöe me pë ibutr, itre hna amamane la hutrö, matre hmahma* pi la angetre Aigupito. 5 Nge tro hë angatr a xou me hmahma göi Aithiope, lo hnei angatre hna mejiun kow, me göi Aigupito, lo hnei angatre hna selën.* 6 Tro hë la itre atr ka lapa ngöne gejë a qaja ka hape: ‘Goeëne la nöj hne huni hna mejiune me kötre kow, matre amele hun qaathene la joxu ne Asuria! Tro pë hë huni la a tune kaa enehila?’”