Isaia
39 Ngöne la ijine cili, hnei Merodaka-Baladana nekö i Baladana, joxu ne Babulona, hna iupi fë tus me ahnahna koi Hezekia. Ke drenge hë angeic laka, hna pane wezipo hnei Hezekia nge loi hmaca ha nyidrë. 2 Ame hnei Hezekia hna kapa madrine la itre ka tro fë maca, me amamane koi angatr la hna ami mo i nyidrë, ene la sileva, me gool, memine la oel ne göti, me ketre oel ka tru thupen, me itre jia ne isi i nyidrë, me nöjei ewekë hnine la itre hnahag ne trengamo. Hnei Hezekia hna amaman asë koi angatr la aliene la uma i nyidrë, me itre ewekë ngöne la baselaia i nyidrë.
3 Thupene lai, hnei Isaia perofeta hna tro troa wai Hezekia me qaja koi nyidrë ka hape: “Nemene la hna qaja hnene la itre trahmany? Nge angatr a traqa qa kaa?” Ame hnei Hezekia hna sa ka hape: “Angatr a traqa qa ngöne la ketre nöje gaa nany ne Babulona.” 4 Matre öni Isaia: “Nemene la hnei angatr hna goeën hnine la uma i nyipë?” Ame hna sa hnei Hezekia ka hape: “Hnei angatr hna goeën asë la itre aliene la umang. Nge hnenge hna amaman asë koi angatr la aliene la itre hnahag ne trengamo.”
5 Ame hnei Isaia hna qaja koi Hezekia ka hape: “Drenge ju la hnei Iehova joxu ne la itre trongene isi e hnengödrai hna qaja koi nyipë: 6 ‘Tro ha traqa la ketre drai nge tro ha xom asë a tro Babulona la nöjei ewekë ngöne la uma i ö, memine la itre ewekë hna xawan hnene la itre qaaqaa i ö uti hë la drai ce. Pëkö ca ewekë ka troa lapa,’ öni Iehova. 7 ‘Nge tro ha xolouth me kötre fë la itre matra i ö. Tro angatr a huliwa hnine la hnalapa ne la joxu ne Babulona.’”
8 Ame hnei Hezekia hna sa koi Isaia ka hape: “Ka loi la hnei Iehova hna upi ö troa qaja.” Nge öni Hezekia hmaca ka hape: “Ke tro ha tingetinge la nöjeng, me mele ka loi* ngöne la itre drai ne mele ni.”*