Isaia
24 Goeën! Iehova a apë aliene la nöj,* matre hnapapa pë hë.
Nyidrëti a qene ipiën ej me aisaijene la itre ka lapan.
2 Casi hi la pun koi angatr asë:
Kowe la trahmany ne la nöj me kowe la atre huuj,
Kowe la hlu me maseta i angeic,
Kowe la hlue föe me föe ka musinë angeic,
Kowe la atre itö me atre salem,
Kowe la atre hamë mani me atre kepe mani,
Kowe la atre hamë gufa me atre ti gufa.
3 Tro ha pë alien la nöj;
Tro ha thapa asë la itre mo e cili,
Ke ase hë Iehova qaja lai.
4 Kola hnëmec* la nöj, nge ej a fitr.
Kola qaqacil la ihnadro, nge ej a mec.
Kola kucakuca la itre trene mus ne la nöj.
5 Ase hë angazone la nöj hnene la itre atren,
Ke hnei angatr hna sasaithe la itre wathebo,
Me saze la itre hna amekötin,
Me nuetrij lo isisinyikeu ka cile hut.*
6 Qa ngöne lai, kola hnëjine la nöj,
Nge ame la itre ka lapan ej, ke angatre hi la atrekë zön.
Celë hi matre, xalaithe pe hi la itre atr ngöne la nöj,
Nge co pe hi la itre trahmany.
7 Kola hnëmeci* la waina ka hnyipixe, nge kola fitre la hnënge vin,
Nge ame asë hi lo itre hni ka madrin, ke angatr pena a awe.
8 Patre hë la mejene madrin ne la itre itrapë;
Tha iluilu hë la itre ka feet;
Patre hë la mejene madrin ne la itre arp.
9 Kola iji waina ngo pëhë ka nyima,
Nge haitre hë la që ne la itre ka iji kahaitr.
10 Hna apatrene la traon hna trotrij;
Hna thing asë la itre uma, nge pëkö ka atreine lö.
11 Kola sue trootro e kuhu gojeny, ke pëhë waina.
Patre hnyawa ha la madrin;
Pë hnyawa ha madrin ngöne la nöj.
12 Itre itra etë pe hi la traon;
Hna thöne la qëhnelö me thë anyilanyilan ej.
13 Ke ame ngöne la nöj, nyipine la itre atren, tro ha
Tune la kola lep amalan la itre wene oliv,
Me tune la kola huji wene rezë ngöne la kola fenesi la ijine menu.
14 Tro hë angatr a hë draië,
Tro hë angatr a sue madrin.
Qa ngöne la hnagejë,* tro hë angatr a suen la esisitria i Iehova.
15 Qa ngöne lai, tro angatr a atrunyi Iehova ngöne la götrane koië;
Ngöne la itre hnapet, tro angatr a atrune la ëje i Iehova Akötresi Isaraela.
16 Qa ngöne la itre cane la fen, kola mexeme la itre nyima celë:
“Atrune* jë la atre ka meköt!”
Ngo öning: “Kucakuca ha ni, kucakuca ha ni!
Ekölöhini pe! Hnene la itre ka mele thoi hna iaö;
Cememine la iaö, hnene la itre ka mele thoi hna iaö.”
17 Atrene la nöje fe, tro ha traqa koi epun la xou, me itre hnaop, me itre hnö.
18 Ame la ka troa kötrene la mejen hna xouen, tro angeic a kei ngöne la hnaop,
Nge ame hë la ka troa elë qa hnine la hnaop, ke angeic a jötr ngöne la hnö.
Ke tro ha fe la itre thingen ne la hnengödrai,
Nge tro ha hmengöhmengön la itre trepen ne la nöj.
20 Kola zimo la nöj tune la atr ka hmo hnei ka haitr,
Nge angeic a enienij tune la ihmelekap hna uf hnei eny.
Hace catre hë la ngazo i angeic,
Tro angeic a kei nge tha tro hmaca kö angeic a mejë.
21 Ame ngöne la ijine cili, tro Iehova a waipengöne la itre soc e koho qa
Ngöne la itre gaa draië, me itre joxu e celë fen.
22 Tro ha icasikeu angatr
Tune la kola icasinekeune la itre hna oth ngöne la hnaop,
Nge tro ha thingi qëhnelö angatr ngöne la kalabus;
Thupene la nyimu drai, tro ha nyipi angatr.
23 Tro ha miti la dreumatreu,
Nge tro ha hmahma la jö ka hudrum,
Ke joxu hë Iehova, joxu ne la itre trongene isi e hnengödrai, hune la wetre Ziona me e Ierusalema,
Musi hë nyidrë memine la lolo qëmekene la itre qatr ne la nöje i nyidrë.