Isaia
28 Ekölöhini la ikorona* ka pi tru* ne la itre ka iji gorok qa Eferaima
Nge ceitune la ikorona cili, memine la iengen ka fitr hna petrën hnene la traon hna xup,
Hune la hnathup gaa hmelek, lo hna lapan hnene la itre hna lepe hnei waina!
2 Goeën! Tro Iehova a upe la ketre atr ka catr nge ka trene men.
Tune la ketre wene mani ka catr, me itre enyi atraqatr ka apatren asë,
Me tune la kola hlupi la mani me di atraqatr,
Tro nyidrëti a kuiënetrij ej e kuhu hnadro.
3 Tro ha tro waja la itre korona ka pi tru*
Ne la itre ka hmo hnei kahaitr e Eferaima.
4 Nge tro la emingömingöne la iengen ka fitr,
Ka mus hune la hnathup gaa hmelek,
A tune la iwacua ka canga wa qëmekene la ijine hedredrei.
Ame la kola öhn ej, kola huje la wene wacua, me aca tro ulum.
5 Ngöne la drai cili, tro Iehova joxu ne la itre trongene isi e hnengödrai a nyi korona ka lolo, me hnathaip* ka mingöming kowe la itre atrene la nöje i nyidrë ka lapa pe. 6 Tro nyidrëti a ketre ua ka meköt kowe la atre amekötin, me trengecatrene la itre ka isigöline la itre qëhnelö ne la traon.
7 Nge angatre fe a menumenu hnei waina;
Angatr a tro zimo hnei kahaitr.
Itre atre huuj me itre perofeta a menumenu hnei kahaitr;
Kola amenune la mekuna i angatr hnei waina,
Nge angatr a tro zimo hnei kahaitr;
Kola amenu angatr hnene la hna goeën,
Nge angatr a kei ngöne la hnei angatr hna amekötin.
8 Ke tiqa ha la laulau i angatr hnei hna hmitra
Matre pëhë göhnë ka loi.
9 Troa hamë drei la atrehmekun,
Nge troa qejepengöne koi drei la maca?
Tro kö a hamën kowe la itre hna hnyipi triji thin,
Lo itre hna xom qa ngöne la imano i thin?
10 Ke öni angatr: “Ase jë ketre hna amekötin, matre ketre,
Ase jë ketre wathebo,* matre ketre,
Nango e celë me nango e cili.”
11 Qa ngöne lai, tro nyidrëti a ithanata kowe la nöje ce, jëne la itre ka tretre që me ngöne la qene hlapa trenyiwa. 12 Ke ase hë nyidrëti qaja koi angatr ekö ka hape: “Hane hi la hnë mano. Nge ame la atr ka kucakuca, epi tro angeic a mano; Nge hane hi la götran gaa tingeting.” Ngo xele kö angatr ma dreng. 13 Matre tro Iehova a qaja koi angatr ka hape:
“Ase jë ketre hna amekötin matre ketre,
Ase jë ketre wathebo matre ketre,
Nango e celë me nango e cili,”
Matre ame hë la angatr a tro,
Ke tro hë angatr a kei me qana gala
Me eatr, me jötr ngöne la hnö, nge tro ha othi angatr.
14 Qa ngöne lai, drenge ju la trengewekë i Iehova, epun itretre sipu selën,
Itre tan ne la nöje celë ka ej e Ierusalema,
15 Ke öni epun ka hape:
“Ase hë huni isisinyikeu memine la mec,
Nge ase hë huni sisiny* memine la Hua.
Matre ame hë la kola neni catre la tim,
Tha tro pi kö ej a elë koi hun,
Ke hnë zae huni la thoi
Nge hne huni hna zae ngöne la iaö.”
16 Celë hi matre, öni Iehova Joxu Ka Sisitria ka hape:
“Goeën! Ame e Ziona, eni a amë la etë hna tupath nyine nyitrepen,
Ene la etë ka sisitria* nyine trepene ka catr.
Ame la atre lapaun, tha tro kö angeic a xou.
17 Nge tro ni a huliwane la meköt nyine tulu
Memine la thiina ka meköt nyine tulu ne acil.*
Tro la wene mani ka catr a apatrene la hunapo ne la itre ka thoi,
Nge tro la itre tim a hetin la hnë zae.
18 Tro hë la isisinyikeu i epun memine la mec a patr,
Nge tha tro kö a cile hut la hnei epuni hna sisiny memine la Hua.*
Ame hë la kola neni catre la tim,
Tro ej a kaca tranyi epun.
19 Ame ngöne la nöjei ijine tro ej a neni,
Tro hë ej a apatrenyi epun;
Ke tro ej a traqa e nöjei hmakany,
E lai me jidr.
Tro hmekuje hi la xou a atrotrohninë angatr la maca hna dreng.”*
20 Ke hopatre hi la ili matre troa mekölen,
Nge tha ijije kö la isitr matre troa sitrën.
21 Ke tro hë Iehova a traqa tune lo nyidrëti a traqa ngöne la wetre Perizim;
Tro nyidrëti a enij tune lo aqane kuca i nyidrë ngöne la hnathup e Gibeona,
Matre troa kuca la huliwa i nyidrë ka ketrepengön
Nge matre troa eatrën la huliwa i nyidrë ka isapengön.
22 Ame enehila, the tro kö epuni a ihnyima sai,
Wanga hnöthe catrë epuni jë,
Ke hane hi la hnenge hna drenge göne la Joxu Ka Sisitria, ene Iehova joxu ne la itre trongene isi e hnengödrai,
Hnei nyidrëti hna axeciën troa apatren asë la nöj.*
23 Hnangenyëne ju, nge drenge ju la aqane ewekëng;
Qatixenyëne ju nge drenge ju la hnenge hna qaja.
24 Hapeu, tro kö la atre uja dro a uja dro qaan e hmakany uti hë hej qëmekene troa traa feja?
Tro pala hi angeic a ujën me xemetrëne la dro?
25 Thupene la angeic a ase hnëkën la dro,
Tha tro kö angeic a isa ijene la komina ka wetrewetr me jume la nyipi komina?
Nge tha tro kö angeic a traane la qitr memine la ketre pengöne qitr
Me bali ngöne la nyipi götran, me jume la kesem* ngöne la ngone hlapa?
26 Ke kola ini* angeic hnyawa hnene la Akötresi angeic;
Nyidrëti a ainamacanë angeic.
27 Ke tha kolo kö a fica la komina ka wetrewetr hnene la ikatr nyine lepelepe qitr,
Nge tha kolo kö a ujë la wiil ne la ikatre hune la komina.
Waea! Kola lepelepe la komina ka wetrewetr hnene la sine sinöe,
Nge kola lepelepe la nyipi komina hnene la sine tö.
28 Hapeu, tro kö a tranetrane la qitr nyine kuci falawa?
Waea! Tha tro kö a lepe lapaan ej;
Ame la kola hule la irulo ne lepelepe qitr hnene la itre hos,
Ke tha kolo kö a amudromudrone la qitr.