Isaia
34 Itre nöje fe, easenyi jë matre dreng,
Nge itre atrene fe, hnangenyëne ju.
Epi tro la ihnadro memine la itre ka nyialien ej a dreng,
Ene la nöj me nöjei ewekë asë ka cia e cili.
2 Ke Iehova a wesitr kowe la itre nöj,
Me elëhni kowe la itre trongene isi i angatr.
Hnei nyidrëti hna amekötin troa apatrenyi angatr;
Hnei nyidrëti hna nue troa humuthi angatr.
3 Tro ha trij e kuhu trön la itre hna humuth,
Nge tro ha elë la pi qa ngöne la itre ngönetrei i angatr ka mec;
Tro ha ae* la itre wetr hnene la madra i angatr.
4 Tro ha hnyiqetr asë la trongene isi ne hnengödrai,
Nge tro ha ewaewathe la hnengödrai tune la tus hna ewath.
Tro hë la trongene isi asë a fitr,
Tune la dröne hnitr ka mec, ka mala qa ngöne la ivin
Me tune la wene wacua ka fitr, ka mala qa ngöne la iwacua.
5 “Ke ame e koho hnengödrai, tro ha thue imen la tauang.
Tro ej a uti matre eatrën la hna amekötin koi Edroma,
Lo nöj hnenge hna mekun troa apatrenetrij.
6 Thei Iehova la ketre taua, nge tro ej a si madra.
Tro ej a si giris,
Me si madra ne la itre neköi mamoe trahmany, me itre nani trahmany,
Me si girisi ne la itre wenethulumat ne la itre mamoe trahmany.
Ke hetre huuj hnei Iehova hna hnëkën thatraqai Bozera,
Ene la ketre ihumuth atraqatr ngöne la nöje Edroma.
7 Tro la itre kau wael a ce uti me angatr,
Lo itre neköi kau me itre kau ka egöcatr.
Tro ha di la ihnadro hnei madra,
Nge tro ha si giris la xaxau.”
8 Ke ase hë Iehova sa drai ne troa nyithupen,
Ene la macatre ne tro nyidrëti a të kowe la itre ka akötrë Ziona.
9 Tro ha saze la itre hneopegejë* hnei ewekë ka fedr,*
Nge tro ha saze la xaxau hnei eë ka catrehnin,*
Nge tro la ihnadro a tune la ewekë ka fedr nge ka mel.
10 Tha tro kö ej a pi e lai me jidr;
Tro la haj a elë draië epine palua.
Tro pë hë ej a hnapapa* ngöne la itre xötr atr;
Pëkö atr ka troa trongën ej uti hë epin, epine palua.
11 Tro la lue öni, ene la kati* me kifoda a lapa e cili,
Nge tro la men me halo a mel e cili.
Tro Akötresieti* a athip hun ej la eno nyine tuluth la gaa pë alien
Memine la tulu ne acil* hune la pëkö.
12 Pëkö hene nöj thei angeic hna troa acili joxun,
Nge tro ha apatren asë la itre tan ej.
13 Tro ha cia la hnënge ka ithiny ngöne la itre ihag atraqatr,
Me itre haö ka ithiny me itre hnitr ka ithiny ngöne la itre hunapon ej.
Tro ej a nyi hnë zae kowe la itre kuli wael,
Me ihag kowe la itre waco atraqatr.*
14 Tro la itre öni ne hnapapa a itronyi memine la itre öni ka ho,
Nge tro la itre nani wael* a ihokeu.
Eje hi, tro la waco ka sesë jidr a lapa e cili me öhne la ketre hnë mano.
15 Tro la un a kuca e cili la hnë hnaho i nyën me malane la itre wakuja i nyën,
Tro nyën a heetrëne me xawan itre ej fene la iahnue i nyën.
Eje hi, troa itronyi e cili hnene la itre daa,* itre daa föe me itre daa trahmany.
16 Thele jë epun ngöne la itus i Iehova, nge e catrëne jë:
Qa ngöne la itre öni celë, pëkö ka troa patr;
Pëkö öni ka troa pë sinatrongen,
Ke ukeineqë i Iehova la ka qaja,
Nge ua i nyidrë la ka hë nyudren.
17 Nyidrëti la ka uthidrönegöti* la edrö i nyudren,
Nge hnene la ime i nyidrë hna ami ifegon la götran hna hamën* koi nyudren.
Götrane i nyudren pë hë lai uti hë epin;
Tro nyudren a lapa e cili qaane la ketre xötr uti hë la ketre xötr.