Isaia
36 Ame ngöne la kola 14 lao macatre ne mus i Hezekia, hnei Saneribi joxu ne Asuria hna isi me thapa asë la nöjei traon hna eköhagen e Iudra. 2 Matre hnene la joxu ne Asuria hna upe la Rabesake* qa Lakisa troa tro Ierusalema memine la trongene isi atraqatr troa ixelë me Hezekia joxu. Nge hnei angatr hna cil ezine la jë i tim ne la kesao e koho, ezine la gojenyi ka tru ne la hlapa ne la atre wasi maano. 3 Ame hna tro koi angeic hnei Eliakima nekö i Hilekia, me Sebena, me Ioa nekö i Asafa. Eliakima lo atre thupëne la hnalapa i joxu, Sebena lo sekreter, nge Ioa lo atre feja itus.*
4 Ngo önine la Rabesake koi angatr ka hape: “Pane qaja jë koi Hezekia ka hape: ‘Hane hi la hna qaja hnene la joxu ka tru, ene la joxu ne Asuria: “Nemene la hnei ö hna mejiune kow? 5 Nge ma öni eö, ‘Ka maca ni ngöne la isi, nge ijije hi la trengecatreng.’ Ngo ka tria la mekuna i ö. Ke eö a mejiune koi drei matre icilekeu me eni? 6 Dreng! Eö a mekune troa qale koi Aigupito, ngo ketre rozo lai ka xöcixöci. Nge maine tro la ketre atr a hujan ej, ke tro ha thin axulune la hnatrapaime i angeic. Ke celë hi pengö i Farao joxu ne Aigupito, nge tro fe a traqa tun kowe la nöjei atr ka mejiune koi angeic. 7 Nge the qaja kö koi ni ka hape: ‘Eahuni a mejiune koi Iehova Akötresi hun,’ ngo hnei eö pe Hezekia, hna apatrene qa ngöne la nöj la itre hnë hmi gaa hmitrötr, me itre ita ne huuj ne la Akötresie cili, me qaja kowe la angetre Iudra me Ierusalema ka hape: ‘Tro epuni a thil qëmekene la ita ne huuje celë.’”’ 8 Ame enehila, tro sa pane tupathe ka hape, drei la ka troa hun, eö maine tixeng, lo joxu ne Asuria: tro ni a hamë eö la 2 000 lao hos, matre mama jë koi hun ka hape, atreine jë kö eö öhne la itre ka troa tith! 9 Matre, tro eö a atreine helëne tune kaa la ca gavena, lo tane ka co ne la tixeng, ngo eö pe a mejiune koi Aigupito matre hetre ikatr, me itretre ti hos? 10 Nge eö kö a mekun laka, tha hnei Iehova kö hna upi ni troa apatrene la nöj? Hnei Iehova hi hna qaja koi ni ka hape: ‘Lepe jë la nöje ce, nge apatrene pi.’”
11 Ame hnei Eliakima me Sebena me Ioa hna qaja kowe la Rabesake ka hape: “Ithanata jë koi huni qene Arama,* ke trotrohnine hi hun. Ngo the ewekë kö koi hun qene Iudra, wanga drenge jë la itre atr hune la ihag.” 12 Ame hnene la Rabesake hna sa ka hape: “Önine la tixeng, tha koi epuni casi kö memine la joxu i epun la itre trengewekë celë! Ngo kowe fe la itre atr ka të hune la ihag. Ke tro fe angatr elany a hane xeni la itre agetrine i angatr, me ce ije me epun la hnei angatre hna zij!”
13 Ame hnene la Rabesake hna sue catr ngöne la qene hlapa i angetre Iudra, ka hape: “Drenge ju la trengewekë ne la joxu ka tru, la joxu ne Asuria. 14 Hane hi la hna qaja hnei joxu: ‘The tro kö a amenu epun hnei Hezekia, ke thatreine kö angeic cilëgöli epun. 15 Hezekia a upi epuni troa mejiune koi Iehova, me hape: “Tro kö Iehova a amele së, nge tha nyine lueluëne kö. Tha tro kö la joxu ne Asuria a thapa la traone celë.” 16 Ngo the drei angeice kö, ke hane hi la hnenge hna qaja, eni joxu ne Asuria: “Iloi jë me eni, nge trohemi* koi ni. Nge tro epuni a ij qa ngöne la isa vine i epun, me iwacua i epun, me itre sima i epun. 17 Thupene lai, tro hë ni a traqa me xomi epun kowe la nöj ka tune la nöje i epun, nöj gaa hetre wene feja, me nyipi waina, me falawa, me hnënge vin. 18 The nue Hezekia kö troa amenu epun me hape: ‘Tro kö Iehova a amele së.’ Hapeu, hnene kö la ketre haze ne la itre xaa nöj hna atreine thupëne la zi i angatr qaatheng, joxu ne Asuria? 19 Ekaa la itre haze ne Hamath me Arepada? Nge ekaa la itre haze ne Sefaravaima? Hnei angatre kö hna amele Samaria qa ngöne la imeng? 20 Ala nyimu la itre haze ne la nöj, ngo drei la haze ka atreine troa thupën la zi i angeic qaatheng? Nge tro Iehova a amele Ierusalema tune kaa qa ngöne la imeng?”’”
21 Ngo hnei angatr hna lapa thaup, nge pëkö ca hnei angatr hna qaja, ke ase hë Hezekia joxu wathebo angatr troa sa koi angeic. 22 Ame hnei Eliakima nekö i Hilekia, lo atre thupëne la hnalapa i joxu, me Sebena lo sekreter, me Ioa nekö i Asa, lo atre feja itus, hna kuie zezene la itre iheetre i angatr, me tro troa thuemacanyi Hezekia la itre trengewekë ne la Rabesake.