Isaia
37 Ame hë la kola drenge lai hnei Hezekia joxu, hnei nyidrëti hna kuie zezene la itre iheetre i nyidrë, me heetrëne la ibëek ka tru thenyin, me lö hnine la uma ne hmi i Iehova. 2 Nge hnei nyidrëti hna upi Eliakima lo atre thupëne la hnalapa i joxu, me Sebena lo sekreter, memine la itre tan ne la itre atre huuj troa wai Isaia perofeta nekö i Amosa. Nge angatr a isa heetrën la itre bëek ka tru thenyin. 3 Nge öni angatr koi Isaia ka hape: “Hane hi la hna qaja hnei Hezekia: ‘Ame la drai ce, ke drai ne akötr, me iqaqa, me hmahma. Ke ceitu i easë me ketre föe ka kucakuca troa hnaho, ngo ijinë hë troa mala* la nekönatr. 4 Maine jë, tro Iehova Akötresi nyipë a dreng la itre trengewekë ne la Rabesake,* lo hna up hnene la joxu ne Asuria matre tupathe la Akötresie ka mel. Nge maine jë, tro Iehova Akötresi nyipë a nyithupen koi angeic, pine la itre trengewekë hnei nyidrëti hna dreng. Haawe, pane thithi fë jë la itre ka mele pe ngöne la nöj.’”
5 Nge thupene la hnei angatr hna tro fë la maca i Hezekia koi Isaia, 6 öni Isaia kowe la itre ka tro fë maca ka hape: “Tro jë troa qaja kowe la joxu i epun ka hape: ‘Hane hi la hna qaja hnei Iehova: “The xouene kö la itre trengewekë hnei ö hna dreng, ene la itre trengathoi* hna qaja göi ni hnene la itre hlue ne la joxu ne Asuria. 7 Hane hi la hnenge hna troa kuca: tro ni a amë e kuhu hni i angeic la ketre mekun. Nge tro angeic a drenge la ketre maca, me bëeke kowe la nöje i angeic. Nge tro pë hë ni a kuca matre troa humuthi angeic hnei taua ngöne la nöje i angeic.”’”
8 Ame hë la kola drenge hnene la Rabesake laka, hnene la joxu ne Asuria hna upe la itre soc i nyidrë troa mejë qa Lakisa, hnei angeic hna tro troa wai nyidrë. Ame hnei angeic hna öhnyi angatr e lepe la traon ne Libena. 9 Nge e cili, hnene la joxu ne Asuria hna dreng ka hape, calemi hë Tiraka joxu ne Aithiope troa isi me nyidrë. Ame hnei angeic hna upe hmaca koi Hezekia la itre ka tro fë maca me hape: 10 “Hane hi la nyine tro epuni a qaja koi Hezekia joxu ne Iudra: ‘The tro kö la Akötresie hnei eö hna mejiune kow a amenu eö, me hape: “Tha tro kö a nue Ierusalema ngöne la imene la joxu ne Asuria.” 11 Dreng! Atre hë eö lo hna kuca hnene lo itre joxu ne Asuria kowe la nöjei nöj, hna apatrenyi angatr asë. Matre ka ue pe kö eö? 12 Nge ame la itre nöj hna apatren hnene la itre qaaqaang, hapeu, hnene kö la itre haze i angatr hna amele angatr? Ekaa Gozana, me Karan, me Rezef, memine la angetre Edrena ka lapa e Thelasa? 13 Ekaa la joxu ne Hamath, me Arepada, memine la joxu ne la itre traon ne Sefaravaima, ene Hena me Iva?’”
14 Ame hnei Hezekia hna xome la itre tusi qaathene la itre ka tro fë maca me e. Thupene lai, nyidrëti a elë jë kowe la uma ne hmi i Iehova, me sathe la itre* itus qëmekei Iehova. 15 Nge hnei Hezekia hna thithi koi Iehova me hape: 16 “Iehova fe, joxu ne la itre trongene isi e hnengödrai, Akötresi Isaraela, atre lapane la therone i nyipë hune* la itre kerubi. Nyipëti hmekuje hi la nyipi Akötresie ne la itre baselaia e cailo fen. Nge nyipëti hi la ka xupe la hnengödrai memine la fen. 17 Iehova fe, epi tro nyipëti a qatixenyiëne me dreng! Nge Iehova fe, epi tro nyipëti a fe la luemekei nyipë, me goeën! Nge pane drenge jë la itre trengewekë* i Saneribi, ke angeic a tupathi nyipë Akötresie ka mel. 18 Iehova fe, nyipici laka, hnene la itre joxu ne Asuria hna apatren asë la itre nöj, memine fe la itre zi i angatr. 19 Nge hnei angatr hna dreuthetrije la itre haze ne la itre nöj, ke tha itre nyipi haze kö, ngo itre sine sinöe me etë hna tratraun hnei atr, celë hi matre hnene la itre joxu ne Asuria hna apatren itre ej. 20 Ngo Iehova fe Akötresi hun, epi amele huni enehila qaathene la joxu ne Asuria, matre atre jë la itre baselaia asë e celë fen laka, Iehova fe, nyipëti hmekuje hi la nyipi Akötresie.”
21 Ame hnei Isaia nekö i Amosa, hna iupi fë la maca celë koi Hezekia, me hape: “Hane hi la hna qaja hnei Iehova Akötresi Isaraela: ‘Pine laka, hnei ö hna thithi koi ni göi Saneribi joxu ne Asuria, 22 hane hi la itre trengewekë hnei Iehova hna qaja göi angeic:
“Kola methinë eö me hnyima sai ö hnene la nekö i Ziona, lo nyipi jajiny.
Kola nangenang la he me wesitr hnene la nekö jajiny ne Ierusalema.
23 Eö a thele isi me drei, nge drei la hnei ö hna qajangazon?
Drei la hnei ö hna ewekë catre kow
Me goeën amenyin?
Kowe la Atre Ka Hmitrötr e Isaraela!
24 Hnei eö hna thele isi me Iehova jëne la itre hlue i ö, me hape:
‘Tro ni a elëne la itre wetr
Memine la itre ikatreng ka nyimutre,
Ngöne la itre götran gaa nany ne Lebanona.
Tro ni a sa la itre sinöe arasi ka draië me itre göti ka mingöminge i angeic.
Tro ni a lö hnine la itre hnë zae i angeic gaa draië, me itre hnaxulu i angeic gaa tru.
25 Tro ni a kuje la itre tim me ij la tim;
Tro ni a aqaqacilëne la itre hneopegejë* ne Aigupito memine la ihnatrapacang.’
26 Tha drenge kö eö? Ase hë ni axeciën qaan ekö.
Eni a hnëkëne* lai qaane lo itre drai hnapan.
Ame enehila, tro hë ni a eatrën.*
Ame la itre traon hna xupi hagen, ke tro eö a lep itre ej matre tha tro hmaca kö a lapan.
27 Tro hë la itre ka lapan ej a pë trengecatr;
Tro hë angatr a xou me hmahma.
Tro hë angatr a tune la hnitr ne la itre hlapa me tune la haö,
Me tune la haö hune la itre uma hna aqaqacilën hnene la enyi ne koië.
28 Ngo atre hi ni la eö a lapa, me tro, me lö,
Memine la eö a elëhni koi ni,
29 Ke drenge hë la lue hnangenyëng la eö a elëhni koi ni me pi tru koi ni.
Ame enehila, tro ni a liine la aletreng ngöne la hnafiji ö memine la biriting ngöne la që i ö,
Nge tro ni a bëeke sai ö qa ngöne la gojenyi hnei ö hna fetra.”
30 “‘Nge hane hi la hatren koi eö:* Ngöne la macatre celë, tro epuni a xeni la ka cia xan. Nge ngöne la macatre thupen, tro epuni a xen la ka cia qa ngöne la itre wen ka mala ngöne la pane macatre. Nge ngöne la hnaakönine macatre, tro hë epuni a jumi feja, me menuën. Tro epuni a traa vin, me iji wene rezë. 31 Nge ame la itre ka mele pe qa ngöne la nöje Iudra, lo itre ka lapa pe, ke tro ha xuxu la itre iwaane i angatr, nge tro angatr a wa draië. 32 Ke tro ha xulu qa Ierusalema la itre nöj ka lapa pe, nge tro ha xulu qa ngöne la nöje Ziona la itre ka mele pe. Troa kuca lai, hnene la aja ka catre i Iehova, lo joxu ne la itre trongene isi e hnengödrai.
33 “‘Hane hi la hna qaja hnei Iehova göne la joxu ne Asuria:
“Tha tro kö angeic a lö kowe la traon
Tha tro kö angeic a huji pehna kow ej
Me cile fë petr qëmeken ej
Me acili ija matre elë hune la hag atraqatr.”’
34 ‘Tro angeic a bëeke hmaca qa ngöne la gojenyi hnei angeic hna fetra;
Tha tro kö angeic a lö ngöne la traone celë,’ öni Iehova.
35 ‘Tro ni a isigöline me amelen la traone ce
Pine la ëjeng, me göi Dravita hlueng.’”
36 Ame hna tro pi la angela i Iehova ngöne la lapa ne la angetre Asuria me humuthe la 185 000 lao soc. Nge ame la itre atr a ilë hmahmakany, ke öhne ju hi angatr la itre ngönetrei ka mec. 37 Ame hnei Saneribi joxu ne Asuria hna tro me bëeke hmaca e Nineve, me lapa e cili. 38 Nge ame la ketre drai, hnei Saneribi hna tro troa thil ngöne la uma i Niseroka haze i angeic. Ame hna humuthi angeic hnei taua hnei Aderameleke me Sarezera, lo lue nekö i angeic. Nge hnei nyidroti hna kötr ngöne la nöje Ararata. Ame hnei Esar-Adon nekö i angeic hna nyihnai angeic troa joxu.