Isaia
38 Ngöne la ijine cili, hna wezipo hnei Hezekia nge nyidrëti a troa mec. Ame hnei Isaia perofeta nekö i Amoza hna tro troa wai nyidrë, me hape: “Hane hi la hna qaja hnei Iehova: ‘Ahnithe jë kowe la fami i ö la itre mekuna i ö tixenuë, ke tro hë eö a mec. Nge tha tro kö a loi la mec i ö.’” 2 Ame la Hezekia a drenge lai, hnei angeic hna ujë kowe la ngöne uma, me thithi koi Iehova me hape: 3 “Iehova fe, eni a sipo nyipë, the thëthëhmi ni kö, ke hnenge lo hna mele nyipici koi nyipë hnene la hning ka pexej, nge hnenge hna kuca la loi qëmekei nyipë.” Ame hnei Hezekia hna treije latresi.
4 Thupene lai, hnei Iehova hna ithanata koi Isaia me hape: 5 “Bëeke hmaca jë koi Hezekia, nge qaja jë koi angeic ka hape: ‘Hane hi la hna qaja hnei Iehova Akötresi Dravita lo qaaqaa i ö: “Drenge hë ni la thithi eö, nge öhne hi ni la itre trenge timidra i eö. Ame enehila, tro ni a nyixane la mele i ö koi 15 lao macatre. 6 Nge tro fe ni a amele eö qa ngöne la imene la joxu ne Asuria, nge tro ni a cilëgöline la traone celë. 7 Hane hi la hatrene qaathei Iehova. Ame la eö a öhne la hatrene cili, tro hë eö a atre laka, tro Iehova a eatrëne la hnei nyidrëti hna qaja: 8 Tro ni a aelëne hmaca la iahnu ka ut qa hune la eskalie* i Ahaza koi 10 lao hna tro waja.”’” Ame hna elë hmaca la ahnuene la jö koi 10 lao hnë tro waja.
9 Itre trengewekë hna sil hnei Hezekia joxu ne Iudra, ngöne lo ijine nyidrëti a wezipo me loi hmaca.
10 Öninge lo: “Thupëtresij pala kö ni
Tro fe hë ni a lö ngöne la qëhnelö ne la Hua.*
Matre tro ha luz la itre xaa macatre ne mele ni.”
11 Öning: “Tha tro hmaca kö ni a öhnyi Ia,* Ia ngöne la nöj ne la itre ka mel.
Tha tro hmaca kö ni a goeëne la itre atr
E tro ni a lö kowe la nöje ne la itre ka mec.
12 Hna xometrij la hnalapang me xom ananyi ni
Tune la itat ne la atre thupë mamoe.
Tune la atr ka cai maano, eni a ewathe la meleng;
Nyidrëti a xöji ni tune la itre theny ne maano.
Qaan e kaqa ne lai uti hë e hej, nyipëti a eatrongë ni kowe la pun.
13 Eni a tupath troa atingetingëne la hning uti hë e hmakany.
Ngo tune la liona, nyidrëti pala hi a axeciëne la itre juneng;
Qaan e kaqa ne lai uti hë e hej, nyipëti a eatrongë ni kowe la pun.
14 Tune la fifikë me jië,* tha mano kö ni ho;
Tune la piny ka ho, eni pala hi a treij.
Kucakuca ha la luemekeng troa gala draië:
‘Iehova fe, atraqatr la akötreng;
Wai ni ju!*’
15 Tro ni a qeje nemen?
Ase hë nyidrëti qaja me kuca.
Ngöne la pune la itre macatreng, tro pë hë ni a tro cememine la ipië
Ke haitre hë la meleng.
16 ‘Iehova fe, kola mele la nöjei atr hnene la itre ewekë cili,*
Nge itre ej a aegöcatrenyi ni.
Tro kö nyipëti a aloinyi ni, me thupëne la meleng.
17 Maine ju tro ni a tingeting, ngo haitre pena ha la meleng;
Ngo pine laka, hnei nyipëti hna hnimi ni,
Hnei nyipëti hna amele ni qa ngöne la hnaop ne apatren.
Hnei nyipëti hna trij asë la nöjei ngazong hutrö* i nyipë.
18 Ke thatreine kö la Hua* troa suene la lolo i nyipë,
Nge ketre thatreine kö la mec troa atrunyi nyipë.
Thatreine kö la itre ka uti kowe la hnaop troa mejiune kowe la ihnimi nyipici i nyipë.
19 Tro hmekuje hi la atr ka mel a atrunyi nyipë,
Ketre tunge fe enehila.
Ijije hi tro la kem a amamane la nyipici i nyipë kowe la itre nekö i angeic.
20 Iehova fe, epi amele ni jë,
Nge tro huni a elon la itre nyimang memine la itre arp
E nöjei drai ne mele hun, ngöne la uma i Iehova.’”
21 Matre öni Isaia: “Xome jë la gato wacua ka qaqacil nge atë ju hune la theweke i joxu, matre loi hmaca jë nyidrë.” 22 Ngöne fe la ijine cili, hnei Hezekia hna hnying ka hape: “Nemene la hatren ka troa anyipicine laka, tro hmaca ni a elë kowe la uma i Iehova?”