Salamo
Thatraqane la atre jumi traem. Salamo i Dravita.
139 Iehova fe, nyipëti a goeë ni nge atre ni hi hnei nyipë.
2 Atre hi nyipëti la eni lapa me mejë.
Qa gaa nany, öhne hi nyipëti la itre mekunang.
3 Nyipëti a goeë* ni la eni a ngenu me saaju;
Atre hnyawa hi nyipëti la itre jëng.
4 Qëmekene tro la thinemeng a ithanata,
Goeën! Iehova fe, atre hnyawa ha nyipë la hnenge hna pi qaja.
5 Nyipëti a ekögölithi ni, e hutrö me qëmekeng;
Nge nyipëti a atë la ime i nyipë hui eni.
6 Tha trotrohnine kö ni la inamacane cili.*
Ke draië catr ej, nge thatreine kö ni troa traqa kow.*
7 Ekaa la hnë tro ni a zaene la ua i nyipë,
Me kötrene la qëmeke i nyipë?
8 Maine tro ni a elë e koho hnengödrai, ke nyipëti kö e cili,
Nge goeën! Maine tro ni a kuca la göhneng ngöne la Hua,* ke nyipëti fe e cili.
9 Maine tro ni a sesë memine la itre iapene la kaqa ne lai
Matre troa lapa ezine la hnagejë gaa nany,
10 E cili, tro pala hi la iwanakoime i nyipëti a eatrongë ni
Nge tro la ime maca i nyipëti a ea catrë ni.
11 Maine tro ni a qaja ka hape: “Tro hë la melöhlem a juetrë ni!”
Ame e cili, tro hë la jidr a tune la lai xötreithi ni.
12 Tha tro kö la melöhlem a miti catre koi nyipë,
Ngo ceitune hi la aqane mele ne la lai memine la jidr;
Ame koi nyipë, ceitune hi la lai memine la melöhlem.
14 Eni a atrunyi nyipë, ke mingöminge me lolo la aqane xupi ni hnei nyipë.
Nyine haine la itre huliwa i nyipë,
Atre hnyawa hi ni lai.
15 Tha hna juetrëne kö koi nyipë la itre juneng
Ngöne la kola xupe juetrë ni,
Ngöne la kola eköthi ni hnine la itre gaa jui ne la ihnadro.
16 Hnene la luemeke i nyipë hna öhnyi ni, lo eni pala kö a tune la neköi wakuja;
Hna cinyianyin asë la itre götraneng ngöne la itusi nyipë
Me itre drai ne xupi itre ej,
Qëmekene troa pexej la ketre hnepe götran.
17 Celë hi matre, ka nyipiewekë la itre mekuna i nyipëti koi ni!
Akötresieti fe, atraqatr itre ej asë!
18 Tune kaa la aqane tro ni a e itre ej? Ke nyimutre catre kö itre ej hune la itre wene ngöni.
Ame la eni a hlë, ke ce eni pala hi me nyipë.*
19 Akötresieti fe, maine humuthe ju nyipë la itre ka ngazo!*
Tro hë la itre ka iakötrë a ananyi ni,
20 Ene lo itre ka qeje nyipë göne troa* adronyi nyipë;
Angatr la itre ithupëjia ka huliwan menune la ëje i nyipë.
21 Iehova fe, hapeu, pëkö elëhning kowe la itre ka methinë nyipë?
Tha sisine kö ni la itre ka icilekeu me nyipë?
22 Cane mething angatr;
Angatre hë la itre sipu ithupëjia me eni.
23 Akötresieti fe, waipengöi ni jë nge atre jë la hning.
Goeë ni ju nge atre jë la itre mekun hnenge hna hnehengazon.*
24 Wange ju e hetre thiinang ka ngazo,
Nge eatrongë ni jë ngöne la gojenyi ka epine palua.