Isaia
47 Uti pi, nge lapa ju ngöne la xaxau,
Eö nekö jajinyi ne Babulona.
Lapa ju e cahu fen, ngöne la gaa pë theron,
Nekö jajinyi ne Kaledaia,
Ke tha tro hmaca kö a qeje eö ka hape, ka menyik nge hna nyipin.
2 Xome jë la ketre etë nyine amudromudrone, nge emothe jë la farin.
Una pi la isole i ö.
Adraiëne* jë la pune la iheetre i ö, nge amamane jë la lue waca i ö.
Thupa pi la itre hneopegejë.
3 Tro ha amamane la ngönetrei i ö.
Tro ha mama cil la ka ahmahmanyi ö.
Tro ni a nyithupen, nge pëkö ka atrein troa sewe ni.*
4 “Ame la ëjene la atre itöne hmaca la mele së
Ke Iehova joxu ne la itre trongene isi e hnengödrai,
Lo Atre Ka Hmitrötr e Isaraela.”
5 Lapa thaupu ju e celë, nge lö jë ngöne la gaa melöhlem,
Eö nekö jajinyi ne Kaledaia;
Tha tro hmaca kö a hë eö Isola* ne la itre baselaia.
6 Hnenge hna wesitr kowe la nöjeng.
Hnenge hna adrone la edröng,
Nge hnenge hna nue angatr kowe la ime i ö.
Ngo tha hnei ö kö hna utipi angatr.
Hnei ö fe hna atë la ehnef ka hace hune la itre qatr.
7 Öni ö ka hape: “Tro pala hi ni a Isola* uti hë epin.”
Tha hnei ö kö hna pane mekune hnyawane la itre ewekë cili;
Tha hnei ö kö hna mekune la itre ethanyin elany.
8 Haawe, pane drenge ju enehila, eö atre hniin la itre nyine iamadrinë,
Eö atre lapa tingeting, me atre qaja e kuhu hni i ö ka hape:
“Eni hi, nge pëkö ketre.
Tha tro kö ni a lapa sine föe.
Tha tro kö a patr la ketre neköng.”
9 Ngo ngöne la ca drai, tro ha aca tro traqa koi ö la lue akötre celë:
Tro ha patr la itre nekö i ö, nge tro eö a sine föe.
Tro ha lepi ö hnene la lue akötre cili
Pine* eö anyimua kuci haze me kuci iöni ka catrehnin.
10 Hnei ö hna kuca la itre ewekë ka ngazo, me mekune laka, pëkö ewekë ka troa traqa koi ö.
Hnei ö hna qaja ka hape: “Pëkö ka goë ni.”
Hna amenu eö hnene la inamacane i ö memine la atrehmekune i ö,
Nge hnei ö hna qaja e kuhu hni i ö ka hape: “Eni hi, nge pëkö ketre.”
11 Ngo tro ha traqa koi ö la akötr,
Nge thatreine kö la itre iöni cili troa thupë eö.
Tro ha trotro koi ö la iakötrë; Nge thatreine kö eö troa ananyine ej.*
Tro ha aca traqa koi ö la hnëjin,* lo hnei ö hna thatre.
12 Catre jë eö kuci iöni me kuci haze,
Lo hnei ö hna huliwa meci kow qaane lo eö a nekö jajiny.
Maine jë tro eö a öhnyi thangan qa ngön;
Maine jë tro hë la itre xan a xoue eö.
13 Hnei ö hna aluzi trengecatr troa anyimua ithanata memine la itre atresi i ö.
Nga upi angatre jë hë troa amele eö,
Ene lo itre ka thil kowe la hnengödrai,* me goeëne la itre wëtresij,
Lo itre ka qajaqaja la itre ewekë ka troa traqa elany
Ngöne la kola fetra la treu ka hnyipixe.
14 Ceitui angatr memine la kupeine qitr.
Tro ha dreuthetriji angatr.
Thatreine kö angatr troa sipu amele angatre kö qa ngöne la ecatrene la ukahlokin* eë.
Tha ukahlokine kö ka ceitu memine la wanalepe nyine hleng,
Memine la neköi eë hne së hna lapa xötreith.
15 Hane hi la ka troa traqa kowe la itre ka kuci haze* i ö,
Lo hnei ö hna huliwa meci kow qaane lo eö a nekö jajiny.
Tro hë angatr a isa trongëne la gojenyi angatr.*
Pëkö atr ka troa amele eö.