Isaia
53 Drei la atre lapaune kowe la itre ewekë hne huni hna qaja?*
Nge hna amamane koi drei la ime ka catre i Iehova?
2 Tro angeic a cia draië tune la ketre zin qëmekei nyidrë,* me tune la ketre iwaan ka fetra qa ngöne la dro ka qaqacil.
Tha tro kö a sisitria me mingöming la elolo i angeic;
Tha pi easenyine kö së la iqëmeke i angeic.*
3 Hna methinë angeic me kötre angeic hnene la itre atr,
Hna hnëkëne* la atre cili kowe la hleuhleu, ke atrepengöne hnyawa hi angeic la akötr.
Kösë hna juetrëne koi së la iqëmeke i angeic.*
Hna methinë angeic, nge hne së hna wangesixa angeic.
4 Eje hi, hnei angeic hna ajöne la itre meci së,
Me thue la itre akötre së.
Ngo hne së hna mekune laka, hna akötrë angeic, nge hna lepi angeic hnei Akötresie me axösisin.
5 Ngo ame pe, hna jaqa angeic pine la itre ngazo së;
Hna wajahuji angeic pine la itre tria së.
Hna thaucë angeic matre tingetinge pi së,
Nge jëne la itre eatre i angeic, hna ameunyi së.
6 Hne së hna tro menu tune la itre mamoe,
Hne së hna isa ië gojeny,
Nge hnei Iehova hna atë hui angeic la nöjei ngazo së.
7 Hna axösisi angeic, ngo pëkö hnei angeic hna kuca,
Hnei angeic hna lapa thaup.
Tune la mamoe hna troa humuth,
Memine la neköi mamoe ka pë mejen qëmekene la atre xötre pene mamoe,
Tha hnei angeice kö hna fe la që i angeic.
8 Hna xom apatrenyi angeic pine la iakötrë* memine la iameköti ka tha meköti kö;
Nge drei pë hë la ka troa qejepengöne la itre xötrapane* i angeic?
Ke hna thupatriji* angeic qa ngöne la nöj ne la itre ka mel;
Hna lepi* angeic pine la itre tria ne la nöjeng.
9 Nge ngacama pëkö ewekë ka ngazo hnei angeic hna kuca,*
Nge pë fe kö trenge iaö ngöne la që i angeic,
Ngo hna hnëkëne la hua* i angeic ezine la itre atr ka ngazo
Nge ame la angeic a mec, ke hna ce kelemi angeic memine la itre trenamo.*
10 Ngo aja i Iehova troa wajahuji angeic, nge hnei nyidrëti hna nu matre troa akötrë angeic.
Maine tro eö a tro fë la mele i angeic nyine huuj ne ialoinekeun,*
Tro hë angeic a öhne la itre matra* i angeic, nge tro ha nyixane la itre drai i angeic,
Nge tro ha eatr la aja i Iehova, jëne angeic.
11 Ke thupene la hna axösisi angeic, tro hë angeic a madrine fë la hnei angeic hna öhn.
Jëne la atrehmekune i angeic, lo hlueng ka meköt,
Tro angeic a kuca matre ala nyimu jë la itre hna jele mekötin,
Nge tro angeic a ajöne la itre tria i angatr.
12 Qa ngöne lai, tro ni a hamëne koi angeic la ketre edrö nyipine la ka ala nyim,
Nge tro angeic a thawa la itre ewekë hna thapa memine la itretre catr,
Ke hnei angeic hna nue la mele i angeic uti hë la mec
Nge hna ce e angeic memine la itre ka eni wathebo;
Hnei angeic hna thue la ngazo ne la ka ala nyimu,
Me xëwe fë la itre ka eni wathebo.