Isaia
58 “Sue jë hnene la trengecatre i ö, the cile kö!
Ewekë catre jë tune la trutru.
Qaja amamane jë kowe la nöjeng la aqane icilekeu i angatr,
Me kowe la itre matra* i Iakobo la itre ngazo i angatr.
2 Angatr a thele ni o drai,
Me selën ka hape, angatr a madrine troa atre la itre thiinang,
Kösë angatr la ketre nöj ka kuca la meköt
Nge ka tha nuetrije kö la itre wathebo* ne la Akötresi angatr.
Itre ka madrine troa easenyi Akötresie,
Matre angatr a sipo ni troa amekötin thenge la meköt:
3 Angatr a qaja ka hape: ‘Ame la eahuni a tha xen, hnauëne laka, tha öhnyi huni kö hnei nyipë?
Nge ame la eahuni a sipu akötrë hun, hnauëne laka, tha öhne kö nyipë?’
Ke ame ngöne la drai ne epuni a tha xen, epuni kö a sipu meku epun,*
Nge epuni a qanangazone la itre ka huliwa koi epun.
4 Ame la epuni a tha xen, ke kolo pala hi a nyipune hnei isi me iwesitrë,
Nge epuni a ijei memine la ime ka ngazo.
Tha ijije kö tro epuni a tha xeni tune la aqane kuca i epun enehila, me lapa treqene troa drei epun e koho hnengödrai.
5 Hapeu, eni kö a madrine la aqane tha xeni celë,
Ngöne la epuni a sipu akötrëne la mele i epun,
Me thil tune la haö ka tru,
Me kuca la göhnë i epun hune la ibëek me hnatresij?
Hapeu, celë kö la aqane tha xen ka amadrinë Iehova?
6 Hane hi la aqane troa tha xen hnenge hna ajan:
Ene la troa aukene la itre cein ne la ngazo,
Me senge la itre eno ne isilekeun,
Me nue gufane la itre hna qanangazon,
Me axeciëne la nöjei sinöe ne isilekeun;
7 Kolo fe a qaja la troa thawa la falawa i ö memine la ka mecijiin,
Me kapa ngöne la hnalapa i ö la ka pë ewekë memine la ka pë uman,
Me heetrëne la atr ka pë iheetr,*
Nge tha tro kö eö a nuetrije la trejin me eö.
8 Qa ngöne lai, tro ha hudrume la lai qaathei eö tune la kaqa ne lai,
Nge tro la eatre i ö a canga meu.
Tro la meköti eö a tro qëmekei ö,
Nge tro la lolo i Iehova a tro hutrö i ö me thupë eö.
9 Ame la eö a troa hë, ke tro Iehova a sa;
Tro eö a xëwe me sipo ixatua, nge tro nyidrëti a sa ka hape: ‘Eni hi la!’
Maine tro eö a apatrene qaathei ö la sinöe ne isilekeun
Nge maine tro eö a hmaca hna iköja me ithanata akökötreny,
10 Maine tro eö a hamëne kowe la ka mecijiin la hnei ö hna ajan
Nge maine tro eö a amejine la itre hna axösisin,
Haawe, tro ha hudrume la lai i ö ngöne la gaa jidr,
Nge tro la gaa melöhlem a tune la hnaipajö.
11 Tro pala hi Iehova a eatrongë eö
Me ameji ö ngacama ka qaqacil la dro;
Tro nyidrëti a aegöcatrene la itre june i ö,
Nge tro hë eö a tune la hlapa hna fii lapaan,
Me tune la ketre qeqe ne tim ka tha hane ae kö.
12 Tro hmaca a acile koi ö la itre hag hna akeine hë ekö,
Nge tro eö a nyihnyawane la itre trepen ne la itre xötrapan ekö.
Tro ha ati ëje i ö, atre acile hmaca la itre ihag ka kei,*
Me atre nyihnyawane la itre gojeny matre lapan itre ej.
13 Maine tro eö a xomehnöthe* la itre aja* i ö ngöne la drai sabath, ngöne la drai hnenge hna ahmitrötrën
Me xome ceitunëne la sabath memine la ketre drai ne madrin, ketre drai ka hmitrötr koi Iehova, nge nyine atrun,
Nge maine tro eö a nyipin ej, me tha thele la itre sipu aja i ö, me ithanata menu,
14 Haawe, tro hë eö a öhn la nyipi madrin qaathei Iehova,
Nge tro hë ni a ati ö hune la itre gaa draië ne la fen.
Tro fe ni a thawa koi ö la edrö i Iakobo, qaaqaa i ö,
Ke ase hë ithanata hnene la ukeineqë i Iehova.”