Isaia
62 Pine la ihniming koi Ziona, tha tro kö ni a lapa thaup,
Nge pine la ihniming koi Ierusalema, tha tro kö ni a mano
Uti hë la troa hudrum la mekötin ej tune la ketre lai atraqatr
Nge tro la iamelen* ej a mel tune la uke jina.
2 “Föe fe, tro la itre nöj a öhne la meköti nyipo,
Nge tro la nöjei joxu asë a öhne la lolo i nyipo.
Nge tro ha ati ëje i nyipo hnene la ketre ëje ka hnyipixe,
Hna troa iën hnene la ukeineqë i Iehova.
3 Tro nyipoti a ikorona ka mingöming ngöne la ime i Iehova,
Me nyine atu he i joxu ngöne la iwanakoimen ne la Akötresi nyipo.
4 Tha tro hmaca kö a qeje nyipo ka hape, föe hna nuetrij,
Nge tha tro hmaca kö a qaja ka hape, ase hë angazon la zi i nyipo.
Ngo tro ha ati nyipo: ‘Xapoti la madrineng,’
Nge tro ha hëne la zi i nyipo: ‘Föe ka faipoipo.’
Ke tro nyipoti a amadrinë Iehova,
Nge tro la ihnadro i nyipo a tune la ketre föe ka faipoipo.
5 Tune la ketre thupëtresij a xome la ketre jajiny,*
Tro la itre atrene la nöje i nyipo* a xomi nyipo.
Tune la föe ka amadrinëne la föi angeic,
Tro hë nyipoti a amadrinëne la Akötresi nyipo.
6 Ierusalema fe, ase hë ni acil la itretre thup hune la itre hage i ö.
Tha tro jë kö angatr a lapa thaup e lai me jidr.
Ame epun itre ka qeje Iehova,
The mano kö,
7 Nge the nue nyidrëti kö troa mano, uti hë la tro nyidrëti a acile huti Ierusalema,
Uti hë la tro nyidrëti a kuca matre troa atrun ej e celë fen.”
8 Ase hë Iehova sisiny me adraiëne la iwanakoime maca i nyidrë, lo ime ka catre i nyidrë me hape:
“Tha tro hmaca kö ni a hamëne la itre wene feja i ö kowe la itre ithupëjia,
Tha tro hmaca kö la itre trenyiwa a ij la waina i ö ka hnyipixe, lo hnei ö hna huliwa meci kow.
9 Ngo tro la itre ka menuëne la itre wene feja a xeni me atrunyi Iehova;
Nge tro la itre ka xawane la waina a ij ngöne la itre hnahageng ka hmitrötr.”
10 Lö jë, lö jë qa ngöne la itre qëhnelö.
Hnëkëne jë la gojeny thatraqane la nöj.
Acatrene jë, acatrene jë la gojenyi ka tru.
Huletrije pi la itre etë.
Acile jë la ketre hatren* thatraqane la itre nöj.
11 Hane hi la maca i Iehova kowe la itre cane la fene hnengödrai:
“Qaja jë kowe la nekö jajiny ne Ziona ka hape,
‘Goeën! Easenyi hë la iamele i nyipo.
Goeën! Eje thei nyidrë la thupen,Nge eje qëmekei nyidrë la thupene huliwa.’”
12 Tro ha ati ëjene la nöje celë, nöje ka hmitrötr, lo itre hna itön hnei Iehova,
Nge tro ha ati ëje i nyipo, “Traon Hna Thel,” “Traon Tha Hna Nuetrije Kö.”