Isaia
49 Itre hnapeti fe, drei ni ju,
Nge itre nöje gaa nanyi fe, hnangenyëne ju.
Qëmekene troa hnaho ni, hna hë ni hnei Iehova.
Eni pala kö e kuhu hni i nenë la nyidrëti a hëne la ëjeng.
2 Hnei nyidrë hna kuca la qëng, matre tune la ketre taua ka idrei;
Me petrë ni hnene la ahnuene la ime i nyidrë.
Hnei nyidrë hna aijijë ni troa ketre ane pehna hna xöl;
Hnei nyidrë hna juetrë ni ngöne la trengene pehna i nyidrë.
3 Öni nyidrëti koi ni: “Eö la hlueng Isaraela fe,
Jëne eö, tro ni a amamane la elolong.”
4 Ngo hnenge hna sa ka hape: “Meci hë ni hna huliwa ngo ka gufa pe.
Hnenge hna nue trengecatr ngo pë pe thangan.
Ngo Iehova la ka ameköti ni,
Nge Akötresing la ka nyithupeng.”
5 Ame enehila, hnei Iehova,
Lo atre xupi ni e kuhu hni i nenë matre hlue i nyidrë,
Hna sipo ni troa traqa sai Iakobo koi nyidrë.
Matre acasi Isaraela thei nyidrë.
Nge tro ha atrunyi ni qëmekei Iehova, nge tro la Akötresing a nyi trengecatreng.
6 Nge öni nyidrë: “Tha tro hmekuje kö eö a hlueng
Göne hi la troa acile hmaca la itre tribu i Iakobo
Me abëekëne hmaca la angetre Isaraela ka mele pe.
Hnenge fe hna nue eö nyine lai kowe la itre nöj,
Matre tro la iameleng a haöthe la cane la fene hnengödrai.”
7 Hane hi la hnei Iehova, lo Atre Itö Mele i ö nge Ka Hmitrötr e Isaraela, hna qaja kowe la hna methinën, me kowe la hna xele ma wang hnene la nöj, lo hlue ne la itre trene mus:
“Tro la itre joxu a öhn me icileny,
Nge tro la itre tan a thil matre metrötrë Iehova
Ke ka nyipici nyidrë,
Lo Atre Ka Hmitrötr e Isaraela, atre ië eö.”
8 Hane hi la hna qaja hnei Iehova:
“Ngöne la ijine loi,* hnenge hna sa koi ö,
Nge ngöne la drai ne iamele, hnenge hna xatua eö;
Hnenge hna thupë eö matre hamë eö nyine isisinyikeu kowe la nöj,
Me acile hmaca la nöj,
Me kapa hmaca la edrö i angatr hna apatren,
9 Me qaja kowe la itre hna othe ka hape: ‘Ange lö pi!’
Me kowe la itre ka lapa ngöne la gaa jidr: ‘Iamamanyi pi!’
Tro angatr a xeni trootro ngöne la itre gojeny,
Tro ha hetre a i angatr ngöne la itre hmene gojeny hna trongëne lapaan.*
10 Tha tro kö angatr a meci jiin, me meci hnei pi ij,
Tha tro kö a dreuthi angatr me cinajönyi angatr.
Ke tro la Atre utipi angatr a engë* angatr,
Me eatrongë angatr ngöne la itre qeqe ne tim.
11 Tro ni a kuca matre tro la itre wetreng a nyi gojeny,
Nge tro la itre gojenying a draië.
12 Goeën! Angatr asë a traqa qa gaa nany,
Nge angatre la a traqa qa kolopi me qa kuë,
Nge ame angatre la, qa ngöne la nöje Sinim.”
13 Hnengödrai fe, sue madrine jë, nge fene hnengödrai fe, madrine jë.
Epi tro la itre wetr a madrin me nyima draië.
Ke ase hë Iehova aupune la nöje i nyidrë,
Nge nyidrëti a amamane la utipine i nyidrë kowe la itre ka awe.
14 Ngo öni Ziona:
“Ase hë Iehova nuetriji ni, nge ase hë Iehova thëthëhmi ni.”
15 Hapeu, tro kö la föe a thëthëhmine la nekö i eahlo
Me tha utipine la nekönatr hnei eahlo hna hnahon?
Ngacama tro la itre föe cili a thëthëhmin, ngo tha tro jë kö ni a thëthëhmi ö.
16 Goeën! Ase hë ni sija la ëje i ö ngöne la lue hnatrapaimeng.
Eje pala hi qëmekeng la itre ihage i ö.
17 Canga saqe hi la itre nekö i ö bëek.
Tro la itre ka akeinyi ö me apatrenyi ö a tro qaathei ö.
18 Gala jë draië, nge goeëne jë xötreithi ö.
Angatr asë hi a icasikeu.
Angatr a traqa koi ö.
“Maine nyipici laka, ka mele ni,” öni Iehova,
“Tro eö a xomi angatr matre afena eö tune la hnathaip,
Nge tro hë eö a othi angatr hui ö tune la aqane kuca ne la jajiny ka troa faipoipo.
19 Tro ha apatrenyi ö me itre atr thei ö, nge troa itra etë la nöje i ö,
Tha tro kö a hetre göhnene la itre atre i ö,
Nge tro ha nanyi qaathei ö la itre ka öni ö.
20 Thupene la hna apatrene la itre xaa nekö i ö, tro la itre nekönatr hna hnyipi hnahon a qaja koi ö ka hape,
‘Tha ijijinge kö la götrane ce.
Nango atrune pi la götraneng matre tro ni a lapan.’
21 Nge tro hë eö a qaja e kuhu hni i ö ka hape,
‘Drei la kemene la itre nekönatre ce hna hamëne koi ni?
Ke meci asë hë la itre neköng, nge tha ka hnaho kö ni,*
Hna xomi ni kowe la nöje trenyiwa, me akalabusi ni.
Haawe, drei kö hö la ka hia angatre la?
Ke eje hi, hnei angatr hna nuaxöji ni,
Matre angatre la a traqa qa kaa?’”
22 Hane hi la hna qaja hnei Iehova Joxu Ka Sisitria:
“Goeën! Tro ni a adraiëne la imeng kowe la itre nöj,
Nge tro ni a acile la hatreneng* kowe la nöjei nöj.
Tro angatr a xepe* la itre nekö i ö trahmany
Me itre nekö i ö jajiny hune la hnaiape i angatr.
23 Tro pena la itre joxu a thupë eö,
Nge tro la itre isola i angatr a nyihlue i ö.*
Tro angatr a thil e kuhu hnadro qëmekei ö
Me hadrum la xaxau qa ngöne la lue waca i ö,
Nge tro hë eö a atre laka, Iehova ni;
Tha tro kö a hmahma la itre ka mejiune koi ni.”
24 Hapeu, ijije kö troa xome qaathene la atr ka catr la itre atr hna thapa?
Me amelene la itre hna oth qaathene la itre ka iaxösisi?
25 Hane hi la hna qaja hnei Iehova:
“Nyipici, tro ha thapa la itre hna akalabusin qaathene la atr ka catr,
Nge tro ha amelene la itre hna oth qaathene la atr ka iaxösisi.
Tro ni a cile kowe la itre ka icilekeu me eö,
Nge tro ni a amelene la itre nekö i ö.
26 Ame la itre ka qanangazo eö, tro ni a kuca matre tro angatr a öni la sipu ijöne i angatr,
Nge tro angatr a hnaitö hnene la sipu madra i angatre kö, kösë waina ka hnyapa.
Nge tro hë la nöjei atr* asë a atre laka, Iehova ni,
Atre Amele eö me Atre Itö Mele i ö,
Lo Ka Mene i Iakobo.”