Isaia
63 Drei jë la ka traqa qa Edroma,
Qa Bozera, memine la iheetr ka palulu*
Lo hna heetrën hnene la iheetr ka mingöming,
Nge ka catr?
“Eni* hi, lo atre qaja la meköt,
Ka hetre trengecatr troa amelen.”
2 Hnauëne laka, ka madra la hna heetre i nyipë?
Nge hnauëne laka, itre ej a tune la iheetrene la atre wejeweje wene vin?
3 “Eni casi hi lo ka wejeweje wene vin.
Pëkö xaa atrene la itre nöje theng.
Hnenge hna waja fici angatre ngöne la elëhning,
Me wajawaja ngöne la trengehning.
Hna thuthu la madra i angatr ngöne la itre iheetreng,
Matre si madra asë hë la iheetreng.
4 Ke ase hë ni sa la drai ne nyithupen,
Nge traqa ha la macatre ne la itre hnenge hna itön hmaca.
5 Hnenge hna goeën, ngo pëkö ka xatua ni;
Hnenge hna hain laka, pëkö ka sajuë ni.
Ame hna amele ni hnene la imeng,
Nge hna sajuë ni hnene la trengehning.
6 Hnenge hna waja fica la itre atr ngöne la elëhning,
Hnenge hna tra ime i angatr hnene la trengehning
Me anenine la madra i angatr e cahu hnadro.”
7 Tro ni a qaja la itre aqane ihnimi nyipici Iehova,
Me itre huliwa nyine atrunyi Iehova,
Pine la nöjei ewekë hnei Iehova hna kuca koi së,
Memine la nöjei ewekë ka loi hnei nyidrëti hna kuca kowe la nöje Isaraela,
Thenge la utipine i nyidrë memine la ejuine la ihnimi nyipici nyidrë.
8 Ke öni nyidrë: “Nyipici, angatre la nöjeng, itre nekön ka tha mele nyipici kö.”
Matre nyidrëti hë la Atre Amele angatr.
9 Ame ngöne la ijin angatr a akötr, ke ketre akötre fe koi nyidrë.
Nge hna amele angatr hnene la angela ka ceme nyidrë.
Hnei nyidrëti hna itö angatr hnene la ihnim me utipine i nyidrë,
Nge hnei nyidrë hna amejë angatr me xepi angatr qaane lo itre drai ekö.
10 Ngo hnei angatr hna icilekeu me akötrëne la uati hmitrötre i nyidrë.
Ame hnei nyidrëti hna ithupëjia me angatr,
Me lepi angatr.
11 Nge hnei angatr hmaca hna mekune lo itre drai ekö,
Lo ijine i Mose hlue i nyidrë, nge öni angatr:
“Ekaa ha lo atre eatrongëne* la nöje i nyidrë qa kuhu hnagejë, memine la itre ka thupëne la hnënge mamoe i nyidrë?
Ekaa lo atre hamë uati hmitrötr koi angeic,
12 Lo atre ea la ime maca i Mose hnene la ime ka lolo i nyidrë,
Lo atre thupaluëne la hnagejë qëmekei angatr
Matre troa epine palua la ëje i nyidrë,
13 Lo atre tro sai angatr ngöne la itre tim ka holehol,*
Matre hnei angatr hna tro ngo tha kei kö angatr,
Tune la ketre hos ngöne la hnapapa?
14 Hnene la ua i Iehova hna amano angatr,
Tune la hnënge öni ka uti ngöne la hnathup.”
Celë hi aqane eatrongëne nyipë la nöje i nyipë,
Matre troa hlemu* la ëje i nyipë.
15 Goeëne ju qa koho hnengödrai
Wange ju qa ngöne la hnë i nyipë ka sisitria, nge ka hmitrötr me lolo.*
Ekaa ha lo aja ka catre i nyipë me mene i nyipë,
Memine la ecatrene la ihnimi* nyipë, me utipine i nyipë?
Hnei nyipëti hna cipan asë koi hun.*
16 Ke nyipëti la Keme hun;
Ngacama thatre huni kö hnei Aberahama
Nge tha öhnyi huni kö hnei Isaraela,
Iehova fe, nyipëti la Keme hun.
Lo Atre Itö hun qaane lo itre drai ekö, nge celë hi la ëje i nyipë.
17 Iehova fe, hnauëne laka, nyipëti a nue hun troa tro ananyine la itre jë i nyipë?
Hnauëne laka, nyipëti a nue hun troa axetine* la itre hni hun, matre tha tro kö huni a xoue nyipë?
Bëeke jë, matre nyine loi kowe la itre hlue i nyipë,
Lo itre tribu i nyipë.
18 Tha qea ju kö la hna lapan la nöj, hnene la nöj ka hmitrötre i nyipë.
Hnene la itre ithupëjia me eahuni hna wajafica la uma ne hmi i nyipë.
19 Ekö hë huni mel tune la itre atr ka tha lapa fene la mus i nyipë,
Tune la itre ka tha hane kö xome la ëje i nyipë.