Ieremia
18 Hane hi la hnei Iehova hna qaja koi Ieremia: 2 “Cile jë nge uti pi kowe la atre xupi inege, nge e cili, tro hë eö a drenge la itre trengewekëng.”
3 Ame hnenge hna uti kowe la atre xupi inege, nge angeic a xupe la ketre ewekë. 4 Ngo ngazo pi hi lo ewekë hnei angeic hna xup ngöne la iwanakoime i angeic, matre hnei angeic hna nyiqaane hmaca: angeic a xome hmaca pi lo lai dro ka fedr, me kuca hmaca la ketre trengen, thenge la hnei angeic hna mekun.*
5 Thupene lai, hnei Iehova hna ithanata koi ni, me hape: 6 “‘Nöje Isaraela fe, ame la mekuna i epun, ke thatreine kö ni troa kuca koi epun tune la aqane kuca ne la atre xupi inege?’ öni Iehova. ‘Goeën! Tune la dro ka fedr ngöne la ime ne la atre xupi inege, epuni fe ngöne la imeng nöje Isaraela! 7 Maine tro ni a qaja ka hape, tro ni a fejetrij, me thëtrij, me apatrene la ketre nöj maine ketre baselaia, 8 nge e tro la nöje cili a nuetrije la aqane ujë i angeic hnenge hna xele ma wang, tro hë ni lai a saze mekun:* tha tro kö ni a axulune lo akötr hnenge hna mekun troa kuca koi angeic. 9 Ngo maine tro ni a qaja ka hape, tro ni a xup me traane la ketre nöj maine ketre baselaia, 10 nge e tro la nöje cili a kuca la ngazo qëmekeng me tha drei ni, tro hë ni lai a saze mekun:* tha tro kö ni a axulune la loi hnenge hna mekun troa kuca koi angeic.’
11 “Ngo enehila, qaja jë kowe la angetre Iudra me Ierusalema ka hape: ‘Hane hi la hna qaja hnei Iehova: “Eni hë la a hnëkëne la ketre akötr, me eköth la ketre mekun troa lepi epun. Matre eni a sipo epun, bëeke hmaca jë, nge nuetrije pi la aqane ujë i epun ka ngazo! Saze pi la itre thiina me itre aqane huliwa i epun!”’”
12 Ngo öni angatre pe: “Waea, loi ju hë! Tro kö huni a isa kuci mekun, me kei thenge la itre hni hun ka ngazo me catre që.”
13 Matre hane hi la hna qaja hnei Iehova:
“Eni a sipo, pane hnyingëne jë kowe la itre nöj.
Hane fe kö epuni drenge la ewekë celë?
Hnene la jajinyi* ne Isaraela hna kuca la ewekë ka sis.
14 Hapeu, tro kö a patre la kiona qa ngöne la gaa utiuti ne la Lebanona*?
Tro kö a qaqacile la itre timi ka lepanyi ka traqa qa gaa nany?
15 Ngo hna thëthëhmi ni pe hnene la nöjeng.
Ke angatr a tro fë huuje* kowe la ewekë ka pë alien,
Nge angatr a akeine la itre ka xötrën la itre jë i angatr, lo itre hmene gojeny ka hekö,
Matre tro pena a trongëne la itre hmene gojenyi ka ngazo,*
16 Celë hi matre, tro la nöje i angatr a ketre ewekë nyine xouen
Tro hë la itre atr elanyi a qej la angatr a goeën ej, me sisin ej.
Tro asë hi la itre ka cili thenge me öhn ej, a sisin me nangenang.
17 Tune la enyi ne koië, tro ni a isaije angatr qëmekene la ithupëjia.
Ngöne la ijin akötr, tro ni a hutrö koi angatr me thele hna goe.*”
18 Matre öni angatre jë hi: “Jë fe matre tro sa tra thethi Ieremia, ke tha tro kö a patre la wathebo* qaathene la itretre huuj, memine la eamo qaathene la itre ka inamacan, memine la trengewekë qaathene la itre perofeta. Jë fe matre tro sa xöjetriji angeic,* me drei simin la hnei angeic hna qaja.”
19 Iehova fe, pane semesine ni ju,
Drenge ju la hna qaja hnene la itre ithupëjiang.
20 Hapeu, tro kö a të la ngazo hnei loi?
Eje hi, hnei angatre hna si hnaop troa humuthi ni.
The thëthëhmine kö lo eni a cil qëmekei nyipë troa qaja aloinyi angatr,
Matre nanyi pi la elëhni i nyipë qaathei angatr.
21 Haawe, nuaxöje pi la itre nekö i angatr trahmany kowe la jiin,
Nge nue angatre pi kowe la menen la taua.
Epi tro la itre föi angatr a pë kuku me sine föe!
Epi tro la itre trahmanyi a mec hnene la meci ka ixötrekeu!
Epi tro la itre nekö trahmanyi a mec hnei taua ngöne la hna isi!
22 Epi troa dreng la kola sue qa ngöne la itre uma i angatr
La nyipëti a upe koi angatr la itre atrekënö.
Ke hnei angatre hna si hnaop troa ee ni
Nge hnei angatre hna tra thethine la lue cang.
23 Ngo ame kö nyipë Iehova,
Öhne hnyawa hi nyipë la hnei angatre hna mekun troa kuca matre humuthi ni.
The juetrëne kö la tria i angatr,
Nge the köletrije kö la ngazo i angatr.
Loi e tro angatr a kei qëmekei nyipë
Ngöne la nyipëti a troa ameköti angatr ngöne la elëhni i nyipë.