Ieremia
12 Iehova fe, ka meköti nyipë la eni a tro fë la joleng koi nyipë,
Ngöne la eni a ithanatane la meköt me nyipë.
Ngo hnauëne laka, ka tro loi pala hi la huliwa ne la itre atr ka ngazo?
Nge hnauëne laka, pë fe kö jol ka traqa kowe la itre ka iaö?
2 Hnei nyipëti hna traa angatr, nge hnei angatr hna cia waan.
Hnei angatr hna cia me wa wen.
Angatre pala hi a qeje nyipë, ngo patre pe nyipë ngöne la itre mekuna i angatr ka sihngödr.*
3 Iehova fe, atre ni hnyawa hi hnei nyipë, nge öhnyi ni hi hnei nyipë;
Hnei nyipëti hna waipengöne la hning, me öhn laka, ej a mele nyipici koi nyipë.
Ame la itre atr ka ngazo, pane ami angatre ju tune la itre mamoe nyine humuth,
Nge amë aconyi angatre ju thatraqane la drai ne ihumuth.
4 Tro ha ngazo trootro la nöj uti hë eu?
Nge tro ha fitr uti hë eu la itre feja ngöne la itre hlapa asë?
Meci hë la itre öni wael me itre waco,
Pine la aqane iakötrë ne la itre atren.
Eje hi, öni angatr: “Tha öhne kö nyidrë la ka troa traqa koi së.”
5 Maine kucakuca fe hë eö la eö a iwaja me itre atr,
Nga tro eö a iwaja tune kaa me itre hos?
Eö a mele hnyawa ngöne la nöje ka tingeting,
Ngo tro eö a tune kaa nyipine la itre hnitr ka cia ezine la Ioridrano?
6 Eje hi, hnene la itre trejin me eö, memine la fami ne la keme i ö,
Hna mele thoi koi ö.
Hnei angatre hna sue koi ö.
The mejiune kö koi angatr,
Ngacama ka lolo la hnei angatre hna qaja.
7 “Hnenge hna trotrije la umang me nuetrije la edröng.
Hnenge hna nue la hniminang kowe la itre ithupëjia me angeic.
8 Ngacama angeice ju hë la edröng, ngo ceitui angeice hë me liona ngöne la hnaxulu.
Hnei angeic hna ho koi ni.
Celë hi matre, eni ha methinë angeic.
9 Ngacama edröng angeice lo, ngo ceitui angeice hë me waco ka pi öni nge ka nyimu han;*
Itre xaa waco ka pi öni a sesë xötreith me heji angeic.
Trohemi, casi jë epun, epuni asë itre öni wael,
Trohemi nge öni jë.
10 Ala nyimu la itre ka thupë mamoe ka apatrene la ivineng;
Hnei angatre hna wajawaja la zing.
Hnei angatre hna angazon me nuetrije la zing ka mingöming, matre hnapapa pë hë.
11 Hnitre hë la zing.
Qaqacile hë ej;*
Öhne hi ni laka, hna angazon ej.
Hna angazon asë la nöj,
Ngo pëkö ka hane sikusikun.*
12 Hna traqa la itre ka apatren qa ngöne la nöjei hmene gojeny nyipine la hnapapa,
Ke kola apatren asë hnene la taua i Iehova, qa ngöne la ketre götrane la nöj uti hë la ketre.
Pëkö* ca ka mele tingeting.
13 Hnei angatr hna traa qitr, me menuë ka ithiny.
Ka gufa la itre trengecatre i angatr.
Tro angatr a hmahma fë la hna menuën
Pine la elëhni atraqatre i Iehova.”
14 Hane hi la hna qaja hnei Iehova: “Ame la itre nöj ezing ka iakötrë, ka lepe la nöj hnenge hna hamën nyine edrö i Isaraela nöjeng, ke tro ni a fejetriji angatr qa ngöne la nöje i angatr. Nge tro ni a fejetrije la angetre Iudra qaathei angatr. 15 Ngo thupene lai, tro hmaca ni a utipi angatr, me isa bëeke sai angatr kowe la nöje i angatr, me kowe la götran hna hamën nyine edrö i angatr.”
16 “Maine tro angatr a isine troa inine la aqane mele ne la nöjeng, me sisiny ngöne ëjeng me hape: ‘Maine nyipici laka, ka mele Iehova!’ tune lo hnei angatr hna inine la nöjeng troa sisinyi koi Baala, haawe, tro ha hetre göhne i angatr nyipine la nöjeng. 17 Ngo maine xele kö angatre ma dreng, tro fe hë ni a fejetrije la nöje ce. Tro ni a fejetrij me apatren ej,” öni Iehova.