Ieremia
2 Hnei Iehova hmaca hna ewekë koi ni, me hape: 2 “Tro jë a qaja kowe la itre atrene Ierusalema ka hape: ‘Hane hi la hna qaja hnei Iehova:
“Tha thëthëhmine kö ni lo ihnimi* ö ngöne lo eö petre kö a nekö jajiny,
Memine lo ihnim hnei ö hna amamane ngöne lo eö a troa föeng,
Mekune pala kö ni lo eö a xötrethenge ni ngöne la hnapapa,
Ketre götrane gaa pë feja.
3 Ame koi Iehova, ka hmitrötr la angetre Isaraela ekö, lo itre pane wen* hnei nyidrëti hna menuën.”’
‘Ame asë hi lo itre ka thel troa öni angeic, ke hetre zö i angatr asë.
Kola ha traqa koi angatr la akötr,’ öni Iehova.”
4 Drenge ju la itre trengewekë i Iehova, epun itre matra i Iakobo,
Me epuni asë itre fami ne la nöje Isaraela.
5 Hane hi la hna qaja hnei Iehova:
“Nemene la hnenge hna kuca kowe la itre keme i epun,
Matre tro pi angatr qaatheng,
Troa xötrethenge la itre idrola ka pë alien, matre tha ka nyipiewekë hë angatr enehila?
6 Tha hnei angatre kö hna hnying ka hape: ‘Ekaa Iehova,
Lo atre thepe së qa Aigupito,
Me tro sai së ngöne la hnapapa,
Nöje ka qaqacil nge gaa hetre hnaop,
Nöje gaa pë timin nge ka miti catr,
Nöje hna tha trongëne kö
Nge ka pë atren?’
7 Matre hnenge pë hë hna tro sai epun kowe la nöj gaa tru sinöe,
Matre tro epuni a xeni wen, me kapa la itre ewekë ka loi.
Ngo hnei epuni pe hna traqa troa apui ngazone la nöjeng;
Hnei epuni hna kuca matre tro la nöjeng* a ketre ewekë hna sisin.
8 Tha hnene kö la itre atre huuj hna hnying ka hape: ‘Ekaa Iehova?’
Ame la itre ka inine la Wathebo, ke thatre ni kö hnei angatr,
Hnene la itre atre thupë mamoe hna icilekeu me eni,
Hnene la itre perofeta hna perofetane ngöne la ëje i Baala,
Nge hnei angatre hna xötrethenge la itre haze ka pë eloin.
9 ‘Celë hi matre, tro hmaca kö ni a upezö epun,’ öni Iehova,
‘Nge tro hmaca kö ni a upezöne la itre api* i epun.’
10 ‘Ngo sasaithe pi la hnagejë uti hë la itre hnapet* ne Kitim nge wange ju.
Eje hi, upe jë la ketre a tro Kedara matre tro angeic a goeëne hnyawa;
Pane wange ju ka hape, hna hane fe traqa lai e cili.
11 Hapeu, hetre nöje kö ka nuetrije la itre haze i angatr, matre tro pena a thil kowe la itre xaa ewekë laka, tha itre haze kö?
Ngo hnene la nöjeng hna nyihnane la elolong, hnene la itre ewekë ka pë alien.
12 Hnengödrai fe, goeëne jë la ewekë celë nge haine jë;
Epi tro eö a meci hnei xou me hmengöhmengön,’ öni Iehova,
13 ‘Ke hnene la nöjeng hna kuca la lue ewekë ka ngazo:
Hnei angatre hna nuetriji ni, lo qeqe ne tim,
Nge hnei angatre hna kuje* la itre sima,
Itre sima ka thöni nge ka ae tim.’
14 ‘Hapeu, tha Isaraela kö la ketre hlu, maine ketre hlu hna hnahon ngöne la uma i maseta?
Nga hnauëne kö hö la kola atrekënö angeic?
15 Itre neköi liona a ho koi angeic;
Hnei angatr hna ho catr.
Hnei angatr hna kuca matre tra etë pe hi la nöje i angeic.
Hna manithe la itre traone i angeic matre pëhë atren.
16 Hnene la itre atrene Nofi me Tapanese hna xeni trootro hune la panatre i ö.
17 Hapeu, tha eö kö la qaane la jole cili
Lo eö a nuetriji Iehova Akötresi ö
Nge nyidrëti pe a eatrongë eö ngöne la gojeny?
18 Haawe, hnauëne pena la eö a thele la gojenyi ne tro Aigupito?
Nge hnauëne la eö a pi iji la itre tim ne Sihora?*
Hnauëne pena la eö a thele la gojenyi ne tro Asuria?
Nge hnauëne la eö a pi iji la itre tim ne la Hneopegejë?*
19 Loi e troa ameköti ö hnene la aqane iakötrë i ö,
Nge loi e troa haji ö hnene la aqane mele thoi i ö.
Atre ju nge trotrohnine ju laka, ka ngazo catr me haitr
La troa nuetriji Iehova Akötresi ö;
Tha hnei ö kö hna hane xoue ni,’ önine la Joxu Ka Sisitria, Iehova joxu ne la itre trongene isi e hnengödrai.
20 ‘Ke hneng ekö hna thë la ehnefe i ö
Me axeciëne la itre ceine i ö.
Ngo öni ö pe: “Tha tro kö ni a nyihlue i nyipë,”
Eje hi, ame ngöne la nöjei sasala ka draië me fene la nöjei sinöe ka cia hlöeë
Hnei ö hna saaju me nyi föe ne gojeny.
21 Hnenge hna traa eö tune la ivin ka madra, ketre feja ka nyipi lolo;
Ngo hnei ö hna tune kaa matre tro pena a tune la picine* trenyiwa ka ngazo qëmekeng?’
22 ‘Ngacama tro eö a wasi ö hnei sud me sië sop,
Ngo ame koi ni, tha tro kö a patr la aqane dro i ö,’ öni Iehova Joxu Ka Sisitria.
23 Tha hmahma kö eö troa qaja ka hape: ‘Tha ka pui ngazo kö ni.
Tha hnenge kö hna xötrethenge la itre Baala’?
Pane goeëne jë la gojenyi hnei ö hna xom ngöne la hnathup.
Nge mekune jë lo hnei ö hna kuca.
Ceitui ö me neköi kamela föe ka nyinyape catr,
Ka nyinyap agö me tro menu,
24 Me tune la boliko föe ka majemine tro ngöne la hnapapa,
Me punepun trongëne la enyi troa öhnyi trahmany.
Drei la ka atreine xom aconyi angeic la angeic a pi tro koi trahmany?
Goi tha tro ju kö la itre ka thele angeic a hmanono.
Ke tro kö angatr a öhnyi angeic ngöne la ijine kola itrokeu* la itre öni.
25 Loi ju hë, wanga tro eö a tro pë ibutr
Nge tro ha qaqacile la nyinawa i ö hnei pi ij.
Ngo öni ö: ‘Waea, nue ni pi!
Eni a hmo fë la itre trenyiwa,*
Nge angatre hi la hnenge hna troa xötrethenge.’
26 Tune la atrekënö ka hmahma la kola ee angeic,
Hnene fe la angetre Isaraela hna hmahma,
Angatr, me itre joxu i angatr, me itre nekö i joxu i angatr,
Me itretre huuj, me itre perofeta i angatr.
27 Öni angatr kowe la sinöe: ‘Eö la kemeng,’
Me kowe la etë: ‘Eö la ka hnaho ni.’
Ngo hnei angatre pe hna hutrö matre tha tro kö a goeë ni.*
Nge e tro angatr a akötr, tro angatr a hape,
‘Kuca jë la ketre ewekë, amele huni jë!’
28 Ngo ekaa ha lo itre haze i ö hnei ö hna kuca?
Upi angatre jë troa amele eö qa ngöne la akötr, e ijiji angatre hi,
Ke Iudra fe, nyimutre catre hë la itre haze i ö tune la itre traone i ö.
29 ‘Hnauëne laka, epuni pala hi a upezö ni?
Hnauëne laka, hnei epuni asë hna icilekeu me eni?’ öni Iehova.
30 Ase hë ni lepe la itre nekö i epun trahmany, ngo pëkö thangan.
Tha hnei angatre pi kö hna drenge la ihaji;
Itre sipu taua i epun la ka apatrene la itre perofeta i epun,
Tune la liona ka thele tha.
31 Nöjenge fe,* mekune ju la trengewekë i Iehova.
Hapeu, ceitunge hë me ketre hnapapa koi Isaraela
Maine tune la ketre nöje gaa mit nge hna xouen?
Hnauëne laka, kola qaja hnene la itre atrene la nöjeng ka hape: ‘Eahuni a ngenu trootro.
Tha tro hmaca kö huni a weje la hnalapa i nyipë’?
32 Hapeu, tro kö la nekö jajiny* a thëthëhmine la itre nyine thaip i angeic?
Nge tro kö la föe ka faipoipo a thëthëhmine la itre beletre* i angeic?
Ngo ekö hë thëthëhmi ni hnene la nöjeng.
33 Föe fe, atreine catre nyipo thele ihnim!
Hnei nyipoti hna inine la iaö me iakötrë.
34 Nge goi si madra fe hë la pune iheetre i nyipo
Lo madra ne la itre ka pë ewekë me pë engazon.
Ngo tha hnenge fe kö hna öhnyi angatr e lö juetrë ngöne la uma i nyipo.
Ame pe, kola si madra asë la pune iheetre i nyipo hnene la madra i angatr.
35 Ngo öni nyipoti pe: ‘Pëkö ngazong.
Ma patre hë la elëhni i nyidrëti koi ni.’
Ngo eni hë la a ameköti ö
Pine eö qaja ka hape, pëkö ngazo i ö.
36 Hapeu, ka xeti la he i ö matre eö a saze mekun lapa?
Tro hë eö a hmahma pi Aigupito,
Tune lo eö a hmahma pi Asuria.
37 Qa ngöne lai, tro eö a tro me hmahma,*
Ke hnei Iehova hna xele ma wang la itre hnei ö hna mejiune kow;
Tha ijiji angatre kö troa xatua eö.”