Ieremia
4 Hane hi la hna qaja hnei Iehova: “Isaraela fe, maine tro eö a kapa troa bëeke hmaca,
Me bëeke koi ni
Nge maine tro eö a xometrije qëmekeng la itre idrola i ö ka sis,
Tha tro kö eö lai a tune la atr ka kötr.
2 Nge maine tro eö a sisinyi ngöne la nyipici, me meköt, me thiina ka meköt ka hape:
‘Maine nyipici laka, ka mele Iehova!’
Ke tro hë la itre nöj a kepe manathithi qaathei nyidrë,
Nge tro hë angatr a sipu atrunyi angatr pi nyidrë.”
3 Ke hane hi la hna qaja hnei Iehova kowe la angetre Iudra me Ierusalema:
“Troone jë koi epuni la dro ka lolo,
Nge loi ju hë hna jumi feja nyipine la itre ka ithiny.
4 Xötrehatrenyi* epuni jë koi Iehova,
Nge xötrehatrene pi la itre hni i epun,
Angetre Iudra me Ierusalema,
Wanga tro ni a elëhni tune la eë
Ka manith asë nge pëkö ka atreine apin,
Pine la itre huliwa i epun ka ngazo.”
5 Qaja trongëne jë lai e Iudra, nge cainöjëne jë e Ierusalema.
Sue jë nge ufi trutru jë nyipine la nöj.
Suene jë ka hape: “Icasikeu jë,
Matre kötre zae jë së ngöne la itre traon hna eköhagen.
6 Acile jë la ketre ipoto* ka amamai gojenyi a tro Ziona.
Thele hnë zae jë nge the cile kö,”
Ke eni a axulune la akötr qa kolopi, ketre akötr atraqatr.
7 Cahmijë hë la atre lepe la itre nöj;
Hnei angeic hna fetra tune la liona ka zae ngöne la itre hnitr.
Hnei angeic hna tro qa ngöne la göhnë i angeic, matre lep angazon la nöje i ö.
Tro ha lep apatrene la itre traone i ö matre itra etë pe hi, nge pë hmaca kö atr ka troa lapan.
8 Haawe, heetrëne jë la itre bëek ka tru thenyin,
Hnëmeci jë* nge treije latresi jë,
Ke tha patre kö la elëhni atraqatre i Iehova koi së.
9 Hane hi la hna qaja hnei Iehova: “Ngöne la drai cili, tro ha hmengöhmengön* la hni ne la joxu i angatr,
Memine la hni* ne la itre nekö i joxu;
Tro la itretre huuj a xou nge tro la itre perofeta a sesëkötr.”
10 Matre öning: “Ekölöhini Iehova Joxu Ka Sisitria! Hnei nyipëti hna iaön la nöje ce, memine la angetre Ierusalema! Ke öni nyipëti lo: ‘Tro epuni a mele tingeting,’ ngo hna amë pe la taua fene la nyinawa hun.”
11 Ngöne la ijine cili, tro ha qaja kowe la nöje ce me kowe la angetre Ierusalema ka hape:
“Tro la enyi ka idreuth ne la itre sasala ka papa ne la hnapapa
A ufe la nekö jajinyi* ne la nöjeng;
Tha eje kö a traqa troa nyihnyawan me aporopëne la itre itine feja.
12 Eni la ka upe la enyi ka catrehnin qa ngöne la itre götrane cili.
Enehila, tro hë ni a ameköti epun.
13 Dreng! Tro la ithupëjia a xulu tune la itre iaw ka atrotrone la mani,
Nge tro la itre ikariota i angeic a traqa tune la udreli.
Ka nyape catre kö la itre hose i angeic hune la itre aeto.
Ekölöhini së, ke ka luzi hë së!
14 Ierusalema fe, wasine jë la hni i ö matre xometrije la iakötrë, nge matre mele pi ö.
Uti hë eu la tro eö a lapa fë la itre mekun ka ngazo?
15 Ke kola tro fë la maca qa Dana,
Nge kola cainöjëne la akötr qa ngöne la itre wetr e Eferaima.
16 Thuemacanyine jë lai, thuemacanyine jë la itre nöj;
Qaja jë lai matre ameköti Ierusalema.”
“Itre ka waipengöne* la nöj a traqa qa gaa nany,
Tro angatr a ewekë catr kowe la itre traon e Iudra.
17 Angatr a cile xötreithe la traon tune la itre ka thupë hlapa,
Ke hnei angeic hna icilekeu me eni,” öni Iehova.
18 “Tro eö a xeni pune la aqane ujë i ö me itre huliwa i ö.
Haitre catr la akötr ka lepi ö,
Matre goi traqa fe e kuhu hni i ö!”
19 Ekölöhini, meci hë ni* hnei xou! Meci hë ni hnei xou!
Atraqatre la akötr e kuhu hning.*
Kola manomano catr la wenethëhming.*
20 Drenge hë së laka, kola itrongëpi la itre akötr,
Ke ase hë lep asë la nöj.
Hna aca tro lepe la itre itateng,
Lo itre maano ka hakuth itre ej.
21 Uti hë eu la tro ni a öhne lo ipoto* ka amamai gojeny?
Uti hë eu la tro ni a drenge la mejene trutru?
22 “Ke ka xeti he la nöjeng;
Tha semesine ni kö hnei angatr.
Angatr la itre nekön ka thatreine waiewekë, nge ka pë inamacan.
Ka inamacane hi angatr troa kuca la ngazo,
Ngo thatreine pe angatr kuca la loi.”
23 Hnenge hna goeën la nöj, nge ka pë alien, nge hna nuetrij.
Hnenge hna goeëne la hnengödrai, nge patre hë la lai ne ej.
24 Hnenge hna goeëne la itre wetr, nge itre ej a hmengöhmengön,
Nge hna enienijën la itre sasala.
25 Hnenge hna goeën me öhne laka, pë hnyawa ha atr,
Nge goi kötre fe la nöjei waco ne hnengödrai.
26 Hnenge hna goeën me öhne laka, hnapapa pe hi la itre hlapa sinöe ngöne la nöj,
Nge hna thëtrij asë la itre traone i angeic.
Hna traqa lai qaathei Iehova,
Pine la elëhni atraqatre i nyidrë.
27 Ke hane hi la hna qaja hnei Iehova: “Tro ha nuetrije la nöj asë,
Ngo tha tro kö ni a apatren asë.
28 Celë hi matre tro ha hnëmec la nöj,
Me miti la hnengödrai.
Ke ase hë ni qaja, ase hë ni mekun,
Tha tro kö ni a saze mekun,* me bëeke kowe lo hnenge hna qaja.
29 Hnene la mejene la itre ka ti hos me huji pehna,
Matre kola kötr asë la traon.
Itre atr a zae ngöne la itre hnitr,
Me eli hugit.
Ase hë nuetrije la itre traon,
Nge pëhë ca atren.”
30 Haawe, nemene pë hë la nyine tro eö a kuca, nge ase hë lepi ö?
Hnei ö lo hna heetrë imano ka mama cil,
Me thaipi gool,
Me awetrewetrene la luemeke i ö matre mama hnyawa pi.
Ngo luzi kö la hnei ö hna hane amingömingö eö,
Ke ase hë nuetriji ö hnene lo itre ka aja eö;
Enehila, angatre pena ha a thele troa humuthi ö.
31 Eje hi, hnenge hna dreng la ketre ewekë kösë nin ne la ketre föe ka wezipo,
Tune la aqane xouen la föe ka hnahone la pane nekö i eahlo,
Lo nin ne la nekö jajinyi ne Ziona ka thatreine mano hnyawa.
Angeic a saathe la ime i angeic me hape:
“Ekölöhini, hmanono hë ni pine la itre ka ihumuth!”