Ieremia
6 Tribu ne Beniamina fe, zae ju nge ananyi Ierusalema pi.
Ufi trutru jë e Tekoa;
Amelene jë la ketre eë nyine nyihatr e Bethakerim!
Ke kola traqa la ketre akötr qa kolopi, ketre akötr atraqatr.
2 Ceitune hi la nekö jajinyi ne Ziona* me föe ka mingöming nge ka menyike thiina.
3 Tro la itre ka thupë mamoe a traqa me hnënge mamoe i angatr.
Tro angatr a acile la itre itat i angatr xötreithi angeic,
Nge tro angatr a isa thuan la itre mamoe hna ahnithe koi angatr.
4 “Hnëkë jë troa* isi me angeic!
Cile jë! Tro sa lepi angeic e midi!”
“Ekölöhini së, ke kola miti trootro la drai,
Nge kola ha miti catr!”
5 “Cile jë! Tro sa isi e jidr
Me thëtrije la itre ita ne thupe i angeic hna eköhagen.”
6 Ke hane hi la hna qaja hnei Iehova joxu ne la itre trongene isi e hnengödrai:
“Sa sinöe jë, nge acile jë la ketre ija matre isi me Ierusalema.
Tro ha amekötine la traone celë;
Ke hune kö la iaxösisi ngöne la traon.
7 Tune la sima ka alepanyine pala hi la tim,
Ketre tun, tro pala hi a hetre iakötrë thei angeic.
Iaxösisi pe hi me iapatreny la hna dreng;
Sine mec pe hi me akötr la hnenge hna öhn.
8 Ierusalema fe, drenge ju la hna hmekë eö wanga tro ni a trotriji ö me sisi ö;
Tro ni a kuca matre tro eö a ketre götran hna nuetrij nge ka pë atren.”
9 Hane hi la hna qaja hnei Iehova joxu ne la itre trongene isi e hnengödrai:
“Tro ha huj asë la itre ka lapa pe e Isaraela, tune la kola thupa la itre fini rezë tixenuë.
Line hmaca ju la ime i ö, tune la atre hu rezë.”
10 “Tro ni a ithanata koi drei? Nge tro ni a hmekë drei?
Drei la ka troa dreng?
Goeën! Ka sim* la lue hnangenyë i angatr, matre thatreine kö angatre dreng.
Goeën! Xele hë angatr ma wange la trengewekë i Iehova;
Tha madrine hë angatr kow.
11 Celë hi matre, tiqa ha ni hnene la elëhni i Iehova,
Nge thatreine hë ni xomihnin.”
“Nenge pi ej hune la nekönatr e cahu gojeny,
Hune la itre nekö trahmanyi ka icacaxeny.
Tro ha akalabusi angatr asë, itre trahmanyi me föi angatr,
Itre qatr me itre ka qatre catre hë.*
12 Tro ha hamën la itre uma i angatr koi itre xan,
Me itre hlapa i angatr, me itre föi angatr.
Ke tro ni a sathe la imeng matre amekötin la itre atrene la nöj,” öni Iehova.
13 “Eje hi, qaane ju hi la ka co uti hë la ka tru, angatr a isa huliwa qenatrekënö;
Qaane ju hi la perofeta uti hë la atre huuj, angatr a isa huliwa thoi.
14 Angatr a tupathe thoin troa aloine la mec* ne la nöjeng me hape:
‘Tingetinge hë! Tingetinge hë!’
Ngo pë pe tingeting.
15 Angatre kö a hmahmane la huliwa i angatr ka ngazo?
Waea, pëkö hmahma!
Goi thatre fe angatre la hmahma!
Celë hi matre, tro angatr a mala nyipine la itre ka mala ha.
Ame la eni a troa ameköti angatr, ke tro angatr a kei,” öni Iehova.
16 Hane hi la hna qaja hnei Iehova:
“Cile ju ngöne la hna ijejea nge goeëne jë.
Hnyinge jë ka hape, ekaa la itre gojenyi hnapan,
Hnyinge jë ka hape, ekaa la nyipi gojeny, nge trongëne jë,
Nge tro hë epuni a öhne la tingeting.”
Ngo öni angatre pe: “Waea, tha tro kö huni a trongën ej.”
17 “Nge hnenge hna iëne la itre ka thup, ka qaja ka hape:
‘Drenge ju la aqane ho ne la trutru!’”
Ngo öni angatr: “Waea, tha tro kö huni a dreng.”
18 “Haawe drenge ju, itre nöj!
Nge atre ju, itre ka icasikeu,
La ka troa traqa koi angatr.
19 Ihnadro fe, drenge ju!
Eni a axulun la ketre akötr kowe la nöje ce
Itre thangane la hnei angatr hna thele troa iakötrë,
Ke tha hnei angatre kö hna drenge la trengewekëng
Nge hnei angatr hna nuetrije la wathebong.”*
20 “Ame koi ö, ka nyipiewekë kö koi ni La libanu* hnei ö hna traqa fë qa Seba,
Me rozo ka pupui lolo hnei ö hna xom qa gaa nany?
Tha kapa kö ni la itre huuje ne dreuth asë* i epun,
Nge tha madrine kö ni la itre huuje i epun.”
21 Matre hane hi la hna qaja hnei Iehova:
“Tro ni a amë la itre nyine akein qëmeken la nöje ce,
Nge tro angatr a kei,
Ene la itre kem me kuku,
Memine la atre lapa ezin me sinee i angeic,
Nge tro asë hi angatr a mec.”
22 Hane hi la hna qaja hnei Iehova:
“Dreng! Kola traqa la ketre nöj qa kolopi,
Nge tro ha mejë la ketre nöj ka tru qa ngöne la itre götrane gaa nany ne la ihnadro.
23 Tro angatr a ea la tane pehna me jo.
Ka iakötrë nge ka pë utipin angatr.
Troa ulili la itre nine i angatr tune la hnagejë,
Angatr a tithe la itre hos.
Ame la angatr a cile xötrë, kösë ala casi hi angatr troa lepi ö, jajinyi ne Ziona.”
24 Drenge hë huni la mejen göi angatr.
Kola thip me pë trengecatr la lue ime hun;
Eahuni a hleuhleu,
Me akötr tune la föe ka hnaho.
25 The tro kö kowe la hlapa,
Nge the tro kö e cahu gojeny,
Ke hetre taua ne la ithupëjia;
Ngöne la nöjei götran, angeic a axouene la itre atr.
26 Nekö jajinyi ne la nöjeng,
Heetrëne jë la bëeke ka tru thenyin, nge ujëujë jë ngöne la hnatresij.
Treije latresi jë tune la kola hnëmeci ne la nekön ka cas,
Ke tro la atre apatren a aca tro traqa koi së.
27 “Hnenge hna hnëkë eö* matre troa tupa fao nyipine la nöjeng,
Ketre atr ka atreine waipengöne hnyawa la itre ewekë;
Hnëqa i ö troa thupën me goeëne hnyawa la aqane ujë i angatr.
28 Itre ka catre fë mekun asë hi angatr,
Nge ka ixöjetrije trootro.
Ceitui angatr me kopa me fao;
Angatr asë hi a kuca la itre ewekë ka ngazo.
29 Ase hë dreuthetrije la nyine ufi eë.
Itre plo pe hi la ka lö qa ngöne la eë.
Kolo pala hi a nyidrawan lapan, ngo pëkö thangan,
Ke tha hna xometrije kö la itre atr ka ngazo qa ngöne la nöj.
30 Eje hi, tro ha hë angatr, sileva hna trij,*
Ke ase hë Iehova triji angatr.”