Pane Tus i Aqane Lapa Itre Joxu

15 Nge hnei Dravita hna xupe hmaca la itre xa uma hnine la Traone i Dravita. Nge nyidrëti a hnëkëne jë la göhnene la Pua ne la nyipi Akötresie, me acil la ketre itat thatraqane la Pua. 2 Nge öni nyidrëti jë hi: “Pëkö xa atr ka troa kapa la Pua ne la nyipi Akötresie, ngo angetre Levi hmekuje hi, ke angatre hi la itre hna iën hnei Iehova troa kapa trongëne la Pua i Iehova, me nyihlue i nyidrë epine palua.” 3 Nge Dravita a acasine jë la nöje Isaraela asë e Ierusalema, matre troa xome la Pua i Iehova, me amë ngöne la göhnë hnei nyidrëti hna hnëkën.

4 Dravita a hëne jë la itre matra i Arona, me angetre Levi. 5 Nge thene la itre matra i Kohatha: Uriela la tan, me 120 lao trahmany ne la fami i angeic. 6 Nge thene la itre matra i Merari: Asaia la tan, me 220 lao trahmanyi ne la fami i angeic. 7 Nge thene la itre matra i Geresoma: Ioela la tan, me 130 lao trahmany ne la fami angeic. 8 Nge thene la itre matra i Elizafana: Semaia la tan, me 200 lao trahmany ne la fami angeic. 9 Nge thene la itre nekö i Heberona: Eliela la tan, me 80 lao trahmany ne la fami angeic. 10 Nge thene la itre matra i Uziela: Aminadaba la tan, me 112 lao trahmany ne la fami angeic. 11 Ketre, hnei Dravita fe hna hëne la itre atre huuj, Zadoka me Abiathara, me angetre Levi, Uriela, me Asaia, me Ioela, me Semaia, me Eliela, me Aminadaba. 12 Matre öni nyidrë: “Epun la itre tixe ne lapa ne la angetre Levi. Ahmitrötrë epuni jë, me itre trahmany ne la fami epun. Nge traqa fë pi la Pua i Iehova Akötresi Isaraela, kowe la göhnë hnenge hna hnëkën. 13 Ame lo xötrei, tha hnei epuni kö hna kapa la Pua, ke tha hne huni kö hna thele la nyipi aqane kuca. Celë hi matre, hna lepi huni hnene la elëhni Iehova Akötresi hun.” 14 Ame hnene la itre atre huuj me angetre Levi hna ahmitrötrë angatr, matre traqa fë la Pua i Iehova Akötresi Isaraela.

15 Thupene lai, hnei angetre Levi hna atë la itre tan ne la Pua hune la itre iape i angatr, me kapa trongëne la Pua ne la nyipi Akötresie, tune lo aqane amekötine koi Mose hnei Iehova. 16 Ame hnei Dravita hna upe la itre tan i angetre Levi troa iëne* la itre ka nyima hnine la fami angatr. Tro angatr a nyima madrin, me elon la itre nyine elo miuzik: itre nyine elo miuzik ka hetre filen, me arp, me sëbal.

17 Nge ngöne la itre tribu i angatr, hnene la angetre Levi hna ië Heman nekö i Ioela, me Asafa nekö i Berekia, me Ethana nekö i Kusaia qa ngöne la fami i Merari. 18 Nge ce angatr memine la itre trejin me angatr ne la hnaaluen lapa, ene, Zakaria, me Ben, me Iaziela, me Semiramoth, me Iehiela, me Uni, me Eliaba, me Benaia, me Maseia, me Matathia, me Elifelu, me Mikeneia, me Obed-edoma, me Ieiela, itre ka thupë qëhnelö. 19 Nge ame la itre ka nyima, Heman, me Asafa, me Ethana, qa i angatr troa elo sëbal kopa. 20 Nge ame Zakaria me Aziela, me Semiramoth, me Iehiela, me Uni, me Eliaba, me Maseia, me Benaia, qa i angatr troa elone la itre nyine elo miuzik ka hetre filen, nge hna kiin ngöne alamoth.* 21 Nge ame Matathia, me Elifelu, me Mikeneia, me Obed-edoma, me Ieiela, me Azazia, qa i angatr troa elone la itre arp hna kiin ngöne seminithi,* matre ameköti nyima. 22 Nge ame Kenania tane i angetre Levi, qa i angeic troa thupëne la aqane troa kapa trongëne la Pua, ke atre ka atrein. 23 Nge ame Berekia me Elekana, qa i nyidro troa thupë qëhnelö ezine la Pua. 24 Nge ame la itre atre huuj, Sebania, me Iehosafata, me Nathaniela, me Amasai, me Zakaria, me Benaia, me Eliezera, qa i angatr troa ufe catrëne la trutru qëmekene la Pua ne la nyipi Akötresie. Nge ame Obed-edoma, me Iehia, qa i nyidroti fe troa thupë qëhnelö ezine la Pua.

25 Nge hnei Dravita me itre qatr ne Isaraela, me itre tane la ala 1000, hna tro cememine la madrin, troa xom la pua ne isisinyikeu i Iehova qa hnine la hnalapa i Obed-edoma. 26 Nge pine laka, hna xatuane la angetre Levi hnene la nyipi Akötresie troa kapa trongëne la pua ne isisinyikeu i Iehova, hna huujëne la 7 lao neköi kau, me 7 lao nani. 27 Nge Dravita a heetrëne la iheetre ka hmelele, nge ka qea, nge ka pë imen, tune la itre atre Levi ka kapa trongëne la Pua, me itre ka nyima, me Kenania, lo atre thupëne la itre ka kapa la pua, me ka nyima. Nge Dravita a fena la iefoda* lino. 28 Nge hnene la angetre Isaraela asë hna xötrethenge la pua ne isisinyikeu i Iehova, nge kola sue madrin, me ufi nyimu pengöne trutru, me lepe sëbal, nge kola mexeme la mejene la itre nyine elo miuzik ka hetre fil, me itre arp.

29 Ngo ame ju hi la kola lö fë la pua ne isisinyikeu i Iehova hnine la traone i Dravita, hnei Mikala nekö i Saulo, hna tu qa ngöne mamala, me öhnyi Dravita joxu a kola fia, me sesë sesë, me feet. Eahlo a methinë Dravita ju e kuhu hni.