Deuteronomi

22 “Maine öhne hë eö laka, mele hë la kau maine mamoe ne la trejin me eö, tha tro kö eö a nu. Qa i ö pe troa bëeke fë kowe la trejin me eö. 2 Ngo maine ka nanyi la hnalapa ne la trejin me eö, maine thatre kö eö la atrekë sin, ke qa i ö troa tro fë la öni kowe la hnalapa i ö, me thupën ej uti hë la kola thel ej hnene la trejin me eö. Nge tro hë eö a nue eje hmaca kowe la trejin me eö. 3 Aqane tro hi ö lai a kuca kowe la boliko i angeic, me iheetre i angeic, me itre ewekë ka patr ne la trejin me eö. Tha tro kö eö a nue menun.

4 “Maine eö a öhne la boliko, maine kau ne la trejin me eö ka kei e cahu gojeny, tha tro kö eö a nuaxöji angeic. Ngo qa i ö pe troa xatuane la trejin me eö troa acilëne hmaca la öni.

5 “Tha tro kö la föe a heetrëne la itre iheetre i trahmany, ketre tune fe, tha tro kö la trahmany a heetrëne la itre iheetre i föe. Ke methi Iehova Akötresi ö la atre kuca la itre ewekë cili.

6 “Maine tro eö a tro me öhne la ketre trengene waco ka të hune isinöe, maine ka mala e kuhu hnadro, nge hetreny e kuhu hnine la itre neköi waco, maine itre wakuja, nge ithinen a hakuthe la itre nekön maine itre wakuja, ke tha tro kö eö a ce xome la thin me itre nekön. 7 Ngo tro pe eö a nue la thin, me xome la itre nekön, matre troa tro loi la mele i ö, nge tro eö a mel aqeany.

8 “Maine tro eö a xupi uma, qa i ö troa xupi hag xötreithe la hune uma, matre e tro la ketre atr a kei, tha tro kö a upezöne la fami i ö pine la madra hna anenin.

9 “Tha tro kö eö a traane la lue pengöne feja ngöne la vine i ö, wanga troa ce xome kowe la uma ne hmi la itre wen hnei ö hna menuën, memine la itre wene rezë i ö.

10 “Tha tro kö eö a isilekeune la kau memine la boliko göi troa uja dro.

11 “Tha tro kö eö a heetrëne la iheetr hna ce can hnei pene mamoe me lino.

12 “Qa i ö troa amë la itre eno hna isilekeun, ngöne la 4 lao kona ne la iheetr hnei ö hna heetrën.

13 “Maine tro la ketre trahmany a faipoipo me ce meköl memine la föi angeic, ngo tro angeic e thupen a methinëne* la föi angeic, 14 me qaja angazone la aqane ujë i eahlo, me adrone la ëje i eahlo me hape: ‘Hnenge hna xome la föe celë, ngo pëkö ka anyipicine koi ni ngöne la nyio a ce meköl laka, eahlo petre hi a hane ce meköl me trahmany.’ 15 E cili, qa ne la kem me thin ne la föe troa xome la hatrene laka, tha ka iatre pala kö eahlo me trahmany, me tro fë kowe la itre qatre thup ngöne la qëhnelö ne la traon. 16 Nge tro hë la kem a qaja kowe la itre qatre thup ka hape: ‘Hnenge hna hamëne la neköng kowe la trahmanyi ce, ngo hnei angeice pe hna methinë nyën, 17 me qaja angazone la aqane ujë ne la neköng me hape: “Pëkö ka anyipicine koi ni laka, tha ka iatre pala kö me trahmany la nekö i nyipë.” Ngo hane pe la hatren.’ Nge tro hë nyidroti a seluthe la iheetr qëmekene la itre qatre thup ne la traon. 18 Tro pë hë la itre qatre thup ne la traon a xome lai trahmany, me lepi angeic. 19 Nge tro angatr a upi angeic troa nyithupene la 100 sekele* sileva kowe la keme ne lai föe, pine angeic sili trengathoine la föe ne Isaraela. Tro pala kö nyën a föi angeic, nge tha tro kö angeic a seihnacil me nyën, uti hë la tro angeic a mec.

20 “Ngo maine nyipici hi la hna qaja hnei trahmany, nge pëkö ka anyipicin laka, tha ka iatre pala kö me trahmany, 21 tro ha tro fë la föe ngöne la qëhnelö ne la hnalapa ne la keme i angeic, nge tro la itre trahmany ne la traon a tranyi angeic hnei etë, ke hnei angeic hna kuca la ewekë hna hmahman e Isaraela ngöne la angeic a kuci ngazo* hnine la hnalapa ne la keme i angeic. Celë hi la aqane tro eö a apatrene la ngazo qaathei ö.

22 “Maine troa ea la trahmany ka ce meköl memine la föe ka faipoipo hë, tro ha ce humuthi nyidro, ene la trahmany memine la föe. Celë hi la aqane tro eö a apatrene la ngazo qa Isaraela.

23 “Maine tro la ketre trahmany a öhn ngöne la traon la ketre jajiny ka tha iatre pala kö me trahmany, ngo hna othe hë, nge tro angeic a ce meköl me nyën, 24 tro hë epuni a tro sai nyidro kowe la qëhnelö ne la traon, me tranyi nyidroti hnei etë, ene la jajiny, ke tha hnei angeice kö hna sue ngöne la traon, memine la trahmany, ke hnei angeic hna ahmahmane la föe ne la atre lapa ezi angeic. Celë hi la aqane tro eö a apatrene la ngazo qaathei ö.

25 “Maine tro la ketre trahmany a iöhnyi memine la ketre jajiny ngöne la itre hlapa, ngo hna othi nyëne hë, nge tro angeic a xolouthi nyën matre angazo nyën, tro hmekuje hi a humuthe la trahmany; 26 tha tro kö eö a kuca la ketre ewekë kowe la jajiny. Pëkö ngazo hnei nyën hna kuca, matre tha tro kö a humuthi nyën. Ame la ewekë cili hna kuca, ke ceitune hi memine la ketre trahmany a humuthe la atre lapa ezi angeic. 27 Ke hnene la trahmany hna iöhnyi memine la jajiny hna othe hë ngöne la hlapa, nge hnei nyën hna sue, ngo pëkö ka xatua nyën.

28 “Maine tro la ketre trahmany a iöhny memine la ketre jajiny ka tha iatre pala kö me trahmany nge tha hna othe kö, nge tro angeic a xolouthi nyën me angazo nyën, nge hna ee nyidro, 29 tro hë la trahmany a hamëne kowe la keme ne lai jajiny la 50 sekele sileva, nge tro hë nyën a föi angeic. Pine angeic ahmahmanyi nyën, tha ijiji angeice kö troa seihnacil me nyën uti hë la tro angeic a mec.

30 “Tha tro pi kö la ketre trahmany a faipoipo memine la föe ne la keme i angeic, wanga tro angeic a ahmahmane la keme i angeic.