Ezekiela
9 Thupene lai, hnei nyidrë hna sue catre kowe la lue hnangenyëng ka hape: “Hëne jë la itre ka troa amekötine la traon, nge tro angatr a isa traqa fë jia ne iapatreny!”
2 Ame hnenge hna öhne la 6 lao trahmanyi ka traqa qa ngöne la qëhnelö ka he koho, nge ka qëmek kowe la götrane kolopi. Angatr a isa cila xomi jia nyine lep anyilanyilan. Ce angatr memine la ketre atr ka heetrë lino, nge ka sili göne la trengene akr ne sekreter. Hnei angatr hna lö, me cil ezine la ita ne huuje kopa.
3 Thupene lai, hnene la elolo ne la Akötresi Isaraela hna mejë qa hune la itre kerubi a tro kowe la qene qëhnelö ne la uma. Ame hnei nyidrëti hna sue kowe la atr ka heetrë lino, nge ka sili göne la trengene akr ne sekreter. 4 Öni Iehova koi angeic: “Trongëne jë la traon ne Ierusalema, nge siji hatrene ju la göbadri ne la itre atr ka treij me awe, pine la nöjei ewekë ka sis hna kuca ngöne la traon.”
5 Nge drenge ju hi ni la nyidrëti a qaja kowe la itre xan ka hape: “Xötrethenge angeice jë ngöne la traon, nge lepe jë la itre atren. Loi e tha tro kö la alameke i epun a utipi angatr, me meku angatr. 6 Qaane ju hi la qatr, uti hë la nekö trahmany, me nekö jajiny,* me nekönatr, me föe, tro epuni a humuthi angatr asë. Ngo the easenyine pi kö la itre hna siji hatren. Nyiqaane jë hë qa ngöne la hnë hmi koi ni.” Matre hnei angatr hna nyiqaan qaathene la itre qatr ka cile qëmekene la uma. 7 Nge sa jë hi nyidrëti ka hape: “Apuingazone jë la uma, nge nyialiene jë la itre kur hnene la itre atr hna humuth. Öi tro jë hë!” Ame hnei angatr hna tro me lepe la itre atrene la traon.
8 Angatre pala kö a lepe la itre atr, nge mama ju hi laka, eni pe hi la ka mel. Ame hnenge hna kei qe ipië me sue ka hape: “Ekölöhini! Iehova fe Joxu Ka Sisitria! Tro kö nyipëti a apatren asë la angetre Isaraela ka mele pe, hnene la trengehni i nyipë koi Ierusalema?”
9 Matre öni nyidrë: “Atraqatre la ngazo i Isaraela me Iudra. Tiqa ha la nöj hnei ihumuth, nge ase hë haöthe la traon hnei huliwa qenatrekënö, ke öni angatr: ‘Ase hë Iehova trotrije la nöj, nge tha öhne kö Iehova.’ 10 Ngo ame kö ni, tha tro kö la alamekeng a utipi angatr, nge ketre tha tro kö ni a meku angatr. Tro ni a axulune koi angatr la itre thangane la aqane ujë i angatr.”
11 Thupene lai, hnenge hna öhne lo atre heetrë lino ka sili göne la trengene akr, a qaja la huliwa hnei angeic hna kuca me hape: “Ase hë ni kuca tune lo hnei nyipë hna upi ni.”