Itre Treije i Ieremia
א [Aleph]
2 Ekölöhini! Ase hë Iehova heetrën la nekö jajinyi ne Ziona hnene la iaw ne la elëhni i nyidrë!
Hnei nyidrëti hna kuiën kowe la fen la emingömingö i Isaraela.
Tha hnei nyidrëti kö hna mekun la tane ca i nyidrë, ngöne lo nyidrëti a elëhni.
ב [Beth]
2 Pëkö utipine i Iehova lo nyidrëti a apatren la itre hnalapa i Iakobo asë.
Hnei nyidrë hna thëtrije la itre hna eköhagen ne la jajinyi ne Iudra, hnene la trengehni i nyidrë.
Hnei nyidrëti hna trij e kuhu hnadro, me apuingazone la itre nekö i joxu i angeic me baselaia.
ג [Gimel]
3 Ngöne la trenge elëhni i nyidrë, hnei nyidrëti hna cipane la trengecatre* koi Isaraela.
Hnei nyidrëti hna hule la ime maca i nyidrë ngöne la kola easeny la ithupëjia,
Nge e Iakobo, hnei nyidrëti pala hi hna mele tune la eë ka dreuthetrij asë xötreithi ej.
ד [Daleth]
4 Hnei nyidrëti hna huji* tane pehna tune la ithupëjia, nge ka hnëkë hë la ime maca i nyidrë troa isi tune la ithupëjia;
Tha mano kö nyidrë humuth la nöjei atr hna pi goeën.
Nge hnei nyidrëti hna nenge la trengehni i nyidrë tune la eë, ngöne la itate ne la nekö jajinyi ne Ziona.
ה [He]
5 Ceitu i Iehova hë me ketre ithupëjia;
Hnei nyidrëti hna ulumi Isaraela.
Hnei nyidrëti hna ulum la itre ita ne thup i angeic asë;
Hnei nyidrëti hna thëtrij asë la itre hna eköhagen i angeic.
Nge thene la nekö jajinyi ne Iudra, nyidrëti a nyixane la hnëmec me itre treije latresi.
ו [Waw]
6 Nyidrëti a apatrene la ihmelekap i nyidrë, kösë neköi kaban ngöne la djardë.
Hnei nyidrëti hna nyipune* la feete i nyidrë.
Hnei Iehova hna kuca matre thëthëhmine pi la itre feet me itre sabath e Ziona,
Nge ngöne la elëhni i nyidrë, tha nyipiine kö nyidrëti la itre joxu me itre atre huuj.
ז [Zayin]
7 Hnei Iehova hna nuetrij la ita ne huuj i nyidrë;
Hnei nyidrëti hna sisine la hnë hmi i nyidrë.
Hnei nyidrëti hna nue la itre ita ne thup ka catr e Ziona kowe la itre ithupëjia.
Hna isueny hnine la uma i Iehova tune la kola feet.
ח [Heth]
8 Ase hë Iehova mekun troa apatren la ihag ne la nekö jajinyi ne Ziona.
Hnei nyidrëti hna hul la eno nyine tuluth.
Tha hnei nyidrëti kö hna sawa la ime i nyidrë troa apatren.*
Nyidrëti a kuca matre hnëmeci jë la hna eköhagen memine la ihag.
Patre hë la trengecatre i nyidroti asë.
ט [Teth]
9 Lö hë e kuhu hnadro la itre qëhnelö i angeic.
Hnei nyidrëti hna axeciën me hutra la itre agö ne acatrei qëhnelö.
Isa ije hë la joxu me itre nekö i joxu i angeic nyipine la itre nöj.
Pëhë wathebo;* goi tha hamëne fe Iehova la itre hna meköle goeën kowe la itre perofeta.
י [Yod]
10 Itre qatr ne la jajinyi ne Ziona a lapa thaup e kuhu hnadro.
Angatr a heetrë ibëek ka tru thenyin, me sië dron la he i angatr.
Hnene la itre jajinyi* ne Ierusalema hna thil e kuhu hnadro.
כ [Kaph]
11 Hmanono hë la luemekeng hna treij.
Tha loi kö la hning.*
E kuhu hnadro asë hë la itre alien ne la idreng, ke kei hë la nekö jajinyi* ne la nöjeng,
Nge kei hë la itre nekönatr me itre medreng ngöne la traon.
ל [Lamed]
12 Tha mano kö angatre sipo xen me nyine ij* kowe la itre thine i angatr,
Ngo angatre pe a kei ngöne la traon tune la atr ka eatr,
Me mec ngöne la lue ime ne la itre thine i angatr.
מ [Mem]
13 Tro ni a qeje drei koi ö?
Tro ni a aceitunë eö me drei, nekö jajinyi ne Ierusalema?
Tro ni a aceitunë eö me nemen matre aupunyi ö, nekö jajiny* ne Ziona?
Ke atraqatre la akötre i ö tune la hnagejë. Drei la ka atreine aloinyi ö?
נ [Nun]
14 Itre trengathoi ka pë alien lo hna meköle goeën hnene la itre perofeta i ö göi ö,
Nge tha hnei angatre kö hna qaja amaman la ngazo i ö, matre tha tro kö a kötre sai ö,
Ngo itre trengathoi me itre trenge iaö pe hi la hnei angatr hna meköle goeëne göi ö.
ס [Samekh]
15 Ame asë hi la itre ka tro e cahu gojeny, angatr a sisi ö me xexe.
Angatr a sesëkötr, me qej, me nangenang, la angatr a goeën la nekö jajinyi ne Ierusalema. Öni angatr:
“Hapeu, tha celë kö lo traon hna lapaa qaja ka hape: ‘Ka sisitria la emingömingön ej, nge ej a amadrinëne la fen asë’?”
פ [Pe]
16 Hnene la nöjei ithupëjia me eö hna xöjetriji ö.
Angatr a qej me kiki nyö, me hape: “Ase hë huni ulumi angeic.
Traqa ha la drai hne së hna lapaa treqen! Traqa ha, nge öhne hë së!”
ע [Ayin]
17 Ase hë Iehova kuca la hnei nyidrë hna mekun; hnei nyidrëti hna eatrën la trengewekë i nyidrë,
Lo hnei nyidrë hna amekötin ekö.
Pëkö utipine i nyidrë la nyidrëti a apatren asë.
Hnei nyidrëti hna nue la ithupëjia troa madrin la ewekë ka traqa koi ö; hnei nyidrëti hna aegöcatren* la itre ithupëjia me eö.
צ [Tsade]
18 Itre ihag ne la nekö jajinyi ne Ziona fe, itre atren la nöj a hë draië Iehova qa kuhu hni.
Epi tro la itre trenge timidra i ö a kaca tune la itre tim, e lai me jidr.
The mano kö, nge the nue kö la luemeke i ö troa meek.
ק [Qoph]
19 Cile jë! Sue jë ngöne la jidr, ngöne la kola nyiqane la itre jidr.*
Nenge pi koi Iehova la ka ej e kuhu hni i ö kösë tim.
Xejë jë la lue ime i ö koi nyidrë, matre mele pi la itre nekö i ö,
Lo itre ka kei e cahu gojeny* hnei mecijiin.
ר [Resh]
20 Iehova fe, pane goeëne jë la nöj hnei nyipëti hna lep angazon.
Hapeu, tro pala kö la itre föe a öni la itre sipu nekö* i angatr ka egöcatr*?
Tro pala kö a humuth la itre atre huuj, me itre perofeta ngöne la hnë hmi i Iehova?
ש [Shin]
21 Kola imekölenyi la itre nekö trahmany me itre qatr ka mec e cahu gojeny.
Hna humuthe hnei taua la itre nekö trahmany me itre nekö jajinyi* theng.
Ngöne la drai ne elëhni i nyipë, hnei nyipëti hna humuth me apatren nge pëkö utipine i nyipë.
ת [Taw]
22 Nyipëti a hëne la itre akötr qa ngöne la nöjei götran, kösë kola traqa itrony troa feet.
Ngöne lo drai ne elëhni i Iehova, pëkö ka atreine kötr, nge pëkö ka mel;
Ame lo itre hnenge hna hnahon* me hian, ke hna humuthi angatr hnene la ithupëjia.