Ezekiela

6 Ame hnei Iehova hna ithanata hmaca koi ni me hape: 2 “Nekö i atr, xei jë kowe la itre wetre ne Isaraela, nge perofetane jë la hnëjin ka troa traqa koi angatr. 3 Hape jë: ‘Itre wetre ne Isaraela fe, drenge ju la hna qaja hnei Iehova Joxu Ka Sisitria: Hane hi la hna qaja hnei Iehova Joxu Ka Sisitria kowe la itre wetr, me itre sasala, me itre tim ka neni, me itre hnathup: “Eni hë la a upe la taua troa lepi epun, me apatrene la itre hnë hmi gaa hmitrötre i epun. 4 Tro ha thëtrij la itre ita ne huuje i epun, me akaqan la itre ita ne dreu ka pui loi i epun. Nge tro ni a hnatrij e kuhu hnadro la itre ka meci hë thei epun, qëmeken la itre idrola ka sisi* epun. 5 Tro ni a hnatrij la angetre Isaraela ka mec qëmekene la itre idrola i angatr ka sis, me kuiën la itre june i angatr xötreithe la itre ita ne huuje i epun. 6 Ngöne la nöjei götran hnei epuni hna lapan, tro ha apatren la itre traon, me angazon me thëtrije la itre hnë hmi gaa hmitrötr. Tro ha thëtrij la itre ita ne huuje i epun, eje hi, tro ha akein itre ej. Tro ha apatren la itre idrola i epuni ka sis, me thë la itre ita ne dreu ka pui loi, me nöjei ewekë hnei epuni hna xup. 7 Tro la itre hna humuth a kei nyipi epun, nge tro hë epuni a atre laka, Iehova ni.

8 “‘“Ngo tro kö ni a nuamelen la itre xan. Eje hi, tro la itre xan a triane la taua nyipine la itre nöj, ngöne la ijine troa aisaije epun. 9 Nge tro la itre ka mele pe a meku ni hmaca, ngöne la itre nöj hna akalabusi angatre ngön. Tro hë angatr a trotrohnin laka, hnei angatr hna akötrën la hning, lo angatr a tha mele nyipici,* me trotriji ni, me meci* goeëne la itre idrola ka sis i angatr. Nge tro hë angatr a hmahma me sisin la nöjei ewekë ka ngazo me ka sis hnei angatr hna kuca. 10 Nge tro hë angatr e cili a atre laka, Iehova ni, nge tha eni kö a ihnyima la eni a qaja la itre akötr ka troa lepi angatr.”’

11 “Hane hi la hna qaja hnei Iehova Joxu Ka Sisitria: ‘Xexe pi, wajawaja ju, nge treije latresi jë pine la itre ewekë ka ngazo me ka sis hna kuca hnene la nöje Isaraela, ke tro ha humuthi angatr hnei taua, me jiin, me itre meci ka ixötrekeu. 12 Tro ha humuthe la atr ka mel e gaa nany hnene la meci ka ixötrekeu. Nge tro la ka lapa easeny a meci hnei taua. Nge ame pë hë la itre ka troa trian la lue ewekë cili, ke tro hë angatr a mec hnei jiin. Eje hi, tro ni a nue asë la trengehning koi angatr. 13 Nge tro hë epuni a atre e cili laka, Iehova ni, e meköle hë la itre ngönetrei ka mec nyipine la itre idrola ka sis, me xötreithe la itre ita ne huuje i angatr, me hune la itre sasala ka draië, me hune la nöjei wetr, me fene la itre sinöe ka cia hlöeë, me itre wapicine la itre sinöe atraqatr, ene lo nöjei götran hnei angatr hna majemine tro fë huuj ka pui lolo, matre aupune la elëhni ne la itre idrola i angatr ka sis. 14 Tro ni a sathe la imeng troa lepi angatr, me apatrene la nöjei atrene la nöj. Nge loi ju kö la hnapapa ne Dibela elany, hune la itre götran hnei angatr hna lapan. Nge tro hë angatre lai a atre laka, Iehova ni.’”