Ezekiela

26 Ame ngöne la hna 11 ne macatre, ngöne la pane drai ne la treu, hnei Iehova hna ewekë koi ni me hape: 2 “Nekö i atr, öni Turo göi Ierusalema ka hape: ‘Haha! Ase hë thöne la qëhnelö, lo hna majemine lö hnene la itre nöj! Nge pine laka, patre hë ej enehila, tro hë la nöjei ewekë a celë thenge theng, nge tro hë ni a trenamo!’ 3 Matre hane hi la hna qaja hnei Iehova Joxu Ka Sisitria: ‘Turo fe, tro ni a lepi ö, me amejëne koi ö la itre nöje ka nyimutre, tune la aqane amejën la itre hoke ne gejë hnene la hnagejë. 4 Tro angatr a thë la itre ngöne uma ne Turo, me akeine la itre ita ne thupe i angeic. Tro ni a jigetrije la dro, me kuca matre tro ej a tune la etë ka jijia me melemel. 5 Tro hë ej a tune la ketre hnë jöne la itre ifile nyipine la hnagejë.’

“‘Ke ase hë ni qaja,’ öni Iehova Joxu Ka Sisitria, ‘nge tro hë ej a ketre ewekë nyine thapa hnene la itre nöj. 6 Tro ha humuthe hnei taua la itre ka lapane la itre hunahmi,* nge tro hë angatr a atre laka, Iehova ni.’

7 “Ke hane hi la hna qaja hnei Iehova Joxu Ka Sisitria: ‘Tro ni a hë Nebukaneza* joxu ne Babulona qa kolopi, matre lepi Turo. Ketre joxu lai ka mus kowe la itre xaa joxu, nge ka trene hos me itre ikariota, me itre ka ti hos, me ketre trongene isi ka tiqa hnei soc.* 8 Tro angeic a humuthe hnei taua la itre ka lapane la itre hunahmi i ö, me xupe la ketre ihage ne isi, me acile la ketre ija ne isi. Nge tro angeic a acil qëmekei ö la ketre petr atraqatr. 9 Tro angeic a thë la itre ngöne uma i ö memine la nyine jei qëhnelö,* me sa la itre ita ne thupe i ö hnei ze.* 10 Tro hë eö a si dro hnene la etrune la itre hos i angeic. Nge ame hë la angeic a troa lö qa ngöne la itre qëhnelö i ö, tune la kola aca tro lö la itre soc hnine la ketre traon laka, kei hë la itre ihag, tro hë eö a dreng la kola hmengöhmengöne la itre ngöne uma i ö, hnene la mejen ne la itre ka ti hos, me itre wil, me itre ikariota. 11 Tro la itre hos i angeic a wajawaja la nöjei gojenyi ö; tro angeic a humuthe la nöje i ö hnei taua, me akeine la itre ikapa atraqatre i ö. 12 Tro ha thapa la itre mo i ö, nge tro ha atrekënö la itre ewekë i ö nyine salem, me akeine la itre ngöne uma i ö, me thë la itre hnalapa i ö ka mingöming. Thupene lai, tro ha kuiënetrij la itre etë i ö, me itre sinöe i ö, me dro i ö hnine la tim.’

13 “‘Tro ni a apatrene la mejene la itre nyima i ö, nge tha tro hmaca kö a drenge la mejene la itre arp i ö. 14 Tro ni a kuca matre tro ej a tune la etë ka jijia me melemel, nge tro hë eö a tune la ketre hnë jö ifile. Tha tro hmaca kö a xupi ö, ke ase hë ni Iehova qaja,’ öni Iehova Joxu Ka Sisitria.

15 “Hane hi la hna qaja koi Turo hnei Iehova Joxu Ka Sisitria: ‘Hapeu, tha tro kö a hmengöhmengöne la itre hnapet, la angatr a drei mejen la aqane kei ö, me aqane awe ne la itre ka mec,* la kola traqa la ihumuth thei ö? 16 Tro asë hi la itre tan ne hnagejë a uti qa ngöne la itre therone i angatr, me una la itre ikotre i angatr ka qea*, me itre iheetre i angatr hna sili drelan, nge tro hë* angatr a hmengöhmengön. Tro hë angatr a lapa e cahu hnadro, nge tro pala hi angatr a hmengöhmengön, me sesëkötre ngazo la kola goeë eö. 17 Tro angatr a thinge la nyima ne latresi* ka qeje eö, me hape:

19 “Ke hane hi la hna qaja hnei Iehova Joxu Ka Sisitria: ‘Ame hë la eni a troa lepe la traone i ö, tune lo itre traon ka pë atren, nge ame hë la eni a troa heti ö hnene la itre tim ka holehol, nge tro la itre tim ka catr a heetrë eö, 20 eö me itre ka ce uti me eö koi hnaop, tro hë ni a tro sai epun kowe la nöj ka hekö; eje hi, tro ni a alapa eö ngöne la itre götrane gaa jui, tune lo itre götran ekö hna apatren, me itre atr ka uti koi hnaop,* matre tha tro hmaca kö a hetre atr ka lapa thei ö. Thupene lai, tro hë ni a atrune* la nöje ne la itre ka mel.

21 “‘Tro ni a aca tro axulune koi ö la xou, nge tro hë eö a patr. Tro ha thel eö, ngo tha tro hmaca kö a öhnyi ö,’ öni Iehova Joxu Ka Sisitria.”