Ezekiela

40 Ame ngöne la hna 25 ne macatre thupene la hna kötre sai hun, lo kola nyiqaane la macatre, ngöne la drai 10 ne la treu, ene la hna 14 ne macatre thupene la kola thapa la traon, ke hnene la mene i Iehova hna huliwa* theng ngöne ju kö la drai cili, me tro sai ni ngöne la traon. 2 Jëne la ketre hna meköle goeëne qaathei Akötresie, hnei nyidrë hna tro sai ni a tro Isaraela me ami ni hune la ketre wetr ka draië catr. Hune la wetre cili, e kolojë, hetre ewekë hna xup ka ceitu me traon.

3 Ame la nyidrëti a tro sai ni a tro cili, hnenge hna öhne la ketre atr ka ceitu me kopa. Angeic a ea la eno nyine tulu hna kuca hnei lino, me ca rozo nyine tulu,* nge angeic a cil ngöne qene qëhnelö. 4 Öni angeice koi ni: “Nekö i atr, goeëne hnyawa ju, drenge hnyawa ju, nge xolouthe* hnyawa ju la nöjei ewekë hnenge hna amamane koi ö, ke celë hi lai kepin matre hna tro sai ö a tro ce. Ame asë hi la hnei ö hna troa öhn, ke qejepengön asë jë kowe la nöje Isaraela.”

5 Ame hnenge hna öhne la ketre ngöne uma ka ekögölithe la uma ne hmi.* Nge kola ea hnene la trahmany la rozo nyine tulu ka 6 kubit (hna nyixane la isa ca kubit hnei ca hnatrapaim)*. Ame hnei angeic hna nyiqaane tuluthe la ngöne uma: traqa koi ca rozo la ehmekönin, nge ca rozo la edraiën.

6 Thupene lai, hnei angeic hna tro kowe la qëhnelö ka qëmeke koië, nge hnei angeic hna elëne lai eskalie. Hnei angeic hna tuluthe la qene qëhnelö: traqa koi ca rozo la ejuin, nge ketre tune fe kowe la ketre qene qëhnelö. 7 Ame asë hi la itre hnahage ne thup, ke traqa koi ca rozo la eqeane nge ca rozo la eisaisan, nge traqa koi 5 kubit nyipine la itre hnahage ne thup. Nge ame la qene qëhnelö ne la poretiko ezine la qëhnelö (ka lö a tro koho hnin), ke ka ca rozo la eqean.

8 Hnei angeic hna tuluthe la poretiko hune la qëhnelö (ka lö a tro koho hnin): traqa koi ca rozo. 9 Thupene lai, hnei angeic hna tuluthe la poretiko hune la qëhnelö nge traqa koi 8 kubit; hnei angeic hna tuluthe la lue ikapa ka cil ezin, nge traqa koi 2 kubit. Ame la poretiko hune la qëhnelö, ke ej a qëmek a tro koho hnin.

10 Hetrenyi la köni hnahage ne thup ngöne la lue götran ne la qëhnelö ka he koië; casi hi la etrune la köni hnahag. Nge casi hi la eqeane la itre ikapa ka cil ngöne la lue ezin.

11 Thupene lai, hnei angeic hna tuluthe la qene qëhnelö, nge traqa koi 10 kubit la eisaisan; nge traqa koi 13 kubit la eqean ne la qëhnelö.

12 Ngöne la lue götran, hetrenyi qëmekene la itre hnahag ne thup la ketre neköi götran ka ca kubit, nge hna thing hnene la neköi ihag etë. Nge traqa koi 6 kubit la eqean la itre hnahage ne thup ngöne la lue götran.

13 Thupene lai, hnei angeic hna tuluthe la qëhnelö qa ngöne la hune uma ne la ketre hnahag ne thup, uti hë la ketre: traqa koi 25 kubit la eisaisan; ka iqëmekekeu la hnë lö ne la lue hnahage ne thup. 14 Thupene lai, hnei angeic hna tuluthe la itre ikapa ka cil ngöne la lue ezin, nge traqa koi 60 kubit la edraiën. Nge ketre tune fe kowe la itre ikapa ka cil ezin la itre qëhnelö xötreithe la kur. 15 Qa ngöne la qëhnelö ka qëmek kowe hnë lö, uti hë la qëhnelö ka qëmek kowe la poretiko (ka lö a tro koho hnin), ke traqa koi 50 kubit.

16 Thupen la kola lö ngöne la qëhnelö, hetrenyi ngöne la lue götran ne la itre hnahag ne thup, me itre ikapa ka cil ngöne la lue ezin, la itre mamalama ka co kötre trootro. Nge hetrenyi fe la itre mamala ngöne la lue götran ne la poretiko. Nge hna xuj* la itre pama hune la itre ikapa.

17 Thupene lai, hnei angeic hna tro sai ni kowe la kur e kuhu trön, nge hnenge hna öhne la itre hnahag hnë xen, me ketre dal hna xup xötreithe la kur. Nge hune lai dal, hetrenyi la 30 lao hnahag hnë xen. 18 Casi hi la eqean la dal ngöne la lue götran la itre qëhnelö, memine la eqean la itre qëhnelö: celë hi dal ka he fen.

19 Thupene lai, hnei angeic hna tuluthe la enanyine* qa ngöne la qëhnelö e kuhu, uti hë la ifego ne la kur. Nge ame e koië me e kolojë, ke traqa koi 100 kubit.

20 Hetre qëhnelö ngöne la kur e kuhu trön, ka qëmek a tro kolopi. Ame hnei angeic hna tuluthe la eqean me eisaisan la qëhnelö. 21 Nge ngöne la lue götran, hetrenyi la köni hnahage ne thup. Nge casi hi la edraiëne la itre ikapa memine la poretiko e cili, memine lo pane qëhnelö. Traqa koi 50 kubit la eqean, nge 25 kubit la eisaisan. 22 Casi hi la edraiëne la itre mamala me poretiko me itre pama hna xuj,* memine lo itre hna kuca ngöne la qëhnelö e koië. Troa elëne la eskalie ka 7 lao hnë tro waja a tro cili, nge ej e qëmeken la poretiko.

23 Hetre qëhnelö ngöne la kur ka he hnin, ka qëmek kowe la qëhnelö e kolopi, me ketre ka qëmek kowe la qëhnelö e koië. Hnei angeic hna tuluthe la enanyine la lue qëhnelö: traqa koi 100 kubit.

24 Thupene lai, hnei angeic hna tro sai ni a tro kolojë, nge hnenge hna öhne la ketre qëhnelö e kolojë. Hnei angeic hna tuluthe la itre ikapa ngöne la lue ezin, memine la poretiko: casi hi la edraiën memine lo itre xan. 25 Ezine la qëhnelö cili memine la poretiko, hetre mamala ngöne la lue götran ka ceitu memine lo itre xan. Traqa koi 50 kubit la eqean, nge 25 kubit la eisaisan. 26 Troa elëne la eskalie ka 7 lao hnë tro waja a tro cili, nge ej e qëmeken la poretiko. Nge hna xuje* la isa ca ipama hune la itre ikapa ka cil ngöne la lue ezin.

27 Hetre qëhnelö ngöne la kur ka he hnin, ka qëmek a tro kolojë. Hnei angeic hna tuluth a tro kolojë la enanyine la ketre qëhnelö kowe la ketre: traqa koi 100 kubit la iananyin. 28 Thupene lai, hnei angeic hna lö sai ni ngöne la kur ka he hnin, jëne la qëhnelö e kolojë. Ame hnei angeic hna tuluthe la qëhnelö e kolojë: casi hi la edraiën ej me itre xan. 29 Nge ceitune hi la edraiëne la itre hnahage ne thup, me itre ikapa ka cil ngöne la lue ezin me poretiko, memine lo itre xan. Hetre itre mamala ngöne la lue götran lai qëhnelö, memine la poretiko ne ej. Traqa koi 50 kubit la eqean, nge 25 kubit la eisaisan. 30 Nge hetre itre poretiko xötreith; traqa koi 25 kubit la eqean, nge 5 kubit la eisaisan. 31 Ame la poretiko cili, ej a qëmek kowe la kur ka he kuhu trön; hna xuje* la itre ipama hune la itre ikapa ka cil ngöne la lue ezin, nge troa elëne la eskalie ka 8 lao hnë tro waja a tro cili.

32 Ame la angeic a lö sai ni qa ngöne la götrane koië a tro kowe la kur ka he hnin, hnei angeic hna tuluthe la qëhnelö: casi hi la edraiën ej me itre xan. 33 Nge ceitune hi la edraiëne la itre hnahage ne thup, me itre ikapa ka cil ngöne la lue ezin me poretiko, memine lo itre xan. Hetre itre mamala ngöne la lue götran ne lai qëhnelö, memine la poretiko ne ej. Traqa koi 50 kubit la eqean, nge 25 kubit la eisaisan. 34 Ame la poretiko cili, ej a qëmek kowe la kur ka he trön; hna xuje* la itre ipama hune la lue ikapa ka cil ngöne la lue ezin, nge troa elëne la eskalie ka 8 lao hnë tro waja a tro cili.

35 Thupene lai, hnei angeic hna lö sai ni ngöne la qëhnelö e kolopi, me tuluth ej: casi hi la edraiën me itre xan. 36 Nge ceitune hi la itre hnahage ne thup, me itre ikapa ka cil ngöne la lue ezin me poretiko, memine lo itre xan. Hetre mamala ngöne la lue götrane lai qëhnelö, nge traqa koi 50 kubit la eqean ej, me 25 kubit la eisaisan ej. 37 Ame la itre ikapa ngöne la lue ezin, itre ej a qëmek kowe la kur ka he trön; hna xuje* la itre ipama hune la lue ikapa ka cil ngöne la lue ezin, nge troa elëne la eskalie ka 8 lao hnë tro waja a tro cili.

38 Ezine la itre ikapa ne qëhnelö hetre hnahag hnë xen memine la hnë lö kow. E cili hi la hnë wasine la itre huuj ne dreuth asë.*

39 Ngöne la lue götrane la poretiko ne la qëhnelö cili, ke hetrenyi la lue laulau hnë humuthe la itre huuj ne dreuth asë, me itre huuj ne ngazo,* me itre huuj ne qeje menu.* 40 Nge ame ngöne la götran hnë lö kowe la qëhnelö e kolopi, ke hetrenyi la lue laulau e kuhu trön. Nge hetre lue xaa laulau ngöne la ketre götrane la poretiko ne la qëhnelö. 41 Matre traqa koi 4 lao laulau ngöne la isa götrane la qëhnelö (traqa jë kö koi 8). Nge hna humuthe la itre huuj hune itre ej. 42 Hna xupe hnei etë la 4 lao laulau thatraqane la itre huuje ne dreuth asë. Traqa koi ca kubit nge sin la eqean ej, me ca kubit nge sine la eisaisan, me ca kubit la edraiën. Hna atë hune la itre laulau cili, la itre nyine humu huuj ne dreuth asë, me itre xaa huuj. 43 Nge hna acatrene la itre etazer ka ca hnatrapaim xötreithe la itre ngöne uma ka he hnin; hna atë la itre mitr nyine huujën hune la itre laulau.

44 Ame tröne la qëhnelö ka he hnin, hetrenyi la itre hnahag hnë xen thatraqane la itre ka nyima; itre ej ngöne la kur ka he hnin ezine la qëhnelö e kolopi, nge ka fe a tro kolojë. Nge hetrenyi fe la ketre hnahag hnë xen ezine la qëhnelö e koië, lo ka fe a tro kolopi.

45 Öni angeic jë hi koi ni: “Ame lai hnahag hnë xen ka fe a tro kolojë, ke thatraqane la itre atre huuj ka huliwa e hnine la uma ne hmi. 46 Nge ame pena la hnahag hnë xen ka fe a tro kolopi, ke thatraqane la itre atre huuj ka huliwa ngöne la ita ne huuj. Kolo itre matra i Zadoka, lo angetre Levi hna aijijën troa easenyi Iehova matre nyihlue i nyidrë.”

47 Thupene lai, hnei angeic hna tuluthe la kur ka he hnin, traqa koi 100 kubit la eqean, nge 100 kubit la eisaisan: ka kare la götrane cili. Nge hna amë la ita ne huuj qëmekene la uma ne hmi.

48 Thupene lai, hnei angeic hna lö sai ni kowe la poretiko ne la uma ne hmi, me tuluth la itre ikapa ne poretiko ka cil ngöne la lue ezin: traqa koi 5 kubit ngöne la ketre götran, nge 5 kubit ngöne la ketre. Nge ame la qëhnelö, ke traqa koi köni kubit ngöne la ketre götran, nge köni kubit ngöne la ketre.

49 Traqa koi 20 kubit la eqean ne la poretiko, nge 11* kubit la eisaisan. Troa eli eskalie a tro cili. Nge hetre poto ka cil ezine la itre ikapa cili, isa cas ngöne la lue götran.