Ezekiela
32 Nge ngöne la hna 12 ne macatre, ngöne la pane drai ne la hna 12 ne treu, hnei Iehova hmaca hna ithanata koi ni me hape: 2 “Nekö i atr, thinge jë la nyima ne latresi* göi Farao joxu ne Aigupito, nge hape jë:
‘Ceitu i ö lo, me ketre neköi liona ka catr ne la itre nöj,
Ngo hna lep ahumunyi ö.
Ceitu i ö lo, me ketre öni ka tru ne hnagejë; hnei ö hna jipajipa ngöne la itre hneopegejë i ö,
Hna hao la itre tim hnene la itre waca i ö, nge hnei ö hna adrone la itre hneopegejë.*’
3 Hane hi la hna qaja hnei Iehova Joxu Ka Sisitria:
‘Jëne la itre nöj ka nyimutre nge hna acasin, tro ni a kuiëne koi ö la ifileng,
Nge angatr la ka troa huli ö qa ngöne la ifileng.
4 Tro ni a nuetriji ö hune la ihnadro;
Tro ni a hnatriji ö nyipine la itre hlapa.
Tro ni a kuca matre tro la nöjei waco ne hnengödrai a të hui ö,
Nge tro ni a nue eö nyine öni ne la itre öni wael matre meje pi angatr.
5 Tro ni a trije la ijöne i ö hune la itre wetr
Tro ni a atiqane la itre hnathup hnene la munën la ngönetrei i ö.
6 Jëne la madra i ö ka neni,* tro ni a kuca matre cabi jë la nöj, uti hë e koho hune la itre wetr,
Nge tro la madra i ö a atiqan la itre tim ka neni.’
7 ‘Nge e meci hë eö, tro hë ni a juetrëne la hnengödrai, me amitine la itre wëtresij.
Tro ni a hakuthe la jö hnei iaw,
Nge tha tro hmaca kö a meleme la treu.
8 Tro ni a ajidrine la nöjei wëtresij ka melemel e koho hnengödrai pi ö,
Nge tro ha heetrën la nöje i ö hnei melöhlem,’ öni Iehova Joxu Ka Sisitria.
9 ‘Tro ni a ahleuhleune la hni ne la itre nöj ka nyimutre, la eni a troa kötre fë la itre atre i ö kowe la itre xaa nöj,
Kowe la itre nöj hnei ö hna thatre.
10 Tro ni a asesëkötrëne la itre nöj ka nyimutre,
Nge tro la itre joxu i angatr a hmengöhmengöne pi ö, la eni a troa uthe la tauang qëmekei angatr.
Tro pala hi angatr a hmengöhmengön,
ke tro asë hi angatr a xoue troa mec ngöne la drai ne kei ö.’
11 Ke hane hi la hna qaja hnei Iehova Joxu Ka Sisitria:
‘Tro la taua ne la joxu ne Babulona a traqa troa lepi ö.
12 Tro ni a humuthe la nöjei atre i ö jëne la taua ne la itre soc ka catr,
Itre ka pë utipin angatr, nge pëkö ka hane iaxösisi tui angatr ngöne la itre xaa nöj.
Tro angatr a thaipiëne la pi tru i Aigupito, nge tro ha lep apatrene la nöjei atre i Aigupito.
13 Tro ni a apatrene la hnënge si i angeic ezine la itre tim ka nyimutre,
Tha tro hmaca kö a hao la tim hnene la waca ne atr maine öni.’
14 ‘Ngöne la ijine cili, tro ni a kuca matre lai hnyawa la itre tim i angatr,
Nge tro ni a anenine la itre hneopegejë i angatr tune la oel,’ öni Iehova Joxu Ka Sisitria.
15 ‘Ngöne la ijine tro ni a kuca matre hnapapa pi Aigupito, me apë aliene la nöj,
Me humuth asë la itre atren,
Tro hë angatr e cili a atre laka, Iehova ni.
16 Celë hi ketre nyima ne latresi, nge tro hë la itre atr a nyiman ej cememine la nine ka hleuhleu;
Tro fe la itre nekö jajinyi ne la itre nöj a hane nyima.
Tro angatr a nyiman ej nyine meku Aigupito me itre atren,’ öni Iehova Joxu Ka Sisitria.”
17 Nge ame hë ngöne la hna 12 ne macatre, ngöne la drai 15 ne la treu,* hnei Iehova hmaca hna ithanata koi ni, me hape: 18 “Nekö i atr, treije pine jë la itre atrene Aigupito, nge autinyi angeice pi kowe la nöj e kuhu, angeic me itre nekö jajinyi ne la itre nöje ka catr, me itre ka uti koi hnaop.*
19 “‘Ame la mekuna i ö, ka mingöminge kö eö hui itre xan? Uti pi nge meköle ju memine la itre hna tha xötrehatren!’
20 “‘Tro angatr a kei nyipine la itre hna humuthe hnei taua. Hna nue angeic kowe la taua. Haawe, hul ananyi angeice pi qa la, angeic me itre atre i angeic.
21 “‘Qa ngöne la itre gaa jui ne la Hua,* tro la itre soc ka catr a ewekë koi Farao me itre sine xöle i angeic. Tro hë angatre lai a uti me meköl tune la itre hna tha xötrehatren, lo itre hna humuthe hnei taua. 22 E cili fe la nöje Asuria me itre soc i angeic. Kola lapa xötreithi angeic* hnene la itre hua i angatr: hna humuthi angatr asë hnei taua. 23 Itre hua i angeic a lapane la itre gaa jui ne la hnaop,* nge itre soc i angeic a meköl xötreithe la hua i angeic: hna humuthi angatr asë hnei taua, ke hnei angatr hna haöthe hnei xou la nöj ne la itre ka mel.
24 “‘E cili fe la nöje Elama, nge kola lapa xötreithe la hua i angeic hnene la itre atre i angeic: hna humuthi angatr asë hnei taua. Tha hna xötrehatrenyi angatre kö, nge hnei angatr hna uti kowe la nöj e kuhu, lo itre ka haöth hnei xou la nöj ne la itre ka mel. Tro hë angatr enehila a ce thue la hmahma memine lo itre ka uti koi hnaop.* 25 Ase hë hnëkë ili koi angeic nyipine la itre hna humuth, nge itre atre i angeic a lapa xötreithe la itre hua i angeic. Pëkö ala cas thei angatr hna xötrehatren, nge hna humuthi angatr asë hnei taua, pine angatr haöthe hnei xou la nöj ne la itre ka mel; nge tro angatr a ce thue la hmahma me itre ka uti koi hnaop.* Hna ami angeic nyipine lo itre hna humuth.
26 “‘Meseka fe e cili me Tubala, me itre atre i angatr.* Itre hua i angatr* a lapa xötreithi angeic.* Pëkö ala casi thei angatr hna xötrehatren, nge hna jaqa angatr asë hnei taua, pine angatr haöthe hnei xou la nöj ne la itre ka mel. 27 Hapeu, tha tro kö angatr a meköl memine lo itre soc ka catr hna tha xötrehatren, lo itre ka kei me uti fë la itre jia ne isi i angatr koi Hua*? Tro ha amë la itre taua i angatr fene la he i angatr,* me itre ngazo i angatr hune la itrapa june i angatr, ke hnene la itre soc cili ka catr hna axouene la nöje ne la itre ka mel. 28 Ngo tro kö a waja fici ö nyipine la itre hna tha xötrehatren, nge tro hë eö a meköl memine lo itre hna humuthe hnei taua.
29 “‘E cili fe la nöje Edroma, me itre joxu i angeic, me itre tane i angeic, lo itre ka meköl nyipine la itre hna humuth hnei taua, ngacama ka catr angatr ekö; tro fe angatr a hane meköl memine lo itre hna tha xötrehatren, me itre ka uti koi hnaop.*
30 “‘E cili fe la nöjei nekö i joxu* ne kolopi, me angetre Zidona asë, lo itre ka ce uti fë hmahma memine lo itre hna humuth, ngacama hna xouene la itre mus i angatr ekö. Tro angatr a meköl ngacama tha hna xötrehatrenyi angatre kö, memine lo itre hna humuthe hnei taua, nge tro angatr a ce thue la hmahma i angatr memine lo itre ka uti koi hnaop.*
31 “‘Tro Farao a öhnyi angatr asë, nge tro ha xapo la hni i angeic, pine lo ewekë ka traqa kowe la itre atre i angeic; tro ha humuthi Farao me trongene isi i angeic asë hnei taua,’ öni Iehova Joxu Ka Sisitria.
32 “‘Pine Farao haöthe hnei xou la nöj ne la itre ka mel, tro ha ce kelemi angeic me itre atre i angeic, nyipine lo itre hna tha xötrehatren, me itre hna humuthe hnei taua,’ öni Iehova Joxu Ka Sisitria.”