Ezekiela
35 Hnei Iehova hmaca hna ithanata koi ni, me hape: 2 “Nekö i atr, xei jë kowe la itre wetr ne Seira, nge perofetane jë la akötr ka troa lepi angeic. 3 Hape jë koi angeic: ‘Hane hi la hna qaja hnei Iehova Joxu Ka Sisitria: “Itre wetr ne Seira fe, tro hë ni a lepi ö! Tro ni a xejë la imeng troa ameköti ö, me kuca matre hnapapa pi ö. 4 Tro ni a kuca matre tro pe hi a itra etë la itre traone i ö, nge tro hë eö a ketre hnapapa. Nge tro hë eö a atre laka, Iehova ni. 5 Ke ekö hë eö imethinë, nge hnei ö hna nue la angetre Isaraela kowe la taua ka idrei, ngöne la ijine kola akötrë angatr me apatrene palua angatr.”’
6 “‘Celë hi matre, maine nyipici laka, ka mele ni,’ öni Iehova Joxu Ka Sisitria, ‘tro ni a amë aconyi ö kowe la ihumuth,* nge tro la ihumuth a xötrethengen agö eö. Pine eö methinëne la madra, tro pë hë la ihumuth a xötrethengen agö eö. 7 Tro ni a nyi hnapapan la itre wetr ne Seira, me apatrene la itre ka cili thenge, me itre ka bëek a tro cili. 8 Tro ni a atiqane la itre wetr cili hnei itre hna humuth. Nge tro la itre hna humuth hnei taua a kei hune la itre sasala i ö, me itre hnathup, me itre timi ö ka neni. 9 Tro ni a kuca matre tro eö a ketre götran hna apatrenetrij, nge pë hmaca kö ka troa lapan la itre traone i ö. Nge tro hë epuni a atre laka, Iehova ni.’
10 “Öni ö lo: ‘Thatraqai ni la lue nöje ce me lue götrane ce, nge tro pë hë huni a lapan,’ ngacama Iehova hi e cili. 11 ‘Celë hi matre, maine nyipici laka, ka mele ni,’ öni Iehova Joxu Ka Sisitria, ‘tro ni a kuca koi ö tune la aqane elëhni me zalu i ö, lo eö a methinë angatr; eje hi, tro hë ni a amamai ni koi angatr, la eni a troa ameköti ö. 12 Nge tro hë eö a atre e cili laka, ase hë ni Iehova dreng lo eö a pi tru fë la itre wetr ne Isaraela me hape: “Ase hë lep apatren la itre wetr me nue koi hun, matre tro huni a ulum* itre ej!” 13 Hnei epuni hna pi tru, me xöjetriji ni, me anyimua qaqa ni. Ngo dreng asë hi ni.’
14 “Matre hane hi la hna qaja hnei Iehova Joxu Ka Sisitria: ‘Tro la fen asë a madrin, e tro ni a kuca matre tro pe hi ö a hnapapa. 15 Hnei ö hna madrin lo kola lep apatrene la edrö i Isaraela. Nga tro fe ni a hane kuca tune koi ö. Wetr ne Seira fe, tro pe hi ö a nyi itra etë hna trotrij. Eje hi, tro ha traqa lai ngöne la nöje Edroma asë. Nge tro ha mama e cili laka, Iehova ni.’”