Ezekiela
42 Thupene lai, hnei angeic hna tro sai ni a tro kolopi ngöne la kur e kuhu trön, me kowe la batima ne la itre hnahag hnë xen ezine la kur gaa pë ihakun, me ngöne la götrane kolopi ne la batima ka itretrengekeu. 2 Traqa koi 100 kubit* la eqean ej, ngöne la götrane hnë lö e kolopi, nge 50 kubit la eisaisan. 3 Ej e nyipine la kur ka he hnin, lo ka 20 kubit la eisaisan, memine la dal ne la kur hna xup e kuhu trön. Hetre itre kuluar ka iqëmekekeu ngöne la köni etaz. 4 Qëmekene la itre hnahag hnë xen, hetre hnë tro ka 10 kubit la eisaisan, nge 100 kubit la eqean*; ame la itre hnë lö, ke itre ej e kolopi. 5 Ka coco catre kö la itre hnahag hnë xen e koho hun, hune la itre hnahag ngöne la lue etaz e kuhu fen, ke ka isaisa pala ha la itre kuluar. 6 Eje hi, ame la itre hnahag cili, ke itre ej ngöne la köni etaz. Ngo pine laka, pëkö ikapa tune la itre ikapa ne la itre kur, matre coco kö la itre hnahag e koho, hune lo itre ka ej ngöne la lue etaz e kuhu.
7 Traqa koi 50 kubit la eqeane la hna xupi etë e kuhu trön, ezin la itre hnahag hnë xen, hmekune la kur ka he trön, lo ka qëmeke kowe la itre xaa hnahag hnë xen. 8 Ke traqa koi 50 kubit la eqeane la itre xötre hnahag hnë xen, ka ej ngöne la götrane la kur ka he trön. Ngo ame kö lo itre ka ej qëmekene la uma ne hmi, ke traqa koi 100 kubit. 9 Ame e koië, hetre hnë lö kowe la itre hnahag hnë xen, jëne la kur e kuhu trön.
10 Ame ezine la götran gaa pë ihakun, memine la batima, hetrenyi fe la itre xaa hnahag hnë xen trön* la ngöne uma hna xup hnei etë, ngöne la götrane koië, nge ka qëmeke kowe la kur. 11 Qëmeken itre ej, hetre neköi gojeny ka ceitu memine lo ka ej qëmeken la itre hnahag hnë xen ne la batima e kolopi. Casi hi la eqean me eisaisan ne la itre hnahag, nge casi hi la itre hnë lö, me aqane xup itre ej. Ame la itre hnë lö e cili, 12 ke ceitu memine la itre hnë lö kowe la itre hnahag hnë xen e kolojë. Ngöne la kola xötrei lö kowe la neköi gojeny, hetre hnë lö hmekune la ngöne uma e koië hna xup hnei etë.
13 Matre öni angeice jë hi: “Ka hmitrötr la itre hnahag hnë xen e kolopi, me itre hnahag hnë xen e kolojë, ka ej ezine la götran gaa pë ihakun, lo hnë xeni huuj ka nyipi hmitrötr hnene la itre atre huuj ka easenyi koi Iehova. E cili hi la hnei angatr hna amë la itre huuj ka nyipi hmitrötr, me itre huuj ne wene feja,* me itre huuj ne ngazo,* me itre huuj ne qeje menu, ke ketre götrane lai ka hmitrötr. 14 E lö hë la itre atre huuj, tha tro hmaca kö angatr a tro qa ngöne la götrane gaa hmitrötr kowe la kur e kuhu trön, e tha hnei angatre kö hna pane una la hnaheetre ne huliwa, ke ka hmitrötr la itre iheetre cili. Qëmekene tro angatr a tro kowe la itre götran hna aijijën la nöj troa tro kow, tro angatr a pane saze.”
15 Thupene la angeic a ase tuluthe la itre götran e hnine la uma ne hmi,* hnei angeic hna lö sai ni qa ngöne la qëhnelö e koië, me tuluthe la götran hna eköhagen.
16 Hnei angeic hna tuluthe la götrane koië hnene la rozo nyine tulu.* Nge thenge la rozo cili, traqa koi 500 rozo la eqean qa ngöne la ketre götran uti hë la ketre.
17 Hnei angeic hna tuluthe la götrane kolopi, nge thenge la rozo cili, traqa koi 500 rozo la eqean.
18 Hnei angeic hna tuluthe la götrane kolojë, nge thenge la rozo cili, traqa koi 500 rozo la eqean.
19 Ame hnei angeic hna ujë kowe la götrane kuë. Nge hnei angeic hna tuluthe la 500 rozo, hnene la rozo nyine tulu.
20 Hnei angeic hna tuluthe la 4 lao götran. Nge hetre ngöne uma hna xup xötreith, ka 500 rozo la eqean, me 500 rozo la eisaisan, göi troa aisan la itre ewekë ka hmitrötr memine la itre xaa ewekë menu.