Ezekiela
44 Ame hnei angeic hna abëekë ni kowe la qëhnelö e kuhu trön ne la götrane koië ne la hnë hmi, nge hna thing ej. 2 Matre öni Iehova koi ni: “Tro pala pë hë eje lai a tun. Tha tro kö a fe la qëhnelö cili, nge tha tro kö la ala cas a lö qa lai. Ke eje hi, hnei Iehova Akötresi Isaraela hna lö qa lai; celë hi matre tro pala hi a thinge la qëhnelö. 3 Ame pe, tro kö la tan a lapa e cili matre xeni la falawa qëmekei Iehova, ke angeice la tan. Tro angeic a lö qa ngöne la poretiko ne la qëhnelö, me tro hmaca qa lai.”
4 Thupene lai, hnei angeic hna tro sai ni qa ngöne la qëhnelö e kolopi matre traqa qëmekene la uma ne hmi. Ame hnenge hna öhne la lolo i Iehova, kola haöth asë la uma ne hmi i Iehova, matre hnenge hna kei qe ipië. 5 Nge öni Iehova koi ni: “Nekö i atr, wange pala kö,* goeëne ju nge drenge hnyawa ju la hnenge hna amekötin, me itre wathebong göne la uma ne hmi i Iehova. Wange hnyawa ju la hnë lö ne la uma ne hmi, memine la itre hnë tro qa ngöne la hnë hmi. 6 Nge qa i ö troa qaja kowe la nöje Isaraela ka pi tru ka hape: ‘Hane hi la hna qaja hnei Iehova Joxu Ka Sisitria: “Nöje Isaraela fe, hmanono hë ni kowe la itre huliwa i epun ka sis! 7 Ame la epuni a lö fë ngöne la hnë hmi, la itre trenyiwa hna tha xötrehatrene la hni me ngönetrei, ke angatre hi lai a adrone la uma ne hming. Nge epuni fe a tro fë la falawang, me giris, me madra, ngo ase pe epuni thë la isisinyikeung hnene la itre huliwa i epun ka sis. 8 Tha ijije kö lo hnei epuni hna tha thupëne la itre ewekëng ka hmitrötr, nge epuni hmaca kö a upe la itre xan troa huliwa hnine la uma ne hming.”’
9 “‘Matre hane hi la hna qaja hnei Iehova Joxu Ka Sisitria: “Tha tro hmaca kö la ketre trenyiwa e Isaraela hna tha xötrehatren la hni me ngönetrei, a lö hnine la uma ne hming.”’
10 “‘Tro kö la angetre Levi a xeni pun la hnei angatr hna trotriji ni, lo angetre Isaraela a nuetriji ni troa nyihluene la itre idrola ka sis.* 11 Tro hë angatr a huliwa ngöne la uma ne hming: tro angatr a thupëne la itre qëhnelö ne la uma ne hmi, me huliwa e cili, me humuthe la itre huuj ne dreuth asë me itre huuj thatraqane la nöj, me cil qëmekene la nöj matre huliwa koi angatr. 12 Ngo pine laka, hnei angatr hna huliwa kowe la nöje Isaraela qëmekene la itre idrola ka sis, me akeine la nöj kowe la ngazo, matre hnenge pë hë hna xejë la imeng me sisinyi ka hape: tro kö angatr a xeni pune la ngazo i angatr,’ öni Iehova Joxu Ka Sisitria. 13 ‘Haawe, tha tro kö angatr a easenyi ni matre xome la hnëqa ne atre huuj, nge goi tha tro fe angatr a easenyine la itre ewekëng ka hmitrötr me ka nyipi hmitrötr. Tro kö angatr a thu la hmahma i angatr, pine la itre ewekë ka sis hnei angatr hna kuca. 14 Ngo tro kö ni a acili angatr troa huliwa göne la uma ne hmi, ene la nöjei huliwa hna kuca e cili, me itre huliwa nyine troa kuca.’
15 “‘Ngo ame pena la itre xaa atre huuj qa Levi, lo itre matra i Zadoka ka eatrëne la hnëqa i angatr ngöne la uma ne hming, ngöne lo angetre Isaraela a nuetriji ni, ke tro kö angatre lai a easenyi ni matre nyihlueng, me cile qëmekeng troa tro fë giris me madra koi ni,’ öni Iehova Joxu Ka Sisitria. 16 ‘Angatre hi la ka troa lö hnine la uma ne hming, me easenyine la laulaung troa nyihlueng. Tro kö angatr a eatrëne la hnëqa i angatr koi ni.
17 “‘Ame hë la angatr a lö ngöne la itre qëhnelö ne la kur ka he hnin, tro angatr a heetrë lino. Tha tro kö angatr a heetrë pene mamoe la angatr a huliwa ngöne la itre qëhnelö ne la kur ka he hnin, maine ngöne la kur cili. 18 Tro angatr a atu he hnei lino, nge tro la neköi trauziz lino a heetrën la gö i angatr. Tha tro kö angatr a heetrë iheetr ka troa azihnuë angatr. 19 Qëmeken tro angatr a tro kowe la kur e kuhu trön (lo götran thatraqane la nöj), tro angatr a pane una la iheetre ne huliwa i angatr, me amë pe ngöne itre hnahag hnë xen. Loi e tro angatr a pane uni heetr, wanga xötre pi la ehmitrötre* i angatr kowe la nöj, jëne la itre iheetre i angatr. 20 Tha tro kö a cin apane la he i angatr, maine nue aqeane la hnaihe i angatr. Ngo tro pe angatr a xötre ihe. 21 Tha tro kö la itre atre huuj a iji waina, la angatr a lö ngöne la kur ka he hnin. 22 Nge tha tro kö angatr a faipoipo memine la ketre sine föe, maine ketre föe ka seihnacil; ngo ijiji angatre hi troa xome la ketre jajiny* qa ngöne la itre matra i Isaraela, maine xome la föe hna mecitrij hnene la ketre atre huuj.’
23 “‘Qa i angatr troa inine kowe la nöjeng, la eisapengönene la ewekë ka hmitrötr me ketre ewekë menu hi; tro angatr a inine la nöj la eisapengönene la ewekë ka puingazo, memine la ewekë hna ahmitrötrën. 24 Nge maine troa ikootrë, ke ijiji angatre hi troa iameköti; qa i angatr troa amekötin thenge la itre wathebong. Tro angatr a drengethenge la itre wathebong, me itre hnenge hna amekötin* göne la itre feeteng, nge tro angatr a ahmitrötrëne la itre sabathing. 25 Tha tro kö angatr a easenyine la ketre atr ka mec, wanga puingazo jë angatr. Ngo ijiji angatre hi troa puingazo, pine la kem me thine i angatr, maine nekö i angatr trahmany me jajiny, maine pine la trejin me angatr me xa i angatr ka tha faipoipo kö. 26 Thupene la kola ase ahmitrötrën la ketre atre huuj, tro ha e la 7 lao drai koi angeic. 27 Nge ngöne la drai ne tro angeic a lö hnine la gaa hmitrötr, ngöne la kur ka he hnin matre troa huliwa ngöne la götran gaa hmitrötr, qa i angeic troa tro fë huuj ne ngazo,’ öni Iehova Joxu Ka Sisitria.
28 “‘Nge hane hi la edrö i angatr: eni hi la edrö i angatr. Tha tro kö epuni a hane hamë hnepadro i angatr e Isaraela, ke eni hi la zi i angatr. 29 Angatre hi la ka troa xeni la huuj ne wene feja, me huuj ne ngazo, me huuj ne qeje menu, me nöjei ewekë asë hna masuan* koi angatr e Isaraela. 30 Ame asë hi la itre pane wen ka sisitria hnei epuni hna menuën, me itre ahnahna hnei epun hna traqa fë, ke thatraqane la itre atre huuj. Nge qa i epun troa tro fë la pane* farine i epun ka tru kowe la atre huuj. Qa ngöne lai, tro ha manathithi la itre fami i epun. 31 Tha tro kö la itre atre huuj a öni la ketre waco, maine ketre öni hna öhn a ka meci hë, maine pena hna heje zezen.’