Ezekiela

45 “‘Ame hë la epuni a troa thawa la nöj, qa i epuni troa hnëkën la ketre götran nyine edrö ka hmitrötr koi Iehova. Tro ej a 25 000 kubit* la eqean, nge 10 000 kubit la eisaisan. Ame asë hi* la götrane cili, ke troa ketre ahnahna ka hmitrötr. 2 Nge ngöne la götrane cili, tro ha hnëkën thatraqane la götrane gaa hmitrötr, la ketre kare ka 500 kubit* la 4 lao götran. Nge ame la 4 lao götrane cili, tro ha amë la itre hnë axö öni ka 50 kubit la eisaisan. 3 Nge ame ngöne la itre hna tuluthe cili, tro eö a tuluthe la 25 000 göne la eqean, me 10 000 göne la eisaisan. Nge e koho hnin, troa amë la ketre hnë hmi, ketre ewekë ka nyipi hmitrötr. 4 Celë hi edrö ka hmitrötr hna xome qa ngöne la nöj thatraqane la itre atre huuj, lo itre ka huliwa hnine la hnë hmi, nge ka easenyi Iehova troa nyihlue i nyidrë. Tro ha acile la itre uma i angatr ngöne la götrane cili, me huliwan la götrane cili ka hmitrötr thatraqane la hnë hmi.

5 “‘Ame kowe la angetre Levi ka huliwa hnine la uma ne hmi, ke troa hamë götrane i angatr ka 25 000 kubit la eqean, me 10 000 kubit la eisaisan, me hamë angatre fe la 20 lao hnahag hnë xen nyine edrö.

6 “‘Nge tro fe epun a hamën kowe la traon, la hnepadro ka 25 000 kubit la eqean (thenge la ahnahna ka hmitrötr), me 5 000 kubit la eisaisan. Troa hamëne la hnepadro cili thatraqane la nöje Isaraela asë.

7 “‘Nge ame kowe la tan, tro ha hamëne la lue götran ezine la hnepadro hna hamën nyine ahnahna ka hmitrötr, memine la lue götran ezin la hnepadro hna hamëne kowe la traon. Qa ngöne lai, tro angeic a lapa ezine la ahnahna ka hmitrötr, memine la hnepadro hna hamën kowe la traon. Tro hë angeic a lapa e koië me kuë. Ame la eqean ej ka tro qa ngöne la ifego e kuë uti hë la ifego e koië, ke troa ihmeku memine la götran hna hamëne kowe la ketre tribu. 8 Tro pë hë a zi i angeic, la götrane cili e Isaraela. Tha tro hmaca kö la itre tane i eni a qanangazone la nöjeng, ngo tro pe angatr a thewe götranene la nöje Isaraela, nge tro ha isa hetre götranene la nöjei tribu.’

9 “Hane hi la hna qaja hnei Iehova Joxu Ka Sisitria: ‘Ngazo catre pala ha la aqane ujë i epun, itre tan ne Isaraela!’

“‘Loi ju hë hna iakötrë me iqanangazo, ngo kuca jë pe la ka meköt me thiina ka meköt. Loi ju hë hna thapa la itre ewekë ne la nöjeng,’ öni Iehova Joxu Ka Sisitria. 10 ‘Huliwane jë la itre tulu ka meköt, memine la efa* ka meköt me bath* ka meköt. 11 Tha tro kö a saze lapane la tulu ne la efa memine la bath. Ame la 10 bath, ke ca omera,* nge ame la 10 efa, ke ca omera. Tro la omera a nyine tulu göi troa tuluthe la etrun. 12 Ame la ca sekel,* ke 20 gera.* Nge maine troa nyixane la 20 sekel hnei 25 sekel me 15 sekel, ke troa traqa koi ca mina.*’

13 “‘Matre hane hi la ahnahna nyine tro epuni a hamën: qa ngöne la 160 kilo qitr, ke troa hamëne la 3 kilo, nge qa ngöne la 130 kilo bali, ke troa hamëne la 2 kilo. 14 Nge ame la oel nyine troa hamën, ke troa tuluth thenge la etrune la ca bath. Ame la 10 bath, ke ca kori,* nge ame la 10 bath, ke ca omera.* 15 Nge thene la hnënge mamoe ne Isaraela, tro ha hamëne la ca mamoe qa ngöne la ala 200. Troa huliwane la nöjei ewekë cili nyine huuj ne wene feja, me itre huuj ne dreuth asë, me itre huuj ne tingeting, me itre huuj thatraqane la itre ngazo ne la nöj,*’ öni Iehova Joxu Ka Sisitria.

16 “‘Tro asë hi la itre atren la nöj a hamëne la ahnahna cili kowe la tan e Isaraela. 17 Ngo hnëqa ne la tane cili, troa tro fë la itre huuj ne dreuth asë, me itre huuj ne wene feja, memine la waina nyine fi huuj ngöne la ijine feet, me ngöne la itre treu ka hnyipixe, me itre sabath, me ngöne la nöjei feet hna sa kowe la nöje Isaraela. Hnëqa i angeic troa hamën la itre huuj ne ngazo, me itre huuj ne wene feja, me itre huuj ne dreuth asë, me itre huuj ne tingeting, thatraqane la itre ngazo ne la nöje Isaraela.*’

18 “Hane hi la hna qaja hnei Iehova Joxu Ka Sisitria: ‘Ame ngöne la pane drai ne la pane treu, tro eö a xom qa ngöne la hnënge öni la ketre neköi kau ka pë engazon, me ahmitrötrën la hnë hmi qa ngöne la ngazo. 19 Tro la atre huuj a xome la wamine madra ne la huuj ne ngazo, me amë hune la itre hune qëhnelö ne la uma ne hmi, hmekune lo 4 lao kona ne la hnaakönine götrane* ne la ita ne huuj, me ngöne la itre hune qëhnelö ne la kur ka he hnin. 20 Celë fe hi nyine tro eö a kuca ngöne la hna 7 ne drai ne la treu kowe la atr ka kuca la ngazo, ngo tha hna thë pe maine ka kuca thatren pena; nge qa i epun troa ahmitrötrëne* la uma ne hmi.

21 “‘Ame ngöne la drai 14 ne la pane treu, tro epuni a feetën la Paseka. Tro epuni a xen la falawa hna tha levenëne kö ngöne la 7 lao drai. 22 Ngöne la drai cili, qanyine la tan troa tro fë neköi kau trahmanyi nyine huuj ne ngazo, thatraqai angeic me itre atrene la nöj. 23 Ngöne la 7 lao drai ne feet, qanyi angeic tro fë e nöjei drai la 7 lao neköi kau trahmany ka pë engazon nyine huuj ne dreuth asë koi Iehova, me 7 lao mamoe trahmany ka pë engazon, me ca nani trahmanyi nyine huuj ne ngazo. 24 Qanyi angeice fe tro fë la ca efa göne la isa ca neköi kau trahmany, me ca efa göne la isa ca mamoe trahmany, nyine huuj ne wene feja. Nge tro fe angeic a hamëne la ca hin* ne oel göne la isa ca efa.

25 “‘Ngöne la hna 7 ne treu, qaane la drai 15 uti hë la hna 7 ne drai ne feet, casi pala hi la huuj nyine tro angeic a tro fë thatraqane la itre ngazo, nge casi pala hi la huuj ne dreuth asë, me huuj ne wene feja, me oel.’”