Obadia
1 Hna meköle goeën hnei Obadia:*
Hane hi la hna qaja hnei Iehova Joxu Ka Sisitria, göi Edroma:
“Hne huni hna dreng la ketre maca qaathei Iehova,
Hna upe la atre tro fë maca kowe la itre nöj matre qaja ka hape:
‘Mejë jë! Hnëkë jë së troa isi me Edroma.’”
2 “Goeën! Hnenge hna kuca matre tha tro kö eö a nyipiewekë thene la itre nöj;
Eö hi la hna methinën catrën.
3 Hna amenu eö hnene la hni i ö ka pi tru,
Eö ka lapane la itre gaa kaqa ne git,
Nge ka lapa ngöne la itre gaa draië, öni ö e kuhu hni i ö,
‘Drei la ka troa autingi ni qa la?’
4 Öni Iehova, “ngacama lapa* ju hë eö ngöne la itre gaa draië tune la aeto,
Maine amë pena la trengene waco i ö nyipine la itre wëtresij,
Ngo tro kö ni a autingi ö qa lai.
5 Maine troa traqa koi ö la itre atrekënö, nge maine troa traqa e jidr la itre ka thepe ewekë,
Hapeu, tha tro kö angatr a xome hi la hnei angatr hna ajan?
Maine troa traqa koi ö la itre ka hu rezë,
Hapeu, tha tro kö angatr a nue la itre xaa wen?
Ngo ame kö eö, tro hnyawa ha lep apatrenyi ö!*
6 Ase hë thel asë e Esau!
Ase hë thel la itre mo i angeic hna juetrën!
7 Hnene la itre sine xöle i ö hna xomi ö uti hnyawa la ifego.
Hnei angatr asë hi hna amenu eö.
Hnene la itre ka mele tingeting me eö hna musinë eö.
Ame lo itre ka ce xeni falawa me eö, tro angatr a ami theth fene la lue ca i ö,*
Ngo tha tro kö eö lai a öhn.
8 Ngöne la drai cili,” öni Iehova,
“Hapeu, tha tro kö ni a apatrene la itre ka inamacan qa Edroma
Memine la atrehmekun qa ngöne la itre wetre i Esau?
9 Nge Temana fe, tro hë la itre soce i ö a meci hnei xou,
Ke tro ha humuth asë la itre ka lapane la itre wetre i Esau ngöne la ijine isi.
10 Pine eö akötrë Iakobo trejine me eö,
Tro ha ahmahmanyi ö,
Nge tro ha lep apatrenyi ö uti hë epine palua.
11 Ame lo ijin eö a goeë angeic nge pëkö hnei ö hna kuca,
Lo itre trenyiwa a kötre fë la trongene isi i angeic,
Lo itre trenyiwa a lö hnine la traone* i angeic, me uthidrönegöti* göi Ierusalema,
Ke hnei ö hna nyitipu angatr.
12 The madrine kö troa goeën la trejine me eö a akötr,
The madrine kö la kola lep apatrene la nöje Iudra,
Nge the ithanata kö cememine la pi tru ngöne la angeic a cil kowe la jol.
13 The lö hnine kö la traon ne la nöjeng ngöne la kola akötrë angeic,
The madrine kö troa goeën la kola akötrë angeic ngöne la ijine jol,
Nge the thapa kö la itre mo i angeic ngöne la angeic a ixelë me itre jol.
14 The cile kö ngöne la hna ijejea troa humuth la itre ka kötre mel,
Nge the nue kö la itre ka mele pe kowe la ithupëjia ngöne la ijine akötr.
15 Ke easenyi hë la drai ne tro Iehova a amekötin la itre nöj.
Tune la hnei ö hna kuca, tro fe a kuca koi ö.
Ame la aqane ujë i ö koi itre xan, tro fe a hane kuca tun koi ö.
16 Eje hi, tune la aqane iji ö hune la wetreng ka hmitrötr,
Tro asë hi la itre nöj a iji lapa.
Tro angatr a ije me ulum,
Nge tro hë angatr a patr, kösë tha hnei angatre kö hna hane mel.
17 Ngo tro ha eje hune la wetre Ziona la itre ka mele pe,
Nge tro ej a hmitrötr;
Nge tro la itre matra i Iakobo a xome hmaca la itre ewekë i angatr.
18 Tro la itre matra i Iakobo a tune la eë,
Tro la itre matra i Iosefa a tune la ukahlokin,
Nge tro la itre matra i Esau a tune la jez;
Tro nyidroti a manith me dreuthetriji angatr,
Nge pëkö ca ka troa mele qaathene la itre matra i Esau,
Ke Iehova la ka qaja.
19 Tro angatr a thapa la Negeb me itre wetr i Esau,
Memine la Sefela uti hë la nöj ne la angetre Filisiti.
Tro angatr a thapa la hlapa ne Eferaima memine la hlapa ne Samaria,
Nge tro Beniamina a thapa la nöje Gileada.
20 Ame la nöje ne la angetre Kanana uti hë Sarepeta, ke thatraqai Isaraela,
Lo itre hna kötre fë qa ngöne la hna eköhagen celë.
Nge tro la itre hna kötre fë qa Ierusalema, lo itre ka lapa e Sefarad, a thapa la itre traon ne la Negeb.
21 Nge tro la itre atre iamele a elëne la wetre Ziona
Troa amekötine la itre wetre i Esau,
Nge thatraqai Iehova pë hë la mus.”