Mika
1 Hane hi la trengewekë i Iehova koi Mika,* atre Moresa, ngöne la ijine musi Iotham, me Ahaza, me Hezekia, itre joxu ne Iudra, lo hnei angeic hna meköle goeën göi Samaria me Ierusalema:
2 “Drenge ju epun, itre nöj!
Ihnadro fe hnangenyëne ju, eö me itre aliene i ö,
Nge epi tro Iehova Joxu Ka Sisitria a upezö epun
Qa ngöne la uma ne hmi ka hmitrötre i Iehova.
3 Ke Iehova ha tro qa ngöne hnalapa i nyidrë;
Tro nyidrëti a uti me tro hune la itre gaa draië ne la ihnadro.
4 Fene la lue ca i nyidrë, tro ha hmu la itre wetr,
Nge tro ha kaqaluë la itre hnathup
Tune la sir ezine la eë,
Tune la tim ngöne la gaa utiut.
5 Hna traqa lai pine la icilekeu i Iakobo,
Lo itre ngazo ne la itre matra* i Isaraela.
Qa kaa* la icilekeu i Iakobo?
Tha qa Samaria kö?
Nge qa kaa* la itre hnë hmi gaa hmitrötr i Iudra?
Tha qaathei Ierusalema kö?
6 Tro ni a kuca matre tro pë hë Samaria a tra etë ngöne la hlapa,
Ketre götrane hnë traa vin;
Tro hë ni a nenge la itre etë i angeic ngöne la hnathup,
Nge tro ni a kuca matre lapa ju pe hi la itre trepene i angeic.
7 Tro ha thë asë la itre hnasaatre i angeic,
Me dreuthetrij la nöjei ahnahna hnei angeic hna salemë ngönetrei* kow.
Tro ni a apatren asë la itre idrola i angeic.
Ke itre ewekë lai hnei angeic hna kapa qa ngöne la hna nyi föe ne gojeny,
Nge nyine nyithupene fe la itre xaa föe ne gojeny.”
8 Celë hi matre tro ni a sue me treije latresi;
Pi tro ni a tro xöe* me tro pë ibutr.
Tro ni ho tune la aqane ho ne la kuli wael,
Me treij tune la iaena.*
9 Ke thatreine kö troa meu la kakötre i angeic;
Nge goi xötre fe ej a tro Iudra.
Traqa ha la akötr kowe la qëhnelö ne la nöjeng, uti hë Ierusalema.
10 “The qaja kö la ewekë cili e Gatha;
The treije kö.
Nge e Bethafera,* ujëujë jë ngöne la hnatresij.
11 Tro xöe jë cememine la hmahma itre atrene Safira.
Tha lö pi kö la itre atrene Zaanan.
Tro ha treij e Bethezel, nge tro ha sewe angeic troa xatua epun.
12 Hnene la itre atrene Maroth, hna treqene la ewekë ka lolo,
Ngo ewekë ka ngazo pe la hnei Iehova hna autin kowe la qëhnelö e Ierusalema.
13 Ce othe ju la ikariota memine la itre hos, epun itre atrene Lakisa.
Epuni hi la qaane la ngazo ne la nekö jajinyi ne Ziona,
Eje hi, hna öhne thei ö* la itre icilekeu i Isaraela.
14 Celë hi matre, tro eö a tro fë ahnahna ne iahni koi Moresagatha.
Ketre itheth la itre hnalapa i Akeziba* kowe la itre joxu ne Isaraela.
15 Tro ni a tro fë koi epun la atre ngaan,* epun itre atrene Maresa.
Tro ha mama la lolo i Isaraela uti hë Adulama.
16 Xöje pi nge cin apane pi la itre ihe i epun pine la itre nekö hnimina i epun.
Cin apane pi la itre ihe i epun tune la aeto,
Ke ase hë kötre fë la itre nekö i epun.”