Nahuma
2 Tro ha cile koi ö* hnene la atr ka aijen.
Thupëne ju la itre hna eköhagen.
Thupëne ju la gojeny.
Hnëkë jë* nge xomi trengecatre jë.
2 Ke tro Iehova a kuca matre hlemu loi hmaca jë Iakobo,
Nge hlemu loi hmaca jë Isaraela,
Ke hna apatrenyi angatr hnene la itre ka iapatreny,
Me angazone la itre ivine i angatr
3 Hna amadrane la petre ne la itre atr ka catre i angatr,
Nge itre soce i angatr a heetrë iheetr ka madra.
Kola melemele la fao ne la itre ikariota tune la eë
Ngöne la drai ne angatr a hnëkë troa isi,
Me xejë la itre jo hna kuca hnei göti.
4 Itre ikariota a nyape catr ngöne la itre gojeny.
Itre ej a nyenyape qenahmo ngöne la itre gaa tru atr.
Itre ej a mel tune la itre uke jina, me nyenyape catr tune la samek.
5 Tro nyidrëti* a hëne la itre tane soce i nyidrë.
Nge tro angatr a kei trootro.
Angatr a canga nyenyape kowe la itre ihag atraqatr;
Angatr a acil la ketre hnë kötre zae.
6 Tro ha fe la itre qëhnelö ne la itre hneopegejë,
Nge tro ha kei* la uma i joxu.
7 Hna amekötine* hë lai: Hna acile xöeë eahlo* me xomi eahlo,
Itre hlue i eahlo a hokötr tune la itre piny;
Angatr a xexe la itre imano* i angatr.
8 Qane ekö, hna aceitunë Nineve me trengene tim,
Ngo hana la angatr a kötr.
“Cile ju! Cile ju!”
Ngo pëkö ka xei.
9 Atrekënö jë la sileva! Atrekënö jë la gool!
Ke tha ka hane ae kö la itre mo i angeic.
Ka tiqa angeic hnei ewekë ka tru thupen.
10 Pëhë atrene la traon, hnapapa pe hi, nge pëhë alien!
Itre hni a meci hnei xou, itre watingöneca a enienij, nge itre gö a hmengöhmengön;
Kola wië qatresi la nöjei iqëmek asë.
11 Ekaa la hnë lapa ne la itre liona, lo hnë xen ne la itre neköi liona?
Kola fetra qa kaa hnei angeic me nekö i angeic,
Nge pëkö ka axouenyi nyidro?
12 Tru la itre tha ne la liona matre thuan la itre nekö i angeic
Hnei angeic hna humuthe kowe la itre liona föe.
Hnei angeic hna thupën matre tro pala hi a hetre tha i angeic,
Nge tro pala hi a tiqa la göhnë i angeic hnei öni ka mec.
13 “Tro hë ni a ujë koi ö,” öni Iehova joxu ne la itre trongene isi e hnengödrai,
“Tro ni a dreuthetrije la itre ikariota i ö,
Nge tro ha humuthe hnei taua la itre neköi liona i ö.
Tro ni a sewe eö troa atrekënö e cailo fen,*
Nge tha tro hmaca kö a drenge la nine la itre ka tro fë maca i ö.”