Amosa

2 “Hane hi la hna qaja hnei Iehova:

‘“Pine laka, hnei Moaba hna anyimua icilekeu,* tha tro kö ni a saze mekun,

Ke hnei angeic hna dreuthe la itre jun ne la joxu ne Edroma matre nyine pele hao.

 2 Tro hë ni a upe la eë koi Moaba,

Nge tro ej a dreuthetrije la itre ita ne thup hna eköhagen e Kerioth;

Tro Moaba a meci ngöne la kola nyi mejen,

Me ngöne la kola sue ne isi me ufi trutru.

 3 Tro ni a xometrije la joxu* nyipi angeic

Nge tro ni a ce humuthi angeic me itre nekö i joxu,” öni Iehova.’

 4 Hane hi la hna qaja hnei Iehova:

‘Pine laka, hnei Iudra hna anyimua icilekeu,* tha tro kö ni a saze mekun,

Ke hnei angatr hna nuetrije la wathebo* i Iehova,

Nge tha hnei angatre kö hna trongëne la itre hnei nyidrëti hna amekötin;

Ngo hnei angatre pe hna mejiune kowe la itre trengathoi tune la itre qaqa i angatr ekö, matre hnei angatre fe hna hane kei kowe la ngazo.

 5 Tro hë ni a upe la eë koi Iudra,

Nge tro ej a dreuthetrije la itre ita ne thup hna eköhagen e Ierusalema.’

 6 Hane hi la hna qaja hnei Iehova:

‘Pine laka, hnei Isaraela hna anyimua icilekeu,* tha tro kö ni a saze mekun,

Ke angatr a salemëne la atr ka meköt göi sileva,

Memine la ka pë ewekë göne la lue ibutr.

 7 Angatr a tro waja la he ne la itre ka pë ewekë e kuhu hnadro,

Me thingi jëne la itre ka ipië.

Casi hi la jajiny hna ce meköl memin hnene la kem me kuku,

Angatre hi lai a adrone la ëjeng ka hmitrötr.

 8 Ezine la nöjei ita ne huuj, angatr a mekölen la itre iheetr hna xom nyine hatrene ti gufa;

Nge ame la waina hnei angatr hna ij ngöne la itre uma hmitrötr ne la itre haze i angatr, ke hna nyithupen qa ngöne la hna trane* la itre xan.’

 9 ‘Ame pe, eni la ka lep apatrenyi Amora qëmekei angatr,

Lo ka draië tune la sinöe arasi, nge ka catr tune la sinöe alona;

Hnenge hna apatrene la itre wenen ej e koho me itre iwan ej e kuhu.

10 Hnenge hna xomi epuni qaa Aigupito,

Me tro sai epuni ngöne la hnapapa koi 40 lao macatre,

Matre tro epuni a thapa la nöje Amora.

11 Hnenge hna acile la itre xaa nekö i epuni trahmanyi troa perofeta

Me itre xaa nekö trahmanyi thei epun matre troa Nazeri.

12 ‘Ngo hnei epuni hna thue imene waina la itre Nazeri,

Me wathebone la itre perofeta ka hape: “Tha tro kö epuni a perofetan.”

13 Tro hë ni a waja fici epuni e cili,

Tune la ikatr ka tiqa hnei qitr hna thupa, nge ka wilën asë la nöjei ewekë.

14 Tro la atre nyinyape catr a pë jëne kötr,

Tro la atr ka catr a pë trengecatr,

Nge tha tro kö la atre isi a sipu amele angeice kö.

15 Tha tro kö la atre huji pehna a cile catr ngöne la göhne i angeic,

Tha tro kö la atre nyinyape catr a kötre mel,

Nge tha tro kö la atre ti hos a sipu amele angeice kö.

16 Nge goi tro fe la soc ka catr

A kötre xöe ngöne la drai cili,’ öni Iehova.”