Amosa
4 “Drenge ju la, itre kau föe ne Basana,
Epun itre ka lapane la wetr e Samaria,
Lo itre föe ka atrekënö la itre ka co, me wajahuje la itre ka pë ewekë,
Nge ka upe la itre föi* angatr ka hape: ‘Traqa fë nyine iji pi koi hun!’
2 Hnei Iehova Joxu Ka Sisitria hna sisiny thenge la ehmitrötre i nyidrë ka hape:
‘“Dreng! Tro ha traqa la ijine troa athip draië epun hnene la itre nyine athipi mitr
Nge ame la itre ka lapa pe, ke tro ha athip draië angatr hnene la itre ge ne thiny.
3 Tro epuni a isa lö pi qa ngöne la itre gaa kaqa ne la ihag qëmekei epun;
Nge tro ha triji epun e Harmon,” öni Iehova.’
4 ‘Traqa pi e Bethela nge kuca jë la ngazo,*
Traqa pi e Gilegala nge kuca catrëne jë la ngazo!
Traqa fë pi la itre huuje i epun e hmakany,
Memine la hna 10 ne la itre ewekë i epun ngöne la hnaakönine drai.
5 Dreuthe jë la falawa hna levenëne nyine huuje ne ole;
Suene jë la itre ahnahna hnei epuni hna hamën xanën!*
Ke celë hi hnei epuni hna pi kuca nöje Isaraela,’ öni Iehova Joxu Ka Sisitria.
6 ‘Ngo ngöne asë hi la itre traone i epun, hnenge hna kuca matre wië pi la itre inyö i epun hnei pë xen
Nge hnine la itre hnalapa i epun, hnenge hna kuca matre pë pi falawa;
Ngo tha bëeke kö epuni koi ni,’ öni Iehova.
7 ‘Hnenge fe hna cipane la mani koi köni treu qëmekene la ijine menu;
Hnenge hna axulune la mani kowe la ketre traon, me cipane kowe la ketre.
Hna maniën la ketre götrane la hlapa,
Ngo tha hna manie kö ngöne la ketre, matre qaqacile hë la götrane cili.
8 Casi hi la traon hna thele tim hnene la itre atrene la luetre maine köni traon ka meci hnei pi ij,
Ngo pi iji pala kö angatr;
Ame pe, tha bëeke kö epuni koi ni,’ öni Iehova.
9 ‘Hnenge hna thinithe* la itre hlapa i epun, me lep hnene la idreuthi ka catrehnin.
Nyimutre catr la itre hnë traa feja i epun me itre vin,
Ngo hnene la itre sipa hna xeni apën la itre iwacua me itre ioliv i epun;
Ame pe, tha bëeke pala hi epuni koi ni,’ öni Iehova.
10 ‘Hnenge hna upe koi epun la ketre meci ka ixötrekeu tun e Aigupito.
Hnenge hna humuth hnei taua la itre nekö i epuni trahmany, me thapa la itre hose i epun.
Hnenge hna aelën kowe la hnafij i epun, la aqane pi ne la itre ka mec ngöne la itre lapa i epun;
Ngo ame pe, tha bëeke kö epuni koi ni,’ öni Iehova.
11 ‘Hnenge hna lep apatrene la nöje i epun
Tune la aqane lep apatrene Akötresieti la nöje Sodroma me Gomora.
Nge ceitui epuni hë memine la ketre sine sinöe hna huletrij qa ngöne eë;
Ngo ame pe, tha bëeke kö epuni koi ni,’ öni Iehova.
12 Isaraela fe, hane hi la hnenge hna troa kuca koi ö.
Pine laka, celë hi la hnenge hna troa kuca koi ö,
Haawe, hnëkë jë troa itronyi memine la Akötresi ö.
13 Ke dreng! Nyidrëti la ka acile la itre wetr me xupe la eny;
Nyidrëti a amamane la itre mekuna i nyidrë kowe la itre atr,
Nyidrëti a saze la kaqa ne lai koi menihao,
Nge nyidrëti a tro hune la itre gaa draië ne la ihnadro;
Iehova la ëje i nyidrë, Akötresie ne la itre trongene isi e hnengödrai.”