Deuteronomi
29 Hane hi la itre trengewekë ne la isisinyikeu hnei Iehova hna ahnithe koi Mose troa kuca memine la nöje Isaraela, ngöne la nöje Moaba, nge ej a nyixane lo isisinyikeu hnei nyidrëti hna kuca me angatr e Horeba.
2 Ame hnei Mose hna hën la angetre Isaraela asë me hape: “Öhne hë epuni la nöjei ewekë hnei Iehova hna kuca qëmekei epun e Aigupito, koi Farao me itre hlue i angeic, me kowe la nöje i angeic asë, 3 me itre akötr* ka tru hnei epuni hna öhn hnene la sipu luemeke i epun, me itre hatrene ka tru, me itre iamamanyikeu ka tru. 4 Ngo uti hë la drai ce, tha hnei Iehova kö hna hamë epun la hni ka trotrohnin, me luemek ka goe, me lue hnangenyë ka dreng. 5 ‘Ngöne lo ijin eni a eatrongë epun ngöne la hnapapa koi 40 lao macatre, tha hnyiqetre kö la itre iheetre i epun, nge goi tha ae fe la itre ibutre i epun. 6 Nge tha hnei epuni kö hna xeni falawa, me iji waina maine itre xaa kahaitr, matre tro epuni a atre laka, Iehova ni, Akötresi epun.’ 7 Ame hnei epun hna traqa ngöne la götrane celë. E cili, hnei Sihona joxu ne Hesebona, me Oga joxu ne Basana hna traqa troa isi me easë, ngo hne së pe hna lepi nyidro. 8 Thupene lai, hne së hna thapa la nöje i nyidro, me hamën nyine edrö kowe la angetre Reubena me Gada, me kowe la sine la tribu i Manase. 9 Haawe, trongëne jë nge drenge ju la itre trengewekë ne la isisinyikeu celë, matre troa tro loi la nöjei huliwa i epun.
10 “Ngöne la drai celë, epuni asë hi a cil qëmekei Iehova Akötresi epun: ene la itre tane la itre tribu i epun, me itre qatr me itre tane huliwa thei epun, me nöjei trahmanyi ne Isaraela, 11 me itre nekö i epun, me itre föi epun, me itre trenyiwa ka lapa thei epun, qaane ju hi la ka nyi sinöe uti hë la ka jöe tim koi epun. 12 Epuni e ce göne troa sisiny me lö ngöne la isisinyikeu i Iehova Akötresi epun, lo hnei Iehova Akötresi epun hna kuca me epun ngöne la drai celë, 13 matre tro epuni a nöje i nyidrë, nge tro nyidrëti a Akötresi epun, thenge lo hnei nyidrëti hna qaja koi epun, me sisinyi kowe la itre qaaqaa i epun, ene Aberahama, me Isaaka, me Iakobo.
14 “Ngo tha epuni hmekuje kö la ka troa sisiny me lö ngöne la isisinyikeung, 15 ngo memine fe la itre ka ce cil me easë ngöne la drai celë qëmekei Iehova Akötresi së, memine lo itre ka patre qaathe së. 16 (Ke atre hi epun la hne së hna melën e Aigupito, nge hne së hna tro nyipine la itre nöj ka nyimutre. 17 Nge ase hë epuni öhn la itre ewekë ka sis thei angatr, me itre idrola ka sis* hna tratraun hnei sinöe, me etë, me sileva, me gool. 18 Ngo thupëne kö wanga hetrenyi jë thei epun la ketre trahmany maine ketre föe, maine ketre fami, maine ketre tribu, ka trotriji Iehova Akötresi së, matre troa nyihluen la itre haze ne la itre nöje cili. Nge wanga hetrenyi jë thei epun la iwan ka acian la feja ka haitr, me itre wen ka poizin.
19 “Ngo maine tro la ketre atr a dreng la itre trengewekë ne la isisinyikeu celë, nge tro angeic a pi tru me qaja e kuhu hni ka hape: “Tro pala hi ni a tingeting, ngacama eni a xötrethenge la itre aja ne la hning,” nge celë hi ka angazone la nöjei ewekë ngöne la jë i angeic, 20 tha tro kö Iehova a nue la ngazo i angeic. Ngo tro pe a tru la elëhni Iehova koi angeic, nge tro ha traqa koi angeic la nöjei hnëjin asë hna cinyianyin ngöne la itusi celë, nge tro hë Iehova a apatrene la ëje i angeic qaa celë fen. 21 Tro hë Iehova a isa ije angeic memine la itre tribu ne Isaraela, matre troa akötrë angeic, thenge la nöjei hnëjin ne la isisinyikeu hna cinyianyin ngöne la itusi Wathebo celë.
22 “Ame hë la itre nekö i epun elany, me itre trenyiwa ka traqa qaa gaa nany, a öhn la itre akötr ne la nöje cili, memine la itre mec hnei Iehova hna axulune koi angatr, 23 ene la gaz, me sotr, me eë, matre pëkö ewekë hna troa traan ngöne la nöj, nge pëkö ketre feja maine ketre hnitr ka troa cia, tune lo Iehova a apatrenyi Sodroma me Gomora, me Adema, me Zeboim ngöne lo nyidrëti a wesitr me elëhni koi angatr, 24 tro hë angatr memine la itre nöj asë a hape: ‘Hnauëne la Iehova a kuca tun kowe la nöje ce? Nge hnauëne ju pë hë la nyidrëti a elëhni tune lai?’ 25 Tro ha sa koi angatr ka hape: ‘Pine angatr nuetrije la isisinyikeu hnei Iehova Akötresi ne la itre qaaqaa i angatr hna kuca me angatr, ngöne lo nyidrëti a thepe angatr qa Aigupito. 26 Hnei angatr hna nyihluen me thil kowe la itre xaa haze hnei angatr hna thatre, nge hnei Akötresieti hna wathebo angatr troa nyihluen. 27 Ame hnei Iehova hna elëhni kowe la nöje ce, me axulun la nöjei hnëjin hna cinyianyin ngöne la itusi celë. 28 Celë hi matre hnei Iehova hna fejetriji angatr qa ngöne la zi i angatr ngöne la elëhni me trengehni nyidrë, nge hnei nyidrëti hna xomi angatr kowe la ketre nöj. Nge uti hë enehila, angatr pala hi ngöne la nöje cili.’
29 “Ame la itre ewekë hna juetrën, ke thatraqai Iehova Akötresi së, ngo ame la itre ewekë ka mama, ke thatraqai së me itre matra i easë uti hë epine palua, matre tro pala hi sa trongëne la nöjei trengewekë ne la Wathebo celë.