Levitiko

14 Öni Iehova hmaca jë hi koi Mose: 2 “Hane hi la wathebo thatraqane la atr ka lepera, ngöne la drai ne troa jele pui loi angeic, me tro sai angeic kowe la atre huuj. 3 Nge qa ne la atre huuj troa tro tröne la lapa, me goeëne lai atr: nge maine loi hë la lepera, 4 tro hë la atre huuj a upi angeic troa traqa fë la lue waco ka mel nge ka pui loi, me sinöe arasi, me imaano ka palulu, me uke hisop,* matre troa apuiloinyi angeic. 5 Nge hune la tim ka neni, tro la atre huuj a humuthe la ketre waco ngöne la trengen hna xup hnei dro. 6 Nge tro angeic a xome la waco ka mel, memine la sinöe arasi, me imaano ka palulu, me uke hisop,* nge tro angeic a ce hnea itre ej ngöne la madra ne la waco hna humuth hune la tim ka neni. 7 Nge qa ne la atre huuj troa a 7 lao thathan la madra cili kowe la ka lepera matre apuiloinyi angeic, nge tro ha jele pui loi angeic. Nge tro la atre huuj a nue hmaca la waco ka mel ngöne la itre hlapa tröne la traon.

8 Nge qa ne la atr hna apuiloin, troa wasine la itre iheetre i angeic, me cin asë la ngönetrei angeic, memine la he i angeic, me sië tim, matre pui loi jë angeic. Thupene lai, ijiji angeic hë troa lö ngöne la lapa. Ngo tro pe angeic a pane lapa koi 7 lao drai tröne la itate i angeic. 9 Nge ame ngöne la hna 7 ne drai, tro angeic a cin asë la he i angeic, memine la ienaje i angeic, me pene manemeke i angeic. Nge thupene la hna cin asë, tro angeic a wasin la itre iheetre i angeic, me sië tim, nge tro hë angeic a pui loi.

10 “Nge ame ngöne la hna 8 ne drai, tro angeic a xome la lue neköi mamoe trahmany ka pë ethan, me ca neköi mamoe föe ka ca macatren nge ka pë ethan, me köni omera* ne farin ka lolo hna thuenyikön hnei oel nyine huuj ne wene feja, me ca loga* ne oel. 11 Nge ame la atre huuj ka jele pui loine la atr, qa i angeic troa tro fë lai atre cili, memine la itre ahnahna i angeic qëmekei Iehova ngöne la hnë lö ne la itat ne icasikeu. 12 Nge tro la atre huuj a xome la ca neköi mamoe trahmany, me huujën nyine huuj ne ialoinekeun,* memine la ca loga ne oel. Nge tro angeic a jumejum, nyine huuj ne jumejum qëmekei Iehova. 13 Nge qa i angeic troa humuthe la neköi mamoe trahmany ngöne la götrane gaa hmitrötr, ene la götran hna humuth la huuj ne ngazo, memine la huuj ne dreuth asë, ke tune la huuj ne ngazo, ame la huuj ne ialoinekeun, ke thatraqane la atre huuj. Celë hi ewekë ka nyipi hmitrötr.

14 “Nge qa ne la atre huuj troa xome la madra ne la huuj ne ialoinekeun, me köl ngöne la cane la hnangenyë maca, memine la pane he ne wanakoime maca, memine la pane he ne wanakoca maca ne la atr hna troa apuiloin. 15 Nge tro la atre huuj a xome la loga ne oel, me neng ej ngöne la hnatrapaime mi i angeic. 16 Nge qa ne la atre huuj troa hnea la he ne wanakoime maca i angeic, ngöne la oel ka ej ngöne la hnatrapaime mi i angeic, nge memine la he ne wanakoime i angeic, tro ha a 7 lao thathane la oel qëmekei Iehova. 17 Nge hune la madra ne la huuj ne ialoinekeun, qa ne la atre huuj troa xome la munëne oel ka ej ngöne la hnatrapaime i angeic, matre troa köl la cane la hnangenyë maca, memine la pane he ne wanakoime maca, memine la pane he ne wanakoca maca ne la atr hna troa apuiloin. 18 Nge qa ne la atre huuj troa xome la munëne la oel ka ej ngöne la hnatrapaime i angeic, me neng hune la he ne la atr hna troa apuiloin. Nge qëmekei Iehova, tro la atre huuj a kuca lo hna majemin, ene la huuj ne ahmitrötrën* thatraqane lai atr.

19 Nge qa ne la atre huuj troa huujëne la huuj ne ngazo, me xëwe fë la ngazo ne la atr hna troa apuiloin. Thupene lai, tro la atre huuj a humuthe la huuj ne dreuth asë. 20 Nge qa ne la atre huuj troa huujëne la huuj ne dreuth asë, memine la huuj ne wene feja, hune la ita ne huuj. Nge qa ngöne la itre huuje cili, tro la atre huuj a xëwe fë la ngazo ne la atr. Nge tro hë angeic a pui loi.

21 “Ngo maine ka pë ewekë angeic, nge tha ijije kö la mani angeic, tro hë angeic a xome la ca neköi mamoe trahmany nyine huuj ne ialoinekeun göne la huuj ne jumejum, matre kuca tune lo hna majemin, ene la huuj ne ialoinekeun thatraqai angeic, memine la ca omera* ne farin ka lolo hna thuenyikön hnei oel nyine huuj ne wene feja, me ca loga* ne oel, 22 memine la lue meketrë maine lue neköi piny, thenge la hnei angeic hna hetreny, matre cas nyine huuj ne ngazo, nge ketre nyine huuj ne dreuth asë. 23 Nge ame ngöne la hna 8 ne drai, tro angeic a tro fë la itre huuje cili kowe la atre huuj, ngöne la hnë lö ne la itat ne icasikeu, matre troa apuiloinyi angeic qëmekei Iehova.

24 “Nge tro hë la atre huuj a xome la neköi mamoe trahmany nyine huuj ne ialoinekeun, memine la ca loga ne oel, nge tro hë angeic a jumejum itre ej, nyine huuj ne jumejum qëmekei Iehova. 25 Nge qa ne la atre huuj troa humuthe la neköi mamoe trahmany nyine huuj ne ialoinekeun, nge tro angeic a xome la sine la madra ne la huuj ne ialoinekeun, me köl ngöne la cane la hnangenyë maca, memine la pane he ne wanakoime maca, memine la pane he ne wanakoca maca ne la atr hna troa apuiloin. 26 Nge tro la atre huuj a nenge la sine la oel ngöne la hnatrapaime mi angeic. 27 Nge jëne la hene wanakoime maca i angeic, tro la atre huuj a 7 lao thathane qëmekei Iehova, la sine la oel ka ej ngöne la hnatrapaime mi angeic. 28 Nge qa ne la atre huuj troa xome la munëne la oel ka ej ngöne la hnatrapaime i angeic, nge hune la madra ne la huuj ne ialoinekeun, tro angeic a köl la cane la hnangenyë maca, memine la pane he ne wanakoime maca, memine la pane he ne wanakoca maca ne la atr hna troa apuiloin. 29 Nge qa ne la atre huuj troa xome la munëne la oel ka ej ngöne la hnatrapaime i angeic, me neng hune la he ne la atr hna troa apuiloin. Nge qëmekei Iehova, tro la atre huuj a kuca lo hna majemin, ene la huuj ne ialoinekeun thatraqane lai atr.

30 “Tro la atr a huujëne la lue meketrë maine lue neköi piny, thenge la hnei angeic hna hetreny. 31 Nge ame la lue waco hnei angeic hna hetreny, ke troa tro fë la cas nyine huuj ne ngazo, nge ketre nyine huuj ne dreuth asë. Nge tro angeic a huujëne la lue huuje cili, memine la huuj ne wene feja. Nge tro la atre huuj a kuca lo hna majemin, ene la huuj ne ialoinekeun thatraqane la atr hna apuiloin qëmekei Iehova.

32 “Celë hi wathebo kowe la atr ka meci lepera, nge tha ijije kö la itre mo i angeic troa apuiloinyi angeic.

33 Ame hnei Iehova hna qaja koi Mose me Arona ka hape: 34 “E traqa jë epuni lö ngöne la nöje Kanana, lo nöj hnenge hna hamë epun nyine zi i epun, nge tro na aciane la lepera* ngöne la ketre hnalapa ne la zi i epun, 35 qa ne la atrekë hnalapan troa wange la atre huuj me qaja ka hape: ‘Öhne hë ni la ketre mec ngöne la hnalapang.’ 36 Nge qa ne la atre huuj troa iupe troa eöthe la nöjei ewekë qa hnine la uma, qëmekene tro angeic a wange la götran hna xötre la mec, matre tha kö la atre huuj a jele pui ngazon la itre ewekë asë e hnine la uma. Thupene lai, tro la atre huuj a lö me goeëne la uma. 37 Nge qa ne la atre huuj troa goeëne la mec, nge maine xötre hë ej ngöne la itre ngöne uma, nge hetre götran ka hatr me hmedr maine madra, nge goi lö fe la mec hnine la ngöne uma, 38 tro hë la atre huuj a tro e kuhu qëhnelö, me thingi qëhnelöne la uma koi 7 lao drai.

39 Nge ame ngöne la hna 7 ne drai, qa ne la atre huuj troa wange hmaca lai uma: maine kökötre hë la mec ngöne la itre ngöne uma, 40 tro hë la atre huuj a iupe troa xometrij la itre etë hna lapan hnei mec, nge tro hë angatr a hnatrij tröne la traon ngöne la ketre götran ka pui ngazo. 41 Nge tro angeic a iupe troa xujetrij asë e hnine la uma. Nge ame la dro ka fedr memine la dro ka qaqacil hna xujetrij, tro ha hnatrij tröne la traon ngöne la ketre götran ka pui ngazo. 42 Nge tro angatr a xome la itre xa etë hnane la itre etë hna xometrij, nge tro hë angatr a huliwane la ketre pengöne dro ka fedr, me köl ajijiane la uma.

43 “Nge maine xulu hmaca ha la mec nge mama ha ngöne la uma, thupene la hna huletrije lo itre etë, me xujetrije la ngöne uma, me köl ajijiane hmaca la uma, 44 tro hmaca la atre huuj a goeëne la uma: nge maine kökötre hë la mec ngöne la itre ngöne uma, celë hi lepera ka ixötrekeu. Tro ha pui ngazo la uma. 45 Nge tro ha thëtrije la uma, me eöthe la itre etë, me itre sinöe, memine asë la dro ka fedr memine la dro ka qaqacil, nge tro ha xometrij itre ej tröne la traon, ngöne la ketre götran ka pui ngazo. 46 Nge ame la atr ka troa lö hnine la uma ngöne la itre drai ne kola thingi qëhnelöne la uma, tro hë angeic a pui ngazo uti hë e hej. 47 Nge ame la atr ka troa meköl me xen hnine la uma, tro hë angeic a wasine la itre iheetre i angeic.

48 “Ngo maine kola öhn hnene la atre huuj laka, tha kökötre kö la mec ngöne la uma thupen la hna köl ajijian, tro hë angeic a jele pui loine la uma, ke patre hë la mec. 49 Nge tro angeic a xome la lue waco, memine la sinöe arasi, memine la imaano ka palulu, memine la uke hisop, matre troa apuiloine* la uma. 50 Nge hune la tim ka neni, tro angeic a humuthe la ketre waco ngöne la trengen hna xup hnei dro. 51 Nge tro hë angeic a xome la sinöe arasi, memine la uke hisop, me imaano ka palulu, memine la waco ka mele pe, nge tro angeic a ce hnea itre ej ngöne la madra ne la waco hna humuth, nge thupene lai ngöne la tim ka neni. Nge qa i angeic troa a 7 lao thathane la madra cili kowe la uma. 52 Nge tro angeic a xome la madra ne la waco, memine la tim ka neni, memine la waco ka mele pe, memine la sinöe arasi, memine la uke hisop, memine la imaano ka palulu, matre troa apuiloine la uma. 53 Nge tro angeic a nue hmaca la waco ka mel ngöne la itre hlapa, tröne la traon. Nge tro hë angeic a huletrije la ka pui ngazo* qa hnine la uma, nge tro hë ej a pui loi.

54 “Celë hi wathebo göne la nöjei pengöne lepera, me itre ka watu he, me ka hetre mec ngöne ienaj, 55 me itre iheetr me uma ka si lepera, 56 me itre gaa cipa, me itre kuthony, me itre ikutr, 57 matre atrepengöne la ewekë ka pui ngazo, memine la ka pui loi. Celë hi wathebo göne la meci lepera.”