Hnaaluene Tus i Samuela

14 Ngo hnei Ioaba nekö i Zeruia, hna drenge laka, kola hleuhleu la joxu, ke nyidrë a meku Abasaloma. 2 Matre Ioaba a hëne jë la ketre föe ka inamacan qa Tekoa. Nge öni angeic kowe lai föe: “Tro eö a nyi ka hnëmec, me heetrëne la iheetr ne hnëmec, ngo the köle oel ka pui lolo kö. Loi e troa mekun laka, ekö hë eö hnëmec. 3 Thupene lai, tro eö a lö koi joxu me hape, . . .” Nge Ioaba a qaja jë koi angeic la nyine qaja.

4 Ame hnene lai föe ne Tekoa hna lö koi joxu, me sa iwatingöneca, me thil me hape: “Joxu fe, wai ni ju!” 5 Önine jë hi la joxu: “Nyipoti a u?” Sa jë hi lai föe ka hape: “Ekölöhini, sine föe ni, ke meci hë la föeng. 6 Nge hnene la hlue i nyipë hna hnahone la lue nekö trahmany. Ngazo pe, hnei nyidroti hna isi ngöne la itre hlapa, nge pëkö ka sewe nyidro, nge hnene la ketre neköng hna lep me humuthe la ketre. 7 Matre enehila, faming asë a catre fë ka hape: ‘Traqa fë pi la ka humuthe la trejin me angeic. Nge tro huni a humuthi angeic nyine të la mele ne la trejin me angeic. Nge nyine u la troa hetre ka kepe edrö!’ Ngo e traqa jë angatr humuthi nyën, tro angatre lai a apin la neköi wanalepenge ka mel. Nge e celë fen, pë hmaca kö matrane la föeng ka mel*, nge ka troa xome la ëje i nyidrë.”

8 Ame hnene la joxu hna qaja kowe lai föe ka hape: “Bëeke jë kowe la hnalapa i nyipo, nge tro ni a amekötine la jole cili.” 9 Ngo önine lai föe ne Tekoa ka hape: “Joxu fe, eni me fami i kaka la atrekë zöne la ngazo hna kuca hnene la neköng. Ngo epi troa pë engazone la joxu me therone i nyidrë.” 10 Önine la joxu ka hape: “E traqa jë ketre ithanatane hmaca koi nyipo la jole cili, uti sai angeice pi koi ni, nge tha tro hmaca kö angeic a ajolë nyipo.” 11 Ngo önine hmaca jë lai föe ka hape: “Joxu fe, pane thithi jë koi Iehova Akötresi nyipë, matre tha tro kö la atre ti madra a humuthe la neköng.” Ame hnei joxu hna sa ka hape: “Qëmeke i Iehova Akötresie ka mel, pëkö atr ka troa ketr la ca neköi pene he ne la nekö i nyipo.” 12 Ngo önine hmaca jë hi lai föe ka hape: “Joxu fe, pane nue ni hmaca pi troa ithanata.” Matre önine la joxu: “Öi, ewekë jë!”

13 Nge önine lai föe: “Hnauëne la nyipëti a akötrëne tune la nöje i Akötresie? Ke itre trengewekë i nyipë a nyizö nyipë. Hnei nyipëti hna helëne la sipu nekö i nyipë, me tha abëekë angeic. 14 Eje hi, ka tro asë hi sa mec, nge tro sa tune la tim hna neng hune la ihnadro, nge pëkö ka atreine jöe hmaca. Tha tro kö Akötresie a xome la mele i ketre, ngo tro kö nyidrëti a thele kepin, matre tha tro kö a helëne paluane la atre hna helën. 15 Ngo ame la eni pi e celë troa ithanata me nyipë joxu, ke hnene la itre xa atre hna axouenyi ni. Matre öning, ‘Loi e tro ni a ithanata koi joxu, nge maine jë, tro nyidrëti a kapa la sipong. 16 Nge ma tro jë la joxu a dreng, me amele ni qaathene lo atre ihumuth, lo ka thele troa apatrenyi ni memine la nekönge ka cas, me thapa la edrö hna hamën hnei Akötresie.’ 17 Nge öninge fe, ‘Tro kö a aupune la hning hnene la itre trengewekë ne la joxung,’ ke ame nyipë joxu, ceitu i nyipë me angela ne la nyipi Akötresie, ka atreine waipengöne la loi me ngazo. Haawe, epi tro Iehova Akötresi nyipë a ce me nyipë.”

18 Ame hnene la joxu hna qaja kowe lai föe ka hape: “Pane sa jë la itre hnyingeng, nge the juetrëne kö la ketre ewekë.” Matre önine lai föe: “Öi Joxu, eni a drei nyipë.” 19 Öni joxu: “Tha Ioaba kö la ka uku nyipo troa qaja lai koi ni?” Sa jë hi lai föe ka hape: “Qëmeke i nyipë joxu, eje hi. Ioaba hlue i nyipë la ka upi ni troa traqa, me qaja la itre ewekë celë koi nyipë. 20 Hnei Ioaba hlue i nyipë hna kuca lai, matre ketre pengöne pi la aqane tro nyipëti a waipengöne lai jol. Ngo ceitune hi la inamacan ne la joxung memine la inamacan ne la angela ne la nyipi Akötresie, atre hi nyidrëti la nöjei ewekë ka traqa ngöne la nöj.”

21 E thupen, önine la joxu koi Ioaba: “Nyipici eö hi, tro ni a kuca la hnei eö hna qaja. Tro jë troa hë Abasaloma, nge traqa sai angeice pi.” 22 Ame hnei Ioaba hna sa iwatingöneca, me thil qëmekene la joxu, me qaja atrune la joxu, nge öni angeic: “Atre hë ni laka, nyipë joxung a kepe ni, ke hnei nyipëti hna nyipiewekëne la sipong.” 23 Ioaba a mejë jë, me tro a tro Gesuri, nge angeic a bëeke sai Abasaloma jë a tro Ierusalema. 24 Ngo önine la joxu: “Tro Abasaloma a bëeke kowe la hnalapa i angeic, ngo tha tro kö angeic a traqa koi ni.” Nge Abasaloma a lö jë kowe la hnalapa i angeic, nge tha iöhnyi kö me joxu.

25 Atre ka mingöminge catr Abasaloma, nge hna hain, a pëkö ka tun e Isaraela. Qaane ju hi la hene wanakoca uti hë la pene he, pëkö ca hnepe engazo i angeic. 26 E nöjei macatre, angeic a cin apane la he i angeic, ke hace pala ha. Traqa koi 2 kilo 3* la ehacene la ipene he i angeic, thenge lo tulu hnine la hnalapa i joxu.* 27 Köni nekö i Abasaloma trahmany, nge ca jajiny, Tamara la ëjen. Föe lai ka mingöminge catr.

28 Lue macatre ne lapa Abasaloma e Ierusalema, nge tha iöhnyi kö angeic me joxu. 29 Matre ngöne la ketre drai, hnei Abasaloma hna hë Ioaba, matre tro Ioaba a qeje angeic koi joxu, ngo xele kö Ioaba ma tro koi Abasaloma. Matre hnei Abasaloma hna alua hë Ioaba, ngo xele pala hi Ioaba. 30 Ame hnei Abasaloma hna qaja kowe la itre hlue i angeic ka hape: “Hetre hlapa i Ioaba ezine la hlapang, nge angeic a tra bali e cili. Ngo tro jë troa manith.” Nge hnene la itre hlue i Abasaloma hna manithe la hlapa i Ioaba. 31 Ame hnei Ioaba hna tro koi Abasaloma me hape: “Itre hlue i eö a manithe fë nemene la hlapang?” 32 Sa jë hi Abasaloma ka hape: “Dreng! Hnenge lo hna iup troa thei eö. ‘Eni lo a pi upi ö koi joxu matre hnyingëne ka hape, “Kola thei ni fë nemen qa Gesuri? Ka loi kö la tro ni a lapa e cili. Ngo enehila, nue ni pi troa wai nyipë, nge e hetre engazong, humuthi ni pi.”’”

33 Haawe, Ioaba a tro ju koi joxu, me tro fë la maca i Abasaloma. Nge hnene la joxu hna hë Abasaloma, nge angeic a lö ju koi joxu, me sa iwatingöneca me thil. Ame hnei joxu hna dremi angeic.