Pane Tus i Aqane Lapa Itre Joxu

29 Thupene lai, öni Dravita joxu kowe la icasikeu asë ka hape: “Ame Solomona neköng, lo hnei Akötresie hna iën, nekönatre pala kö angeic, nge thatre pala kö angeice koilo, nge ame pena la huliwa nyine troa kuca, tha ka co kö, ke ame la uma ne hmi celë, tha koi itre atre kö, ngo koi Iehova Akötresie. 2 Celë hi matre, hnenge hna isin troa hnëkë ewekë matre troa xupe la uma ne la Akötresing. Ase hë ni hnëkë gool, göne la itre ewekë nyine kuca hnei gool, me sileva kowe la itre ewekë sileva, me kopa kowe la itre ewekë kopa, me fao koi itre ewekë fao, me sinöe koi itre ewekë sinöe, me itre etë* ka tru thupen, me itre etë nyine peleth hnei sima, itre neköi etë ka nyimu han nyine amingömingön, ene la nöjei etë ka tru thupen, me nyimu etë alebat. 3 Nge pine la ihniming kowe la uma ne la Akötresing, eni fe a hamëne la gool me sileva qa ngöne la sipu trengamong, nyine nyixane la hnenge hna hnëkëne hë kowe la uma ka hmitrötre celë. 4 Hane hi la hnenge hna hamën: 3000 lao talane* gool qa Ofira, me 7000 lao talane sileva hna dreuth, matre heetrëne la itre ngöne uma ne la itre hnahag, 5 itre gool thatraqane la itre ewekë hna kuca hnei gool, me sileva thatraqane la itre ewekë hna kuca hnei sileva, me nöjei huliwa ne la itre atre ka huliwa. Nge enehila, drei la ka pi hamë ahnahna koi Iehova?”

6 Ame hnene la itre tixe ne lapa, me itre tane la itre tribu ne Isaraela, me itre tane la ala 1000 me ala 100, me itre tane ka thupëne la itre ewekë i joxu hna kapa la ihë i joxu. 7 Angatr a hamëne pi kowe la uma ne la nyipi Akötresie la 5000 lao talane gool, me 10000 lao dareki,* me 10000 lao talane sileva, me 18000 lao talane kopa, me 100000 lao talane fao. 8 Ame la nöjei atre ka trene etë ka tru thupen, angatr a hamën nyine amë hnine la hnahagë trengamo ne la uma ne hmi Iehova, lo hna thupën hnei Iehiela qa Geresoma. 9 Nge hnene la nöj hna madrin troa hamëne qa kuhu hni la itre ahnahna cili koi Iehova, nge atraqatre fe la madrine i Dravita joxu.

10 Thupene lai, hnei Dravita hna atrunyi Iehova qëmekene la icasikeu asë. Öni Dravita: “Epi troa atrunyi Iehova Akötresi Isaraela keme hun, uti hë epine palua. 11 Iehova fe, nyipëti la ka draië catr, nge ka men, me mingöming, me lolo, me hmitrötr; ke ame la nöjei ewekë e koho hnengödrai me e celë fen, ke itre ewekë i nyipëti asë hi. Iehova fe, ewekë i nyipë la mus! Nge nyipëti hi la atre musinëne la nöjei ewekë asë. 12 Ame la trengamo me lolo, itre ej a xulu qaathei nyipë, nge nyipëti la ka mus hun asë. Ngöne la ime i nyipë la trengecatr me men, nge atreine hi la ime nyipë troa adraiën, me aegöcatrene la nöjei atr. 13 Nge enehila Akötresi hun, eahuni a olene koi nyipë, me atrune la ëje i nyipë ka mingöming.

14 “Ke drei ni? Nge drei la nöjeng troa tro fë xanëne la itre huuj? Ke eje hi, qaathei nyipë la nöjei ewekë asë, nge ame la hne huni hna traqa fë koi nyipë, ke qaathene la ime i nyipë. 15 Itre trenyiwa hun qëmeke i nyipë, itre ka feke trootro tune lo itre qaaqaa hun, nge kösë ahnu la itre drai ne mele hun e celë fen, pëkö mejiun. 16 Matre Iehova fe Akötresi hun, ame la nöjei ewekë hne huni hna hnëkën nyine xupe la uma i nyipë, me atrune la ëje i nyipë ka hmitrötr, ke itre ewekë ka xulu qa ngöne la ime i nyipë, itre ewekë i nyipëti asë hi. 17 Nge atre hi ni Akötresinge fe laka, nyipëti a goeëne hnyawa la aliene hni, nge kola amadrinë nyipë hnene la thiina ka meköt. Hnenge hna huujëne qa kuhu hning la itre ewekë celë, nge tru la madrineng troa goeëne la nöje i nyipë e celë, kola hamën xanëne la itre ahnahna. 18 Matre Iehova fe, Akötresi Aberahama me Isaaka, me Isaraela itre qaaqaa hun, epi tro nyipëti a xatuane la nöje i nyipë troa hetrenyi pala hi la aja celë, me mekune celë, nge matre tro la itre hni angatr fedre koi nyipë uti hë epin. 19 Nge epi tro nyipë a hamë Solomona neköng la hni ka pexej,* matre tro angeic a trongëne la itre hna amekötin, me hna amekunën, me itre wathebo i nyipë. Epi tro angeic a kuca lai, me xupe la uma ne hmi hnenge hna hnëkën.”

20 Nge öni Dravita jë hi kowe la icasikeu asë ka hape: “Enehila, atrunyi Iehova jë Akötresi epun.” Ame hnene la icasikeu asë hna atrunyi Iehova, Akötresi ne la itre qaaqaa i angatr. Angatr a sa iwatingöneca ju me thil qëmeke i Iehova, me qëmekene la joxu. 21 Ame ngöne la drai cili me ngöne la drai thupen, hnei angatr hna tro fë huuj koi Iehova, me itre huuj ne dreuth asë koi Iehova, ene la 1000 lao neköi kau, me 1000 lao nani, me 1000 lao neköi mamoe, me waina nyine fii huuj. Nyimutre catre la itre huuj hnei angatr hna tro fë thatraqane la nöj asë. 22 Nge angatr a xeni jë me ij qëmeke i Iehova ngöne la drai cili, nge madrin catr angatr. Nge angatr a alua acili joxu Solomona nekö i Dravita, me ië angeice qëmeke i Iehova troa tane la nöj. Thupene lai, angatr a ië Zadoka ju fe troa atre huuj. 23 Ame hnei Solomona hna lapane la therone i Iehova, matre nyihna i Dravita keme i angeic. Lolo catre la mus i Solomona, nge hnene la angetre Isaraela asë hna drengethenge nyidrë. 24 Hnene la itre he ne nöj asë, me itre soc ka catr, me nöjei nekö i Dravita joxu hna drengethenge Solomona joxu. 25 Nge hnei Iehova hna atrunyi Solomona qëmekei Isaraela asë. Hnei nyidrëti fe hna kuca matre, pëkö ketre joxu ne Isaraela ekö, ka hane mama tui Solomona.

26 Celë hi aqane mus i Dravita nekö i Iese hui Isaraela asë. 27 Hnei Dravita hna musi koi Isaraela koi 40 lao macatre, 7 e Heberona, nge 33 e Ierusalema. 28 Hnei Dravita hna mel aqeany me madrin,* me kapa la itre trengamo ka tru, nge hlemu catre nyidrë. Thupene lai, hnei Solomona nekö i nyidrë, hna joxu thupei nyidrë. 29 Hna fejan asë la mele i Dravita qaane la qaan uti hë la pun, hnine la itre itus i Samuela lo atre qeje pu,* me Nathana perofeta, me Gada atre qeje pu. 30 Itre ej a qejepengöne la ijine mus i nyidrë, me trengecatr i nyidrë, me itre ewekë ka traqa koi Dravita ngöne la ijine cili, me koi Isaraela, memine la nöjei baselaia xötreith.