Zakaria
3 Nge hnei nyidrëti hna amamai Iosua koi ni, atre huuj ka sisitria, ka cile qëmekene la angela i Iehova. Nge Satana a cil ngöne la götrane maca i angeic matre icilekeu me angeic. 2 Ame hnene la angela i Iehova hna qaja koi Satana ka hape: “Epi tro Iehova a ameköti ö Satana! Eje hi, epi tro Iehova, atre ië Ierusalema a haji ö! Hapeu la atre cili, tha ceitui angeice kö me sine sinöe ka mel, hna hul qa ngöne eë?
3 Nge nyipici laka, ka dro la itre iheetre i Iosua. Angeice lo a cil qëmekene la angela. 4 Önine la angela kowe la itre ka cil qëmekei angeic: “Una pi la itre iheetre i angeic ka dro.” Nge öni angeice hmaca jë hi: “Goeën, hnenge hna xometrije la ngazo i ö, nge tro hë eö a heetrë iheetr ka mingöming.”*
5 Öninge jë hi: “Atë ju hune la he i angeic la ketre nyine atu he ka porop.” Ame hnei angatr hna atuthe la he i angeic hnei imaano ka porop, me heetrë angeic. Nge tha nanyi kö la angela i Iehova qa cili. 6 Önine jë hi la angela i Iehova koi Iosua: 7 “Hane hi la hna qaja hnei Iehova joxu ne la itre trongene isi e hnengödrai: ‘Maine tro eö a kuca la hnenge hna qaja,* me eatrën la itre hnëqa i ö koi ni, tro hë eö a atre amekötin hnine la umang, me thupëne* la itre kureng. Nge tro hë ni a aijijë eö troa hane easenyi ni tui angatre la.’
8 “‘Pane drenge ju Iosua atre huuj ka sisitria, me epun itre sine huliwa i angeic ka lapa qëmekei angeic. Eje hi, epuni la ketre hatren. Ke hane hi la hlueng, Ziin la ëje i angeic. 9 Goeëne la etë hnenge hna amë qëmekei Iosua. Hetrenyi la 7 lao alamek hun ej, nge hetre hnenge hna troa sija hune la etë,’ öni Iehova joxu ne la itre trongene isi e hnengödrai, ‘nge tro ni a apatren ngöne la ca drai la ngazo ne la nöje ce.’
10 “‘Ngöne la drai cili,’ öni Iehova joxu ne la itre trongene isi e hnengödrai, ‘tro epuni a isa hëne la atre lapa ezi epun troa lapa fene la ivin me iwacua i epun.’”