Atre Cainöj

5 Wai ö kö la eö a tro kowe la uma ne la nyipi Akötresie; ka loi ju kö la troa tro cili matre dreng, hune la troa tro fë huuj tune la hna kuca hnene la itre hmo. Ke thatre kö angatr ka hape, ka ngazo la hnei angatr hna kuca.

2 The canga ewekë kö, nge the nue kö la hni i ö troa ithanata menu qëmekene la nyipi Akötresie; ke ame la nyipi Akötresie, nyidrëti e koho hnengödrai ngo eö pe hi e celë fen. Celë hi matre, tha tro kö eö a ithanata lapa. 3 Ke tro ha pu menu la atr, e tru la hnei angeic hna hnehengazo. Ketre tun, tro ha ixöjetrije la hmo, e tru pala ha la hnei angeic hna ithanata. 4 Ame la eö a sisinyi koi Akötresie, the hmitre kö troa eatrën, ke xele nyidrëti ma wange la itre hmo. Eatrëne ju la hnei ö hna sisiny. 5 Ka loi ju kö la tro eö a tha sisiny, hune la troa sisiny ngo tha eatrëne pe. 6 The nue kö la që i ö troa akeinyi* ö, nge the qaja kö kowe la angela* ka hape: “Eni lo a ewekë menu.” Hnauëne laka, tro eö a jele la trengehni ne la nyipi Akötresie hnene la itre trengewekë i ö, nge tro nyidrëti a apatrene la itre huliwa i ö? 7 Tune la kola pu menu la atr, ke tru pala ha la hnei angeic hna hnehengazo, tro fe a pë aliene la itre trengewekë ne la atr ka ithanata lapa. Ngo xouene jë pe la nyipi Akötresie.

8 Maine eö a öhne laka, kola akötrën la ka pë ewekë ngöne la nöje i ö, nge tha metrötrëne kö la thiina ka meköt me meköt, the sesëkötre kö. Ke kola musinëne la ketre tan hnene la ketre, nge hetre itre xane hmaca kö ka draië hui nyidroti asë.

9 Nge ketre, angatr asë hi a ce thawa la hna eëny; nge goi xeni fe la joxu qa ngöne la hna menuën ngöne la hlapa.

10 Ame la ka hni koi mani, ke tha tro kö angeic a mano hna thele mani. Ketre tun la ka hnimi mo, tha mano kö angeice thele la thupe i angeic. Ka gufa fe la ewekë cili.

11 Ame la kola mana la itre ewekë ka loi, ke kolo fe a tru hnei atr ka xen. Nemene hmaca kö la nyine troa kapa hnene la atrekë ewekën, hune hi la troa goeën hnei luemek?

12 Ka meköle hnyawa la hlu, ngacama tru ju hë maine co hi la hnei angeic hna xen, ngo tha meköle hë la trenamo hnene la etrune la itre ewekë i angeic.

13 Öhne hë ni la ketre ewekë ka jole catr* fene la jö: Ene la ketre atr ka xawane la itre trengamo matre akötrë angeice kö. 14 Hna aluzine la trengamo i angeic ngöne la ketre huliwa ka tha cile huti kö, matre ame hë la kola hnahone la nekö i angeic trahmany, ke pëhë ca ewekë i angeic.

15 Tune la atr hna hnahone xöe hnene la thine i angeic, tro hmaca kö angeic a tro xöe tune lo aqane traqa i angeic. Nge pëkö hnei angeic hna troa xome trongëne nyine thupene la huliwa i angeic.

16 Nge hane fe la ketre ewekë ka jole* catr: Tro angeic a tro hmaca tune lo aqane traqa i angeic; nge nemene la eloin kowe la atr e tro angeic a catre huliwa kowe la ka pë alien? 17 Ketre, e nöjei drai, angeic a xeni mit memine la hleuhleu atraqatr, me mec me elëhni.

18 Hane hi la hnenge hna trotrohnin: Nyine loi kowe la atr troa xen, me ij, me madrin qa ngöne la nöjei huliwa i angeic fene la jö, ngöne la itre hnepe drai i angeic qaathene la nyipi Akötresie, ke celë hi thupe* i angeic. 19 Nge ame la nyipi Akötresie a hamë mani me mo kowe la atr, me aijijë angeic troa kepe thangan qa ngön, ke loi e tro angeic a kepe thupen* me madrin qa ngöne la hna catre huliwa. Celë hi ahnahna qaathei Akötresie. 20 Ke tha tro kö angeic a öhne la kola tro* la itre drai ne mele angeic, ke kolo pala hi a amadrinëne la hni i angeic hnene la nyipi Akötresie.